Read Gobaith i Gymru Micha 6 Bible Online

Micha 6 - Gobaith i Gymru bible

Micha 6

¹Gwrandwch beth mae'r ARGLWYDD yn ei ddweud: “Codwch i amddiffyn eich hunain o flaen y bryniau a'r mynyddoedd!

²Chi fynyddoedd a sylfeini'r ddaear gwrandwch ar gyhuddiad yr ARGLWYDD.” (Mae'n dwyn achos yn erbyn ei bobl. Mae ganddo ddadl i'w setlo gydag Israel.)

³“Fy mhobl, beth wnes i o'i le? Beth wnes i i'ch diflasu chi? Atebwch!

⁴Fi wnaeth eich achub chi o wlad yr Aifft, [32†] a'ch rhyddhau o fod yn gaethweision. Anfonais Moses i'ch arwain, ac Aaron a Miriam gydag e.

⁵Fy mhobl, cofiwch beth roedd Balac, brenin Moab, am ei wneud, [33†] a sut wnaeth Balaam fab Beor ei ateb. Cofiwch beth ddigwyddodd rhwng Sittim a Gilgal [34] — i chi weld fod yr ARGLWYDD wedi eich trin yn deg.”

⁶Sut alla i dalu i'r ARGLWYDD? Beth sydd gen i i'w gynnig wrth blygu i addoli y Duw mawr? Ydy aberthau i'w llosgi yn ddigon? Y lloi gorau [35] i'w llosgi'n llwyr? Fyddai mil o hyrddod yn ei blesio, neu afonydd diddiwedd o olew olewydd?

⁷Ddylwn i aberthu fy mab hynaf yn dâl am wrthryfela? — rhoi bywyd fy mhlentyn am fy mhechod?

⁸Na, mae'r ARGLWYDD wedi dweud beth sy'n dda, a beth mae e eisiau gen ti: Hybu cyfiawnder, bod yn hael bob amser, a byw'n wylaidd ac ufudd i dy Dduw.

⁹“Gwrandwch!” Mae'r ARGLWYDD yn galw pobl Jerwsalem — (Mae'n beth doeth i barchu dy enw, o Dduw.) “Gwrandwch lwyth Jwda a'r rhai sy'n casglu yn y ddinas!

¹⁰Ydw i'n mynd i anwybyddu'r trysorau a gawsoch trwy dwyll, a'r mesur prin, sy'n felltith?

¹¹Fyddai'n iawn i mi oddef y clorian sy'n dweud celwydd, a'r bag o bwysau ysgafn? [36]

¹²Mae'r cyfoethog yn treisio'r tlawd, a'r bobl i gyd yn dweud celwydd — twyll ydy eu hiaith gyntaf nhw!

¹³Dw i'n mynd i'ch taro a'ch anafu'n ddifrifol, cewch eich dinistrio am bechu.

¹⁴Byddwch yn bwyta, ond byth yn cael digon. [37†] Bydd eich plentyn yn marw'n y groth, cyn cael ei eni; a bydda i'n gadael i'r cleddyf ladd y rhai sy'n cael eu geni!

¹⁵Byddwch yn plannu cnydau ond byth yn medi'r cynhaeaf. Byddwch yn gwasgu'r olewydd ond gewch chi ddim defnyddio'r olew. Byddwch yn sathru'r grawnwin, ond gewch chi ddim yfed y gwin. [38†]

¹⁶Dych chi'n cadw deddfau drwg y brenin Omri, [39†] ac efelychu arferion drwg y brenin Ahab! [40] — a dilyn eu polisïau pwdr. Felly bydda i'n eich dinistrio chi, a bydd pobl yn eich gwawdio ac yn gwneud sbort am eich pen.”