Read Gobaith i Gymru Sechareia 7 Bible Online

Sechareia 7 - Gobaith i Gymru bible

Sechareia 7

¹Yn y bedwaredd flwyddyn o deyrnasiad y Brenin Dareius, ar y pedwerydd o fis Cislef (sef y nawfed mis) [23], dyma'r ARGLWYDD yn rhoi neges i Sechareia.

²Roedd pobl Bethel wedi anfon Saretser a Regem-melech a'i ddynion i ofyn am fendith yr ARGLWYDD.

³Roedden nhw hefyd i fynd i deml yr ARGLWYDD holl-bwerus, a gofyn i'r offeiriaid a'r proffwydi, “Ddylen ni ddal i alaru ac ymprydio yn y pumed mis [24], fel dŷn ni wedi gwneud ar hyd y blynyddoedd?” [25]

⁴Dyma fi'n cael neges gan yr ARGLWYDD holl-bwerus.

⁵“Dywed wrth bobl y wlad, a'r offeiriaid i gyd: ‘Dych chi wedi bod yn ymprydio ac yn galaru yn y pumed a'r seithfed mis [26] ers saith deg mlynedd. Ond ydych chi wir wedi bod yn gwneud hynny i mi?

⁶Na, fel pan dych chi'n yfed a gwledda, dych chi'n ei wneud i blesio'ch hunain!’

⁷Dyna'n union beth roedd yr ARGLWYDD yn ei ddweud drwy ei broffwydi bryd hynny [27†], pan oedd Jerwsalem a'r pentrefi o'i chwmpas yn ffynnu, a pobl yn byw yn y Negef i'r de a'r iseldir yn y gorllewin.”

⁸A dyma Sechareia'n cael neges arall gan yr ARGLWYDD.

⁹“Dyma mae'r ARGLWYDD holl-bwerus wedi bod yn ei ddweud, ‘Byddwch yn deg bob amser, yn garedig a thrugarog at eich gilydd.

¹⁰Peidiwch cam-drin gwragedd gweddwon, plant amddifad, mewnfudwyr a phobl dlawd. [28†] A peidiwch bwriadu drwg i unrhyw un arall.’

¹¹“Ond doedden nhw'n cymryd dim sylw. Roedden nhw'n hollol benstiff, ac yn gwrthod yn lân a gwrando.

¹²Roedd eu calonnau'n galed fel diemwnt [29†], nes eu bod yn gwrthod gwrando ar fy nysgeidiaeth, nac ar y negeseuon eraill roedd fy Ysbryd wedi eu rhoi i'r proffwydi cynnar yna eu cyhoeddi. A dyna pam wnaeth yr ARGLWYDD holl-bwerus dywallt ei lid arnyn nhw. “Dwedodd yr ARGLWYDD holl-bwerus.

¹³‘Pan oeddwn i'n galw arnyn nhw, doedden nhw ddim yn gwrando. Felly pan fyddan nhw'n galw arna i, fydda i ddim yn gwrando chwaith. [30†]

¹⁴Yn lle hynny bydda i'n eu hysgubo nhw i ffwrdd mewn storm i wledydd dieithr.’ “A dyna pam mae'r wlad yma'n anial, heb neb yn mynd a dod ynddi. Nhw sydd wedi gwneud y tir hyfryd yma yn anialwch diffaith!”