Read Gobaith i Gymru Philipiaid 2 Bible Online

Philipiaid 2 - Gobaith i Gymru bible

Philipiaid 2

¹Os ydy perthyn i'r Meseia yn anogaeth o unrhyw fath i chi; os ydy ei gariad o unrhyw gysur i chi; os ydy'r Ysbryd yn eich clymu chi'n un, ac yn eich gwneud yn llawn tosturi ac yn garedig

²— yna gwnewch fi'n wirioneddol hapus drwy rannu'r un agwedd meddwl, dangos cariad at eich gilydd, a bod yn un o ran ysbryd a phwrpas.

³Peidiwch bod am y gorau i fod yn bwysig, nac yn llawn ohonoch chi'ch hunain. Byddwch yn ostyngedig, a pheidio meddwl eich bod chi'n well na phobl eraill.

⁴Meddyliwch am bobl eraill gyntaf, yn lle dim ond meddwl amdanoch chi'ch hunain.

⁵Dylai eich agwedd chi fod yr un fath ag agwedd y Meseia Iesu:

⁶Roedd e'n rhannu'r un natur â Duw, heb angen ceisio gwneud ei hun yn gydradd â Duw;

⁷ond dewisodd roi ei hun yn llwyr i wasanaethu eraill, [3] a gwneud ei hun yn gaethwas, a dod aton ni fel person dynol — roedd yn amlwg i bawb ei fod yn ddyn.

⁸Yna diraddio ei hun fwy fyth, a bod yn ufudd, hyd yn oed i farw — ie, trwy gael ei ddienyddio ar y groes.

⁹Felly dyma Duw yn ei ddyrchafu i'r safle uchaf; a rhoi'r enw pwysica un iddo!

¹⁰ Bydd pob glin yn plygu i enw Iesu — pawb yn y nefoedd, ar y ddaear, a than y ddaear;

¹¹ a bydd pawb yn cydnabod [4†] mai Iesu Grist ydy'r Arglwydd, ac yn rhoi clod i Dduw y Tad.

¹²Felly, ffrindiau annwyl, fel roeddech chi'n ufudd pan oeddwn i acw gyda chi, mae'n bwysicach fyth eich bod chi'n ufudd pan dw i'n absennol. Gyda pharch a defosiwn i Dduw daliwch ati i weithio ar eich iechyd ysbrydol fel cymuned.

¹³Mae Duw ar waith yn eich bywydau chi, yn creu'r awydd ynoch chi ac yn eich galluogi chi i wneud beth sy'n ei blesio fe.

¹⁴Gwnewch bopeth heb gwyno a ffraeo,

¹⁵er mwyn i chi dyfu fel plant i Dduw, yn byw bywydau glân a di-fai yng nghanol cymdeithas o bobl droëdig ac ystyfnig. [5†] Byddwch fel sêr yn disgleirio yn yr awyr

¹⁶wrth i chi rannu'r neges am y bywyd newydd gydag eraill. Wedyn pan ddaw y Meseia yn ôl, bydda i yn gallu bod yn falch ohonoch chi. Bydda i'n gwybod na fuodd yr holl redeg a'r gwaith caled yn wastraff amser.

¹⁷Mae'n bosib iawn y bydda i'n marw fel merthyr, a'm gwaed i'n cael ei dywallt fel diodoffrwm ar aberth y gwasanaeth ffyddlon dych chi'n ei gyflwyno i Dduw. Os mai dyna sydd i ddigwydd, dw i'n hapus, ac am rannu fy llawenydd gyda chi.

¹⁸A dylech chithau hefyd fod yn hapus, i mi gael rhannu eich llawenydd chi.

¹⁹Dw i'n gobeithio anfon Timotheus atoch chi'n fuan, os bydd yr Arglwydd Iesu yn caniatáu hynny, er mwyn cael newyddion amdanoch chi fydd yn codi nghalon i.

²⁰Does gen i neb tebyg i Timotheus. Mae'n teimlo'n union fel dw i'n teimlo — mae ganddo'r fath gonsýrn drosoch chi.

²¹Poeni amdanyn nhw eu hunain mae pawb arall, dim am beth sy'n bwysig i Iesu Grist.

²²Ond mae Timotheus yn wahanol, mae wedi profi ei hun yn wahanol. Mae wedi gweithio gyda mi dros y newyddion da, fel mab yn helpu ei dad.

²³Felly dw i'n gobeithio ei anfon atoch chi cyn gynted ag y ca i wybod beth sy'n mynd i ddigwydd i mi.

²⁴Ac ydw, dw i wir yn hyderus y bydd yr Arglwydd yn caniatáu i minnau ddod i'ch gweld chi'n fuan!

²⁵Ond yn y cyfamser dw i wedi bod yn teimlo bod rhaid i mi anfon Epaffroditws yn ôl atoch chi — brawd ffyddlon arall sy'n gydweithiwr ac yn gyd-filwr dros achos Iesu. Chi wnaeth ei anfon e i'm helpu i pan roeddwn i angen help.

²⁶Mae wedi bod yn hiraethu amdanoch chi, ac yn poeni'n fawr eich bod wedi clywed ei fod wedi bod yn sâl.

²⁷Mae'n wir, roedd e'n wirioneddol sâl. Bu bron iddo farw. Ond buodd Duw'n garedig ato — ac ata i hefyd. Petai e wedi marw byddwn i wedyn wedi cael fy llethu gan fwy fyth o dristwch.

²⁸Dyna pam dw i mor awyddus i'w anfon yn ôl atoch chi. Dw i'n gwybod y byddwch chi mor llawen o'i weld, a fydd dim rhaid i mi boeni cymaint.

²⁹Felly rhowch groeso brwd iddo. Dylid anrhydeddu pobl debyg iddo,

³⁰achos bu bron iddo farw wrth wasanaethu'r Meseia. Mentrodd ei fywyd er mwyn fy helpu i, a gwneud ar eich rhan chi beth roeddech chi'n methu ei wneud eich hunain.