Read Gobaith i Gymru Haggai 1 Bible Online

Haggai 1 - Gobaith i Gymru bible

Haggai 1

¹Ar ddiwrnod cynta'r chweched mis o ail flwyddyn teyrnasiad y Brenin Dareius [1], dyma'r proffwyd Haggai yn rhoi'r neges yma gan yr ARGLWYDD i Serwbabel fab Shealtiel [2], llywodraethwr Jwda, a hefyd i Jehoshwa fab Iehotsadac, yr archoffeiriad:

²Dyma mae'r ARGLWYDD holl-bwerus yn ei ddweud: “Mae'r bobl yma'n dweud, ‘Mae'n rhy fuan i ni ailadeiladu teml yr ARGLWYDD.’”

³A dyma'r proffwyd Haggai yn rhoi'r neges yma gan yr ARGLWYDD:

⁴“Ydy hi'n iawn eich bod chi'n byw yn eich tai crand, tra mae'r deml yma yn adfail?

⁵Felly dyma mae yr ARGLWYDD holl-bwerus yn ei ddweud: ‘Meddyliwch am funud beth dych chi'n wneud!

⁶Dych chi wedi hau digon, ond bach iawn ydy'r cynhaeaf; dych chi'n bwyta, ond byth yn cael eich llenwi; dych chi'n yfed, ond heb gael eich bodloni; dych chi'n gwisgo dillad, ond yn methu cadw'n gynnes; mae fel petai'r cyflog mae pobl yn ei ennill yn mynd i bwrs sydd a thwll ynddo!

⁷Ie, meddyliwch am funud beth dych chi'n wneud!’ —meddai'r ARGLWYDD holl-bwerus.

⁸‘Ewch i'r bryniau a dod â coed yn ôl i adeiladu'r deml; bydd hynny'n fy mhlesio, a bydd pobl yn fy mharchu,’ meddai'r ARGLWYDD.

⁹‘Roeddech chi'n disgwyl cnydau da, ond yn cael cnydau gwael. Roeddech chi'n ei gasglu, ond yna byddwn i'n ei chwythu i ffwrdd!’ —meddai'r ARGLWYDD holl-bwerus. ‘Pam? — Am fod fy nhŷ i yn adfeilion, a chithau'n rhy brysur yn poeni amdanoch chi'ch hunain!

¹⁰Dyna pam mae'r awyr heb roi gwlith, a'r tir wedi peidio tyfu cnydau.

¹¹Fi sydd wedi anfon sychder drwy'r wlad — ar y bryniau, ar yr ŷd a'r grawnwin a'r olewydd a phopeth arall sy'n tyfu o'r ddaear, ar bobl ac anifeiliaid, ac ar ffrwyth eich holl waith caled.’”

¹²Dyma Serwbabel fab Shealtiel, Jehoshwa fab Iehotsadac yr archoffeiriad, a phawb arall, yn gwneud beth roedd yr ARGLWYDD eu Duw yn ei ddweud, a gwrando ar neges Haggai, y proffwyd roedd e wedi ei anfon. Roedd y bobl yn parchu'r ARGLWYDD eto.

¹³Yna dyma Haggai, negesydd yr ARGLWYDD, yn rhoi neges arall gan Dduw i'r bobl, “‘Dw i gyda chi,’ meddai'r ARGLWYDD.”

¹⁴Dyma'r ARGLWYDD yn sbarduno Serwbabel fab Shealtiel, llywodraethwr Jwda a Jehoshwa fab Iehotsadac, yr archoffeiriad, a phawb arall hefyd: a dyma nhw'n bwrw iddi â'r gwaith o adeiladu teml eu Duw, yr ARGLWYDD holl-bwerus.

¹⁵Dechreuodd y gwaith ar y pedwerydd ar hugain o'r chweched mis [3].