Read Gobaith i Gymru 1 Thesaloniaid 5 Bible Online

1 Thesaloniaid 5 - Gobaith i Gymru bible

1 Thesaloniaid 5

¹A does dim rhaid i ni ysgrifennu dim i ddweud pryd yn union fydd hyn i gyd yn digwydd. Dych chi'n gwybod yn iawn.

²Bydd yr Arglwydd yn dod yn ôl yn gwbl annisgwyl, fel mae lleidr yn dod yn y nos. [5†]

³Bydd pobl yn dweud, “Mae pethau'n mynd yn dda,” a “Dŷn ni'n saff,” ac yn sydyn bydd dinistr yn dod. Bydd yn dod mor sydyn â'r poenau mae gwraig yn eu cael pan mae ar fin cael babi. Fydd dim dianc!

⁴Ond dych chi ddim yn y tywyllwch, ffrindiau, felly ddylai'r diwrnod hwnnw ddim dod yn annisgwyl fel lleidr yn eich profiad chi.

⁵Plant y goleuni ydych chi i gyd! Plant y dydd! Dŷn ni ddim yn perthyn i'r nos a'r tywyllwch.

⁶Felly rhaid i ni beidio bod yn gysglyd fel pobl eraill. Gadewch i ni fod yn effro ac yn sobr.

⁷Mae pobl yn cysgu yn y nos, ac mae pobl yn meddwi yn y nos.

⁸Ond dŷn ni'n perthyn i'r dydd. Gadewch i ni fyw'n gyfrifol, wedi'n harfogi gyda ffydd a chariad yn llurig, a'r gobaith sicr y cawn ein hachub yn helmed. [6†]

⁹Dydy Duw ddim wedi bwriadu i ni gael ein cosbi, mae wedi dewis ein hachub ni drwy beth wnaeth yr Arglwydd Iesu Grist.

¹⁰Buodd e farw yn ein lle ni, er mwyn i ni gael byw gydag e am byth — ie, ni sy'n dal yn fyw a hefyd y rhai sydd wedi marw.

¹¹Felly calonogwch eich gilydd, a daliwch ati i helpu'ch gilydd.

¹²Ffrindiau annwyl, dŷn ni am i chi werthfawrogi'r bobl hynny sy'n gweithio'n galed yn eich plith chi. Maen nhw'n gofalu amdanoch chi ac yn eich dysgu chi sut i fyw yn ffyddlon i'r Arglwydd.

¹³Dylech chi wir eu parchu nhw a dangos cariad mawr tuag atyn nhw o achos y gwaith maen nhw'n ei wneud. Dylech fyw'n heddychlon gyda'ch gilydd.

¹⁴A ffrindiau annwyl, dŷn ni'n apelio ar i chi rybuddio'r bobl hynny sy'n bod yn ddiog, annog y rhai sy'n ddihyder, helpu'r rhai gwan, a bod yn amyneddgar gyda phawb.

¹⁵Peidiwch gadael i bobl dalu'r pwyth yn ôl i eraill. Ceisiwch wneud lles i'ch gilydd bob amser, ac i bobl eraill hefyd.

¹⁶Peidiwch byth â stopio gorfoleddu!

¹⁷Daliwch ati i weddïo.

¹⁸Byddwch yn ddiolchgar beth bynnag ydy'ch sefyllfa chi. Dyna sut mae Duw am i chi ymddwyn, fel pobl sy'n perthyn i'r Meseia Iesu.

¹⁹Peidiwch bod yn rhwystr i waith yr Ysbryd Glân.

²⁰Peidiwch wfftio proffwydoliaethau.

²¹Dylech bwyso a mesur pob un, a dal gafael yn beth sy'n dda.

²²Cadwch draw oddi wrth bob math o ddrygioni.

²³Dw i'n gweddïo y bydd Duw ei hun, y Duw sy'n rhoi heddwch dwfn i ni, yn eich gwneud chi'n berffaith lân, ac y bydd y person cyfan — yn ysbryd, enaid a chorff — yn cael ei gadw'n ddi-fai ganddo nes daw ein Harglwydd Iesu Grist yn ôl.

²⁴Mae'r Duw sy'n eich galw chi yn ffyddlon, a bydd yn gwneud hyn.

²⁵Gweddïwch droson ni, ffrindiau.

²⁶Cyfarchwch eich cyd-Gristnogion yn llawn cariad.

²⁷Dw i'n eich siarsio chi ar ran yr Arglwydd ei hun i wneud yn siŵr fod y Cristnogion i gyd yn clywed y llythyr yma yn cael ei ddarllen.

²⁸Dw i'n gweddïo y byddwch chi'n profi'r haelioni rhyfeddol mae ein Harglwydd Iesu Grist yn ei roi i ni.