Read Gobaith i Gymru Seffaneia 1 Bible Online

Seffaneia 1 - Gobaith i Gymru bible

Seffaneia 1

¹Dyma'r neges roddodd yr ARGLWYDD i Seffaneia. Roedd Seffaneia yn fab i Cwshi, mab Gedaleia, mab Amareia, mab Heseceia. [1] Cafodd y neges pan oedd Joseia fab Amon yn frenin ar Jwda. [2] [3†]

²“Dw i am glirio popeth yn llwyr oddi ar y ddaear,” —yr ARGLWYDD sy'n dweud hyn.

³“Dw i am glirio pobl ac anifeiliaid. Dw i am glirio adar a physgod (yr holl ddelwau a'r bobl ddrwg.) Dw i'n mynd i gael gwared â'r ddynoliaeth oddi ar wyneb y ddaear,” —yr ARGLWYDD sy'n dweud hyn.

⁴“Dw i'n mynd i daro Jerwsalem a phawb sy'n byw yn Jwda. Dw i am gael gwared ag addoli Baal [4] yn llwyr, a fydd neb yn cofio'r offeiriaid ffals ac anffyddlon.

⁵Dw i am gael gwared â'r rhai sy'n addoli'r haul a'r lleuad a'r sêr o ben y toeau, a'r rhai sy'n honni eu bod yn ffyddlon i'r ARGLWYDD tra'n tyngu llw yn enw Milcom. [5]

⁶A dw i am gael gwared â'r rhai sydd wedi troi cefn arna i, yr ARGLWYDD, a byth yn troi ata i am help nac arweiniad.”

⁷Ust! o flaen y Meistr, yr ARGLWYDD! Mae dydd barn yr ARGLWYDD yn agos. Mae'r ARGLWYDD wedi paratoi'r aberth, ac wedi cysegru'r rhai mae'n eu gwahodd.

⁸“Ar ddiwrnod yr aberth mawr,” meddai'r ARGLWYDD, “dw i'n mynd i gosbi swyddogion a theulu'r brenin, a phawb sy'n gwisgo fel paganiaid. [6]

⁹Ar y diwrnod hwnnw bydda i yn cosbi pawb sy'n neidio dros y stepen drws, [7] ac yn llenwi palas eu meistr gyda chyfoeth wedi ei ddwyn trwy drais a gormes.”

¹⁰“Ar y diwrnod hwnnw hefyd,” meddai'r ARGLWYDD, “bydd sŵn gweiddi wrth Giât y Pysgod, a sgrechian o ran newydd y ddinas [8†]; bydd twrw mawr yn dod o'r bryniau.

¹¹Udwch, chi sy'n oedi yn y farchnad, achos bydd y masnachwyr wedi mynd, a'r rhai sy'n trin arian wedi eu taflu allan.

¹²Bryd hynny, bydda i'n chwilio drwy Jerwsalem gyda lampau, ac yn cosbi'r rhai sy'n hunanfodlon a di-hid, sy'n meddwl, ‘Fydd yr ARGLWYDD yn gwneud dim byd — na da na drwg.’

¹³Bydd eu heiddo'n cael ei ddwyn, a'u tai yn cael eu chwalu. Maen nhw'n adeiladu tai newydd, ond gân nhw ddim byw ynddyn nhw. Maen nhw'n plannu gwinllannoedd ond gân nhw ddim yfed y gwin. [9†]”

¹⁴Mae dydd barn yr ARGLWYDD yn agos; y dydd mawr — bydd yma'n fuan! Bydd sŵn chwerw i'w glywed y diwrnod hwnnw; sŵn milwyr cryf yn gweiddi crïo.

¹⁵Bydd yn ddydd i Dduw fod yn ddig. Bydd yn ddiwrnod o helynt a gofid; yn ddiwrnod o ddifrod a dinistr. Bydd yn ddiwrnod tywyll ofnadwy; diwrnod o gymylau duon bygythiol. [10†]

¹⁶Bydd sŵn y corn hwrdd [11], y bloeddio a'r brwydro yn bygwth y trefi caerog a'r tyrau amddiffynnol.

¹⁷“Am bod y bobl wedi digio'r ARGLWYDD bydda i'n achosi helbul iddyn nhw! — byddan nhw ar goll fel pobl ddall. Bydd eu gwaed yn cael ei dywallt fel llwch, a'u perfeddion ar wasgar fel tail.

¹⁸Fydd arian ac aur ddim yn eu harbed nhw ar y diwrnod pan fydd yr ARGLWYDD yn barnu. Bydd ei ddicter fel tân yn difa'r ddaear. Bydd dinistr llwyr a sydyn yn dod ar bawb drwy'r byd i gyd.”