Read Golin Matyu 23 Bible Online

Matyu 23 - Golin bible

Matyu 23

¹Ena Yesu kwi ainere iru di ibal taminin te gawlima kobe tongwa,

²“Yuda ka main nil si tongwa yal kobe, te Parasi kobe bole, pi Mose kile kaman ka konagi erungwa ain omua.

³Omia ena Mose kile kaman ka di i tongwa mere, kuunin ere wiina ero. Iru eranba kal erungwa mere i iru ta erekio. Kile kaman ka di i tomba, inin wiina erekimua.

⁴Yalin kobe kal obin dongwa kine ibal tomba, sinege ere aa ki di ibal kobe ta tekemua.

⁵Kalkan erungwa iwe, ibal kobe para na wai milama di pire ere milemua. Yalin kobe ka main minin ganin piapa binanbile bilungwa dain bile maabinin mina, te aan kiibaan ale kan si ere warungwa, i kanina. Te galsuna araway sigi di warungwa, para kanina.

⁶Komina bil nongure, yalin kobe duul kaal kule aa te wai ere tongure milere, te ka main ogu ala pirere, singaba bol kaana amin di milemua.

⁷U ku bilungwa gul ongure, ‘Singabo,’ di gala dire te ‘Nil si tongwa yalo,’ di tongure wai pire miinin maamua.

⁸Maamba i yal kobe ke kuunin milungure, te nil si i tongwa yal na taran wen milebinga, ena ‘Nil si tongwa yalo,’ di i tenangwa ta paikimua.

⁹‘Na Abe taran kamin mina milemua,’ dingi ena gariba gul yal ta, ‘Na abe,’ di tekio.

¹⁰I yal kobe singaba taran wen, na God konagi erungwa yal Kirisito milebinga, ena ‘Singabo,’ di i tenangwa ta paikimua.

¹¹Milinga gul yal ta singaba milama di pirangwa, ena yalini nil konagi yal mile konagi ere gawlima kobe tenamua.

¹²Yal ta mile, ‘Na yal singaba mile goma yerabina,’ di pirangwa u main nangwa paamba, yal ta mile, ‘Na yal digan mile u main nala,’ di pirangwa, singaba mile goma yenamua,” dungwa. Yuda ka main nil si tongwa yal kobe te Parasi kobe kal nigi dongwa erungwa, Yesu kawre di tongwa (Mak 12:40; Luk 11:39-42, 44, 52; 20:47)

¹³“Yuda ka main nil si tongwa yal kobe te Parasio, i miriin kaale tongwa yal milingiwe. God kenin ere ke milungwa ai sipere dire i ala pekire, te ibal ala nala di omba, i manaa di tenga ena gain giil piranwa.

¹⁴[Yuda ka main nil si tongwa yal kobe te Parasio, i miriin kaale tongwa yal milingiwe. Abal weray kal yongwa i bawle tere girin di aa te nerere, ana baan araway dire ere miriin kaale tenwa. Iru tenga iwe, goma kal ki ere milinga giil pire tenamba, malia kal ki ere milinga i, giil bil pire i tenangwa paamua.]

¹⁵“Yuda ka main nil si tongwa yal kobe te Parasio, i miriin kaale tongwa yal milingiwe. Ibal ta ibalin kobe ka main pisere, i inin ka main duulin bile warama di piringi, pire nega di warinwa. Ibal ta i, i duulin bile warangwa, ena i enderin gaul ai nanga mere ibal ta i kirara namua. Nangwa ena gain giil piranwa.

¹⁶“Ibal awli enga yal kobo, omilin gi dungwa milingiwe. Ayo, i gain giil piranwa. Ka nil si tengi, i iru dinga, ‘Yal ta Yuda ka main ogu bil pire maabin mina sire, kal ta iru eralwa dinangwa, ka milin ta paikimua,’ dingiray. Dinba, ‘Ka main ogu bil ain yobilagi gol egin galungwa pire maabin mina sire, kal ta eralwa dinangwa, ena milin paamua,’ dingiray.

¹⁷Iru pirina, nomanin paikungwa ibal du milinwa. Ka main ogu bil kegemama yomba, ain yobilagi gol iwe, kalkan imore dimua. Dimba ain yobilagi gol ka main ogu egin gale tomia, ena ain yobilagi gol para kegemama yomua. Iru paangwa ena takal maa yebe ome? Ain yobilagi gol maa yebe om mo, ka main ogu bil maa yebe ome?

¹⁸Ena i yal kobe para iru nil si tenga, ‘Ka main ogu bil ala kalkan God tongwa bol pire maabin mina sire, kal ta iru eralwa dinangwa, ka milin ta paikimua,’ dingiray. Dinba, ‘Bol iray kalkan i bolimina yongwa pire maabin mina sire, kal ta iru eralwa dinangwa, milin paamua,’ dingi.

¹⁹Iru pirina nomanin paikungwa yal milinwa. Ka main ogu bil bol iray kegemama yomba, kalkan tongwa iwe, kalkan imore dimua. Dimba kalkan God tere bol iray bolimina yomia, ena kalkan i para kegemama yomua. Iru paangwa ena takal maa yebe ome? Kalkan bol iray bolimina yongwa maa yebe om mo, bol iray maa yebe ome?

²⁰Ena yal ta bol iray pire maabin mina sire, ‘Iru eralwa,’ dinangwa, ena kalkan bolimina dungwa para pire maabin mina aa taw simua.

²¹Te yal ta ka main ogu bil pire maabin mina sire, ‘Iru eralwa,’ dinangwa, ena God ogu alia pai milungwa para pire maabin mina aa taw simua.

²²Te yal ta kamin mina pire maabin mina aa taw sire, ‘Iru eralwa,’ dinangwa, ena God pai milungwa gul God inin milungwa bole para pire maabin mina aa taw simua.

²³“Yuda ka main nil si tongwa yal kobe te Parasio, miriin kaale tongwa yal milingiwe. Komina kaa kawi sinangwa kal i taw anan kole kole muru yere, taranta God tenwa. Kal i megemaaga mere tenba, kile kaman ka u maribe ongwa nomanin si ala ere wiina ere tekinwa. Kile kaman ka u maribe ongwa iru paamia. Ibal kenin ere tere, te miriin wen pire tere, te aa te wai ere tere, kal iru paangwa mere kuunin ere wiina ere tenanba, ka megemaaga iray para wiina ere tenanwa.

²⁴Ibal awli enga yal kobo, omilin gi dungwa milingiwe. Kile kaman ka megemaaga wiina ere tenba, kile kaman ka bil iwe, pisere, wiina ere tekingi. Komina nenana dire ulgu komina si dangwa piserinba, bile yaangwa muru ne yugu dinga mere, kile kaman ka iru wen pire erinwa. Eringa gain giil piranwa.

²⁵“Yuda ka main nil si tongwa yal kobo te Parasio, i miriin kaale tongwa yal milingiwe. I sin kabe te pele bala mena kol bigin singa mere, i gaynin bigin sinwa. Sinba kakiibi dire kunibe nere, nomanin gule daalin simua. Simia ena gain giil piranwa.

²⁶Parasio, omilin gi dungwa yal milingiwe. Goma i nomanin suna bigin sinanga, ena gaynin para wai dirala eremua.

²⁷“Yuda ka main nil si tongwa yal kobo te Parasio, i miriin kaale tongwa yal milingiwe. Gal pege mere sigi di waringire, ibal mile wai wen milema di i kanimba, i nomanin suna gule daalin simua.

²⁸Ibal i kanere i kabin si wai wen milema di kanimba, i nomanin suna kakiibi dire, kal nigi dongwa taalime ere milinwa. Milinga ena gain giil piranwa. Yuda ka main nil si tongwa yal kobe te Parasi kobe, gain giil bil piramua, Yesu dungwa (Luk 11:47-51)

²⁹“Yuda ka main nil si tongwa yal kobo, te Parasio, i miriin kaale tongwa yal milingiwe. God ka kebe yal kobe gulungwa, kobile giraan ai wai dungwa ere yere, te kabin sire wai wen milungwa ibal kobe gulungwa, maul wo yere ogu wai ki tere

³⁰ena iru dingi, ‘Na yal kobe kama kaya sanamoi gilekume milungwa kaun i milebinga, yalin kobe God ka kebe yal si gulungwa mere, ta si gulekirabinwa,’ iru di piringi.

³¹Iru di pirina, ena God ka kebe yal sungwa ibal kobe, i yalin kobe gawlin milinga di maribe erinwa.

³²Eringa, ena i sanamoi gilekume kal digan ere taalime erere pirin bil paangwa mere, malia i para iru erana po mo.

³³I oniba gawlin milinga mere ibal digan milinwa. God ibal para ka kol ere tenangwa kaun iwe. Na pirin ta paikire, enderin de paangwa ai pekerala di pirino? Pisere, ere nanwa.

³⁴I iru erana ka di terala i piro. Ka kebe yal, te nomanin paangwa yal, te ka main nil si tongwa yal para iru nusi ere i terabinwa. Terabingire, taw ire si gulere, taw eri pera mina bili sirere, taw i ka main ogin ala kuba sirere, taw baan si kiranin bile sirere,

³⁵i iru ere yalin kobe tenanga ena kama kaya kabin sire wai wen milungwa ibal si gulungwa, God pirin pai i tenamua. Goma yal ta kaan Ebel si gulemia. Si gule ongwa ongwa eme Berekaya wan Sekaraya si gulungwa iwe. Ka main ogu bil malge pire ka main ogu bil iray, te kalkan God tongwa bol kalin sui i kole kole ere baan suna si gulemua.

³⁶Kama kaya si gulimba, ibal malia maalungwa pirin para wen pai i tenamua. Tenangure gain giil bil piramua. Na kawen di i teiwa,” dungwa. Yesu Yerusalem ibal den miriin tongwa (Luk 13:34-35)

³⁷“Ayo, Yerusalem ibal we, Yerusalem ibal we, God ka kebe yal si gulere, ka main ibal nusi ere i tongwa para, kobile milin aa tere si gulinwa. Abal korale kain kel bile gawlin i ala erungwa mere, na Yerusalem ibal kobe para iru di u ku bilere irabinba, i girin dire manaa dinwa.

³⁸Dina ena u sutaw nangure ogin po dinamua.

³⁹Maliaga i ibal kobe na kaninba, eme kwi na ta kanekinanwa. Kanekinanba i ibal kobe mile, ‘God ka dungwa kebe ere yuungwa, God miriin pai yal i tenamua,’ dinanga kaun i, na kwi kananwa. Di i teya ere gule piro,” dire Yesu iru dungwa.