Read Gobaith i Gymru Barnwyr 10 Bible Online

Barnwyr 10 - Gobaith i Gymru bible

Barnwyr 10

¹Ar ôl i Abimelech farw dyma Tola, mab Pwa ac ŵyr Dodo, yn codi i achub Israel. Roedd yn perthyn i lwyth Issachar ac yn byw yn Shamîr ym mryniau Effraim.

²Bu'n arwain Israel am ddau ddeg tair o flynyddoedd. Pan fu farw cafodd ei gladdu yn Shamîr.

³Ar ôl Tola dyn o'r enw Jair o Gilead wnaeth arwain Israel am ddau ddeg dwy o flynyddoedd.

⁴Roedd gan Jair dri deg o feibion ac roedd gan bob un ohonyn nhw ei asyn ei hun [23], ac roedd pob un yn rheoli tref yn Gilead. Mae'r trefi yma yn Gilead yn dal i gael eu galw yn Hafoth-jair [24] hyd heddiw.

⁵Pan fuodd Jair farw cafodd ei gladdu yn Camon.

⁶Dyma bobl Israel unwaith eto yn gwneud beth oedd yn ddrwg yng ngolwg yr ARGLWYDD. Dyma nhw'n addoli delwau o Baal a'r dduwies Ashtart, a duwiau Syria, Sidon, Moab, yr Ammoniaid a'r Philistiaid. Roedden nhw wedi troi cefn ar yr ARGLWYDD a stopio'i addoli e!

⁷Roedd yr ARGLWYDD yn wirioneddol flin gyda phobl Israel. Dyma fe'n gadael i'r Philistiaid a'r Ammoniaid eu rheoli nhw.

⁸Roedden nhw'n curo a cham-drin pob Israel yn ddidrugaredd. Roedd pobl Israel oedd yn byw ar dir yr Amoriaid i'r dwyrain o'r Afon Iorddonen (sef Gilead), wedi dioddef am un deg wyth o flynyddoedd.

⁹Yna dyma'r Ammoniaid yn croesi'r Iorddonen i ymladd gyda llwythau Jwda, Benjamin ac Effraim. Roedd hi'n argyfwng go iawn ar Israel.

¹⁰A dyma bobl Israel yn gweiddi ar yr ARGLWYDD a dweud, “Dŷn ni wedi pechu yn dy erbyn di! Dŷn ni wedi troi cefn ar ein Duw ac addoli delwau Baal.”

¹¹A dyma'r ARGLWYDD yn dweud, “Yr Eifftiaid, yr Amoriaid, yr Ammoniaid, y Philistiaid,

¹²y Sidoniaid, yr Amaleciaid, y Midianiaid [25] … mae pob un ohonyn nhw wedi eich cam-drin chi. A pan oeddech chi'n gweiddi arna i am help, roeddwn i'n eich achub chi.

¹³Ond dw i ddim yn mynd i'ch achub chi eto. Dych chi wedi troi cefn arna i a mynd ar ôl duwiau eraill.

¹⁴Ewch i weiddi ar eich duwiau eich hunain — cân nhw eich helpu chi!”

¹⁵Ond dyma bobl Israel yn dweud, “Dŷn ni wedi pechu. Ti'n iawn i'n cosbi ni. Ond plîs achub ni heddiw!”

¹⁶Yna dyma pobl Israel yn cael gwared â'r duwiau eraill oedd ganddyn nhw a dechrau addoli'r ARGLWYDD eto. Yn y diwedd roedd yr ARGLWYDD wedi blino gweld pobl Israel yn dioddef.

¹⁷Dyma byddin yr Ammoniaid yn paratoi i fynd i ryfel ac yn gwersylla yn Gilead. A dyma byddin Israel yn gwersylla yn Mitspa.

¹⁸Dyma arweinwyr Gilead yn gofyn, “Pwy sy'n barod i arwain yr ymosodiad yn erbyn byddin yr Ammoniaid? Bydd y person hwnnw'n cael ei wneud yn llywodraethwr ar Gilead!”