Read Gobaith i Gymru Seffaneia 2 Bible Online

Seffaneia 2 - Gobaith i Gymru bible

Seffaneia 2

¹Dewch, casglwch at eich gilydd, y genedl sydd heb gywilydd.

²Dewch cyn i'r cwbl ddod yn wir, ac i'ch cyfle olaf ddiflannu fel us — Cyn i'r ARGLWYDD wylltio'n lân gyda chi; cyn i'w ddydd barn eich dal chi!

³Gofynnwch i'r ARGLWYDD eich helpu, chi sy'n cael eu cam-drin yn y wlad ac sy'n ufudd i'w orchmynion. Gwnewch beth sy'n iawn. Byddwch yn ostyngedig. Falle y cewch eich cuddio mewn lle saff ar y diwrnod pan fydd yr ARGLWYDD yn barnu.

⁴Bydd tref Gasa'n wag ac Ashcelon yn adfeilion. Bydd pobl Ashdod wedi eu gyrru i ffwrdd cyn canol dydd, a tref Ecron [12] wedi ei bwrw i lawr.

⁵Gwae chi sy'n byw ar lan y môr — bobl Philistia ddaeth o Creta. Amdanat ti Canaan, wlad y Philistiaid, mae'r ARGLWYDD wedi dweud yn dy erbyn: “Bydda i'n dy ddinistrio, a fydd neb ar ôl!”

⁶Bydd yr arfordir yn dir pori — dolydd i fugeiliaid a chorlannau defaid.

⁷Bydd tir y glannau yn eiddo i'r bobl sydd ar ôl o Jwda; Nhw fydd yn pori yno ac yn cysgu'r nos yn nhai Ashcelon. Bydd yr ARGLWYDD eu Duw yn dod atyn nhw, a rhoi llwyddiant iddyn nhw eto.

⁸“Dw i wedi clywed Moab yn gwawdio a phobl Ammon yn enllibio [13] — gwawdio fy mhobl, a bygwth eu ffiniau.

⁹Felly, mor sicr â'r ffaith mai fi ydy'r Duw byw,” —meddai'r ARGLWYDD holl-bwerus, Duw Israel. “Bydd Moab fel Sodom ac Ammon fel Gomorra! [14†] — yn llawn chwyn a phyllau halen, ac yn dir diffaith am byth. Bydd y rhai sydd ar ôl o'm pobl yn dwyn eu heiddo, a'r gweddill o'm gwlad yn cymryd eu tir.”

¹⁰Dyna fydd eu tâl am eu balchder, am wawdio a bygwth pobl yr ARGLWYDD holl-bwerus.

¹¹Bydd yr ARGLWYDD yn eu dychryn, a bydd holl dduwiau'r ddaear yn ddim. Yna bydd pobl pob cenedl yn addoli'r ARGLWYDD yn eu gwledydd eu hunain.

¹²A chi, bobl dwyrain Affrica, [15] [16†] bydd fy nghleddyf yn eich lladd chi.

¹³Bydd yr ARGLWYDD yn taro'r gogledd [17†] ac yn dinistrio Asyria. Bydd dinas Ninefe yn adfeilion [18]; yn sych fel anialwch diffaith.

¹⁴Bydd pob math o anifeiliaid gwylltion yn gorwedd yn ei chanol. Bydd tylluanod yn clwydo yn ei hadfeilion, ac yn hwtian yn y ffenestri. Bydd rwbel ar bob rhiniog a'r waliau'n noeth am fod yr holl waith coed wedi ei rwygo allan.

¹⁵Dyna ddaw o'r ddinas llawn miri oedd yn ofni neb na dim! Roedd yn meddwl, “Fi ydy'r un! — Does neb tebyg i mi!” [19†] Ond fydd dim ond adfeilion ar ôl — lle i anifeiliaid gwyllt gael byw! Bydd pawb sy'n mynd heibio yn ei gwawdio a gwneud ystumiau arni.