Read Gobaith i Gymru Deuteronomium 14 Bible Online

Deuteronomium 14 - Gobaith i Gymru bible

Deuteronomium 14

¹“Bobl Israel, chi ydy plant yr ARGLWYDD eich Duw. Felly peidiwch torri eich hunain â chyllyll neu siafio eich talcen pan dych chi'n galaru am rywun sydd wedi marw.

²Dych chi'n bobl sydd wedi eich cysegru i'r ARGLWYDD eich Duw. O bob cenedl ar wyneb y ddaear, mae e wedi eich dewis chi yn drysor sbesial iddo'i hun.

³“Peidiwch bwyta unrhyw beth sy'n ffiaidd.

⁴Dyma'r anifeiliaid sy'n iawn i'w bwyta: bustach, dafad, gafr,

⁵hydd, gasél, carw, gafr wyllt, orycs, antelop, a'r ddafad fynydd.

⁶“Gallwch fwyta unrhyw anifail sydd â charn fforchog ac sy'n cnoi cil.

⁷Ond peidiwch bwyta camel, ysgyfarnog, a broch y creigiau (Er eu bod nhw'n cnoi cil, does ganddyn nhw ddim carn fforchog, felly maen nhw i'w hystyried yn aflan.)

⁸A peidiwch bwyta cig moch (Er fod gan fochyn garn fforchog, dydy e ddim yn cnoi cil. Peidiwch hyd yn oed cyffwrdd mochyn sydd wedi marw!)

⁹“Gallwch fwyta unrhyw greaduriaid sy'n byw yn y dŵr sydd ag esgyll a cennau arnyn nhw,

¹⁰ond dim byd sydd heb esgyll a cennau — mae'r rheiny i'w hystyried yn aflan.

¹¹“Gallwch fwyta unrhyw aderyn sy'n lân yn seremonïol.

¹²Ond peidiwch bwyta'r rhain: eryr, fwltur, fwltur du,

¹³barcud, hebog, bwncath,

¹⁴gwahanol fathau o frain,

¹⁵estrys, tylluan, gwylan, a hebog o unrhyw fath,

¹⁶tylluan fach, tylluan gorniog, tylluan wen,

¹⁷y pelican, eryr y môr, bilidowcar,

¹⁸storc, gwahanol fathau o grëyr, copog, na'r ystlum chwaith.

¹⁹“Mae pryfed sy'n hedfan yn aflan hefyd. Peidiwch bwyta nhw.

²⁰Gallwch fwyta unrhyw aderyn sy'n lân yn seremonïol.

²¹Peidiwch bwyta corff unrhyw anifail neu aderyn sydd wedi marw ohono'i hun. Gallwch ei roi i'r bobl o'r tu allan sy'n byw yn eich pentrefi chi, neu ei werthu i estroniaid. Ond dych chi'n bobl wedi eu cysegru i'r ARGLWYDD eich Duw. “Peidiwch berwi cig gafr ifanc yn llaeth ei fam.

²²“Rhaid i chi wneud yn siŵr eich bod chi'n rhoi heibio ddeg y cant o gynnyrch eich tir bob blwyddyn.

²³Ac mae hwn i gael ei fwyta o flaen yr ARGLWYDD eich Duw yn y lle bydd e'n ei ddewis — deg y cant o'r ŷd, y sudd grawnwin, yr olew olewydd, a phob anifail cyntaf-anedig — gwartheg, defaid a geifr. Rhaid i chi ddysgu dangos parch at yr ARGLWYDD eich Duw bob amser.

²⁴“Pan fydd e'n eich bendithio, os ydy'r lle mae e wedi ei ddewis yn rhy bell,

²⁵gallwch werthu'r deg y cant o'ch cynnyrch, a mynd â'r arian gyda chi yn ei le.

²⁶Wedyn yno, gallwch brynu cig eidion, cig oen, gwin, cwrw, ac unrhyw fwyd arall dych chi eisiau.

²⁷Ond cofiwch ofalu am y rhai o lwyth Lefi sy'n byw yn eich pentrefi, gan nad oes ganddyn nhw dir fel y gweddill ohonoch chi.

²⁸“Bob tair blynedd rhaid i chi gymryd deg y cant o gynnyrch y flwyddyn honno, a'i storio yn eich pentrefi.

²⁹Bydd yno i'w ddefnyddio gan y rhai sydd o lwyth Lefi, y mewnfudwyr, y plant amddifad, a'r gweddwon yn y pentref. Wedyn bydd yr ARGLWYDD yn bendithio popeth fyddwch chi'n ei wneud.