Read Gobaith i Gymru Deuteronomium 6 Bible Online

Deuteronomium 6 - Gobaith i Gymru bible

Deuteronomium 6

¹“Dyma'r gorchmynion, y rheolau a'r canllawiau roddodd yr ARGLWYDD eich Duw i mi i'w dysgu i chi, er mwyn i chi eu cadw nhw yn y wlad lle dych chi'n mynd.

²Byddwch chi'n dangos parch at yr ARGLWYDD eich Duw drwy gadw ei reolau a'i orchmynion — chi, eich plant, a'ch wyrion a'ch wyresau. Cadwch nhw tra byddwch chi byw, a cewch fyw yn hir.

³Gwrandwch yn ofalus, bobl Israel! Os gwnewch chi hyn bydd pethau'n mynd yn dda i chi. Bydd eich niferoedd chi'n tyfu'n aruthrol, ac fel gwnaeth yr ARGLWYDD, Duw eich hynafiaid, addo i chi, bydd gynnoch chi wlad ffrwythlon lle mae llaeth a mêl yn llifo.

⁴“Gwranda Israel! Yr ARGLWYDD ein Duw ydy'r unig ARGLWYDD.

⁵Rwyt i garu'r ARGLWYDD dy Dduw â'th holl galon, ac â'th holl enaid a dy holl nerth.

⁶“Paid anghofio'r pethau dw i'n eu gorchymyn i ti heddiw.

⁷Rwyt i'w dysgu'n gyson i dy blant, a'i trafod nhw pan fyddi adre yn y tŷ ac i ffwrdd oddi cartref, pan fyddi'n mynd i gysgu ac yn codi yn y bore.

⁸Rhwyma nhw ar dy freichiau i dy atgoffa di, a gwisga nhw ar dy dalcen i'w cofio.

⁹Ysgrifenna nhw ar ffrâm drws dy dŷ, ac ar giatiau'r dref.

¹⁰“Roedd yr ARGLWYDD wedi addo rhoi gwlad i'ch hynafiaid, Abraham, Isaac a Jacob — lle mae dinasoedd mawr hardd wnaethoch chi ddim eu hadeiladu;

¹¹tai yn llawn pethau wnaethoch chi mo'i casglu; pydewau wnaethoch chi ddim eu cloddio; gwinllannoedd a choed olewydd wnaethoch chi mo'i plannu. Digon i'w fwyta!

¹²Pan fydd yr ARGLWYDD yn dod â chi i'r wlad yna, peidiwch anghofio'r ARGLWYDD wnaeth eich achub chi o wlad yr Aifft, lle roeddech chi'n gaethweision.

¹³Rhaid i chi barchu'r ARGLWYDD eich Duw, a'i wasanaethu e, a defnyddio ei enw e'n unig i dyngu llw.

¹⁴Peidiwch addoli duwiau'r bobl o'ch cwmpas chi.

¹⁵Cofiwch fod yr ARGLWYDD eich Duw, sydd gyda chi, yn Dduw eiddigeddus. Bydd e'n digio gyda chi ac yn eich gyrru chi allan o'r wlad.

¹⁶“Paid rhoi'r ARGLWYDD dy Dduw ar brawf, fel y gwnest ti yn Massa. [18†]

¹⁷Gwnewch yn union beth mae'n ei orchymyn i chi, cadw ei ofynion a dilyn ei ganllawiau.

¹⁸[18-19] Gwnewch beth sy'n iawn yn ei olwg, a bydd pethau'n mynd yn dda i chi. Bydd yr ARGLWYDD yn gyrru'ch gelynion chi allan a byddwch yn cymryd drosodd y wlad dda wnaeth Duw addo i'ch hynafiaid y byddai'n ei rhoi i chi.

²⁰Yna pan fydd eich plant yn gofyn i chi, ‘Pam wnaeth Duw roi'r gofynion a'r rheolau a'r canllawiau yma i ni?’

²¹atebwch, ‘Roedden ni'n gaethweision y Pharo yn yr Aifft, ond dyma'r ARGLWYDD yn defnyddio ei nerth rhyfeddol i ddod â ni allan o'r Aifft.

²²Gwelon ni e'n gwneud pethau ofnadwy i wlad yr Aifft ac i'r Pharo a'i deulu — gwyrthiau rhyfeddol.

²³Gollyngodd ni'n rhydd er mwyn rhoi i ni'r wlad roedd e wedi ei haddo i'n hynafiaid.

²⁴Dwedodd wrthon ni am gadw'r rheolau yma i gyd, a'i barchu e, er mwyn i bethau fynd yn dda i ni, ac iddo'n cadw ni'n fyw fel mae wedi gwneud hyd heddiw.

²⁵Bydd pethau'n iawn gyda ni os gwnawn ni gadw'r gorchmynion yma fel mae'r ARGLWYDD wedi gofyn i ni wneud.’