Read Golin Matyu 10 Bible Online

Matyu 10 - Golin bible

Matyu 10

¹Ena Yesu gawlima kobe anan kole kole muru kawnan milin sutan, “Wo,” di gala dire u ku bilere, sia ibal den miriin suna milungwa maa si mena erama dire, te nibil te nimbona erungwa main main para, aa te wai ere tenama dire yobilaan bile gawlima kobe tongwa.

²Tongure Yesu nusi erungwa ongwa yal kobe Aposel, kaan iru paangwa. Ta goma Saimon kaan ta Pita, ta Pita kebin Endiru, te Sebedi wan su Yemis te yalini kebin Yon,

³ta Pilipi, ta Batolomiu, ta Tomas, ta kobile moni takis ingwa yal Matyu, ta Alpias wan Yemis, ta Tadias.

⁴Ta yobilaan bilungwa yal kaan Saimon, ta Yesu bale taal sungwa yal kaan Yudas Isikerio, kaan iru paangwa. Yesu gawliman kobe anan kole kole muru kawnan milin sutan konagi ere tongwa (Mak 6:7-13; Luk 9:1-5)

⁵Ena yal anan kole kole muru kawnan milin sutan i Yesu nusi erere, kile kaman ka iru di tongwa, “Yuda ibal milekungwa gariba gul, te Sameria ibal ogu ai, pikio.

⁶Pikinanba bolima siipe siipe baan ta ongure, kobaan kanekungwa mere Isirel ibal kobe iru milungwa, ena yalin kobe milungwa gul po.

⁷Pire iru kere di to, ‘God kenin ere ke milangwa kaun u maala omua,’ da.

⁸Nibil erungwa ibal kobe aa te wai ere to. Gulungwa ibal kobe u kwi nama dire ulin yuyo. Seki egilungwa ibal kobe gain wiige sinama dire, aa te wai ere to. Sia maa si mena ero. Na kalkan i yal kobe imore i tobinga mere konagi imore ere tenana po.

⁹Kobile moni bil te mege para, gal gule ire warekio.

¹⁰Komina baan nenanga, te galsuna sutan te kawn tobilin te goliba kal i, para ire pikio. Ibal konagi erungwa kalkan i nenanga tenangwa paamua.”

¹¹Ena ogu ai bil mo mege pi bawa dingire, ena yal ta i bole ka diduwaire milanga waa duu kananga ena i mile payo. Ogu taw kebe yekio.

¹²Pi ogu ala nanga, ‘Yalkuno, mile dinio,’ iru di to.

¹³Ogu kobaan kobe i aa tekun ere i tenangwa ena, ‘Yalkuna,’ ka dinga i painamua. Painamba ogu kobaan kobe i aa tekun ere i tekinangwa ena ‘Yalkuna,’ ka dinga i paikinamua.

¹⁴Ena ogu kobaan ibal kobe, te ogu ai ta i aa tekun erekire, te ka dinanga pirekire, ibal iru erangwa ena ai i pisere guman yaa tere kal iru eringire, nomanin sire main piramua.

¹⁵Kawen dirala nomanin si piro. God ibal para ka kol ere tenangwa kaun, Sodom te Gomora ibal digan wen mile gain giil piramba, i aa tekun ere tekungwa ibal kobe, gain giil bil wen piramua.” Giil pire tenangwa kaun u maribe nangwa

¹⁶“Ena piro. I bolima siipe siipe milungwa mere i iru milinwa. Milinba na i awi ele paangwa suna nusi eriwa. Eriga oniba monaan dire warungwa mere, i iru waro. Te kauba ta omilin kabin gule amane yere mone di milungwa mere milo.

¹⁷I yal kobe kanekun ere milo. Ibal kobe i awli ka kol pire i tere, Yuda ka main ogu ala kuba aa tere i sinamua.

¹⁸I yal kobe pire gi di na tenga ena yal bil, te yal singaba milungwa gul gure pala dire ka kol ere i tenamba, na ka main wo di yalin kobe te Yuda milekungwa ibal tenanwa.

¹⁹Ibal kobe ka kol pirama dire awli pi singaba tenangure, ‘Tawa dirale?’ di pire, i nomanin si gogo erekio. Kamin kaun i u bawa dinangure i dirala dinanga ka i God di i tenamua.

²⁰Ena kaun i ka dinanga i inin ka imore giran mina dinanba, i Abe God, yalini Iban nusi i nomanin suna erangure, ka giranin wiina eranwa.

²¹“Kebinbi si gulama dire abinbi bale taal sinamua. Nen para iru gawlin kobe ere tenamua. Nen man kobe si gulama dire, gawlin kobe den gule tere, bale taal sinamua.

²²I pire gi di na tenga ibal para den gule i tenamua. Tenamba, i ka main aa gi di milangal milanga, ena God aa ki di i tenangure sigare kule u wai pi milanwa.

²³Ogu ai ta giil pire i tenangwa ena si ere ai baan ta po. Isirel ogu ai para muru, ka main kere di piserekinangire, Na U Ibal Obinga Yal na kaya uralwa.

²⁴“Ka nil sungwa gaan kobe, ka nil si tongwa yal yaa ime ta sinangwa, tamama. Te nil konagi yal, singaba yal yaa ime ta sinangwa, tamama.

²⁵Iru paimia ena nil sungwa gaan kobe mile, nil si tongwa yal milungwa mere milala di pirangwa milamia, te nil konagi yal mile, na singaba yal milungwa mere milala di pirangwa milamia. Ena ibal kobe mile, ‘Sia yal bil kaan Bielsebul milinwa,’ iru di yal singaba ta tomia, ena gain ka bil si yalini gawliman kobe tenamua. Ibal God taran kuril pire tenangwa (Luk 12:2-7)

²⁶“Tenamba i kuril ta pirekio. Kalkan si alibe erungwa, eme aw di u maribe nangwa paamua. Te aal kule paangwa muru eme u maribe nangwa paamua.

²⁷Ka dibinga i aal kule di i tega, i bolin kule di maribe eranwa. Te i ogu ala di i tega, malge pire gala di maribe eranwa.

²⁸Yal ta i sirala dire unangure kuril pirekio. Yal ta iwe, i ibanin para ta si gulekinangwa paamua, gaynin taran si gulamua. Dibinba God iwe, i ibanin te gaynin para, enderin gaul ai si gulangwa paamia, ena yalini kuril pire to.

²⁹Kauba dauna sutan i gibilin sirala erungwa kobile baa, toea taranta tenba, Abe mile kauba dauna taran i milama di pirangwa i milamua, te gulama di pirangwa i gulamua.

³⁰Iru dungwa iwe, i gibiliniigin para wen God kere pire pol simua.

³¹Simia ena i kuril ta pirekio. God kauba kenin ere milimba, i kenin wai wen ere i te milemua. Ibal Yesu kaan di maribe erangwa (Luk 12:8-9)

³²“Yal ta ibal milungwa mabin mina mile, ‘Na Yesu gawliman miliwa,’ dinangwa ena na Abe kamin mina milungwa yalini mabin mina yal ta i, kaan di maribe eralga paimua.

³³Yal ta ibal milungwa mabin mina mile, na ka di kile di mena ere na tenangwa, ena na Abe kamin mina milungwa yalini mabin mina yal ta i, ka di kile di mena ere yalini teralga paimua. Yesu ungwa kaun ibal guman inin inin dinama dire ungwa (Luk 12:51-53; 14:26-27)

³⁴“Na uga main iwe, ibal kobe bole pena gale milama di iru nomanin si pirekio. Ibal kobe bole pena gala milama dire ukiwa. Ibal kobe guman inin inin dinama dire wiwa.

³⁵Nen wan guman inin inin dinama dire te man abin guman inin inin dinama dire, kolin ain guman inin inin dinama dire wiwa.

³⁶Iru painamia ena yal ta kaymin wen ibal yalini gawliman suna milamua.

³⁷Ibal kobe wai pire na tenangwa wai dinamba, ibalin kobe wai wen pire nen man tere, na pire gibilan mui kol yenangwa ena na gawlimanan kobe milangwa ta paikinamua. Ibal kobe wai pire na tenangwa wai dinamba, ibalin kobe wai wen pire wan abilin kobe tere, na pire gibilan mui kol yenangwa, ena na gawlimanan kobe milangwa ta paikinamua.

³⁸Ibal kobe na giil pire gulabinga mere yalini giil pire gulekire na duulin bilekenangwa, ena na gawlimanan kobe milangwa ta paikinamua.

³⁹Yal ta inin gain pire tere mile painangwal painangwa nomanin tegi dire aa gi di pirangwa, ena u main namua. Na inan miliga pire yal ta yaa ime si milangwa, ena yalini mile painangwal painamua. Ibal tobe wai inangwa (Mak 9:41)

⁴⁰“Yal ta aa te wai ere i tenangwa mere, ena yalini para aa te wai ere na tenamua. Te yal ta aa te wai ere na tenangwa, ena yalini aa te wai ere yal ta na nusi erungwa yal i tenamua.

⁴¹God ka kebe yal tobe inamua. Te yal ta mile, ‘Yalini God ka kebe yal milemua,’ di pire aa te wai ere tenangwa, ena ka kebe yal tobe inangwa mere yal ta i para iru inamua. Kabin sire wai wen milungwa yal tobe inamua, te yal ta mile, ‘Yalini kabin sire wai wen milemua,’ di pire aa te wai ere tenangwa, ena kabin sire wai wen milungwa yal tobe inangwa mere yal ta i para iru inamua.

⁴²Na kawen dirala piro. Yal ta mile, ‘Yalini Yesu gawlima kobe milemua,’ di pire nil kule Yesu gawliman u maribe pekungwa yal ta i tenangwa, ena tobe irala eremua,” dungwa.