Read Golin Matyu 26 Bible Online

Matyu 26 - Golin bible

Matyu 26

¹Ena Yesu ka nil si tongwa i, para wen di wei sire, iru di gawlima kobe tongwa,

²“Are kaun sutan wei sinangwa ena Yuda nen bolima siipe siipe sungure, God yalin kobe ta sekungwa kaun erin bil mile, komina bil nerabinwa. Nerabingire ibal kobe Na U Ibal Obinga Yal na kanin sire, eri pera mina na si gulama dire, awli ibal tenamua,” dungwa.

³Ena ka main kenin erungwa yal bil kobe te Yuda ka main yal singaba kobe bole, u ku bile kenin erungwa yal bil kaan Kayapas, ogin milungwa.

⁴Milere Yesu aal kule kanin sire si gulabina dire, diria ere pirungwa.

⁵Pirimba iru dungwa, “Komina bil kiire erin kaun milungure Yesu kanin sirabinba ibal kobe kura bil bile wi yau dinamua,” dire kane unin si milungwa. Abal ta wel garu dire bile Yesu tongwa (Mak 14:3-9; <a href='B:500 12:1'>Yon 12:1-8)

⁶Yesu Betani ai pire Saimon goma seki egile milungwa, malia gain wiige sungure milungwa, Yesu yalini ogin ala milungure,

⁷abal ta ure wel niriin minanin wai wen sungwa tobe bil bilungwa, mugu dil ali yuure Yesu komina ne milungwa, garu di Yesu gibilin mina bile tongwa.

⁸Tongure gawlima kobe kanere nigi de wen pirere, iru di tongwa, “Tameran imore garu di bile tome?

⁹Wel niriin i tobe bilkaw bilungwa, irabinga kul gal bona aa te nekungwa ibal obin si terabinba.”

¹⁰Dungwa i, Yesu pirere iru di tongwa, “Tameran nigi de pire tene? Abalini kal wai wen ere na tomua.

¹¹Kul gal bona aa te nekungwa ibal, i bole para morin milamba, na i ibal kobe bole baan araway ta milekerabilwa.

¹²Na gulabinga wel i bile na tenangwa mere, malia kwi imo miliga wel niriin iray bile na tomua.

¹³Na kawen di i terala i piro. Na guunan kanan gariba ulin kole kole kere di tenangwa gul, abalini kalkan erungwa di maribe erangure, ibal kobe abalini wai pire tenamua,” dungwa. Yudas Yesu bale taal siralwa, dire Yuda ka main yal singaba kobe di tongwa (Mak 14:10-11; Luk 22:3-6)

¹⁴Ena Yesu gawlima kobe anan kole kole muru kawnan milin sutan yal ta kaan Yudas Isikerio, pi Yuda ka main kenin erungwa yal bil kobe milungwa gul ongwa.

¹⁵Pirere iru dungwa, “Yesu i anin mina u maribe nalga takal na tenane?” Dungure kobile moni milin aan kawn muru te anan kole kole muru yalini tongwa.

¹⁶Ena kaun iray, Yesu bale taal sirala dire kawn kule, kaun ta suul mile kane milungwa. Yesu te gawlima kobe bole erin kaun Pasoba, komina bil nongwa (Mak 14:12-21; Luk 22:7-14, 21-23; <a href='B:500 13:21'>Yon 13:21-30)

¹⁷Komina bil ta, komina birete u bil pekungwa nere milungwa kaun, kamin kaun ta kawn kule erungure, gawlima kobe ure iru sirin bile Yesu tongwa, “God Yuda nen kobe ta sekungwa kaun nomanin si pirabina dire, komina nerabinga alde aa tekun ere nerabine?”

¹⁸Di tongure iru dungwa, “I ogu ai bil pirere yal ta iray kananga iru di to, ‘Ka nil si tongwa yal iru dimua,’ da. ‘Na gulabinga kaun u bawa dungure, na te gawlimanan kobe para God Yuda nen kobe ta sekungwa kaun nomanin si pirabina dire, komina i, i ogin ala nerabinwa,’ iru di ta.”

¹⁹Dungwa mere erere, komina bil iray nenangwa aa tekun erungwa.

²⁰Ena kamin girungure pare, Yesu te gawlima kobe anan kole kole muru kawnan milin sutan bole, komina nerabina dire amin di milunga.

²¹Yal kobe komina ne milungure Yesu iru dungwa, “Yal ta u alia milere na bale taal sinamua.”

²²Dungure yalin kobe nigi de pire, inin inin iru sirin bile Yesu tongwa, “Singabo, na i sirabin mo, sekerala di piria.”

²³Dungure Yesu di tongwa, “Yal ta i suna milungwa, yalini na bole pele bala taran komina nil bile nobinga, ena yalini na bale taal sinamua.

²⁴Ka main minin ganin bilungwa mere Na U Ibal Obinga Yal u baan ta nalwa. Nabinba yal ta Na U Ibal Obinga Yal bale taal sinangwa yal iwe, aye, giil bil piramua. Man yal iray ta kule yekenangwa, wai wen milamba.”

²⁵Dungure bale taal sinangwa yal Yudas iru di tongwa, “Nil si tongwa yalo, na i sirabin mo, sekerala di piria.” Dungure Yesu mile, “I iru dinwa,” di tongwa. Yesu komina birete te nil wain, gawlima kobe tongure bole nongwa (Mak 14:22-26; Luk 22:15-20; 1 Kor 11:23-25)

²⁶Ena yal kobe komina nere milungwa, Yesu komina birete aa tere maki ye God tere, bege dire obin si yal kobe tere, iru dungwa, “Komina i, na miin te gaynan dimia, ire no.”

²⁷Dire pare nil wain sin kabe ta ire, maki ye God tere, suule obin si yal kobe tere iru dungwa, “I yal kobe para, nil i no.

²⁸Ibal kobe binanbile God bole guman kane ire u taran nama dire, na inan mayan garu diralwa. Te ibal kal digan ere taalime erungwa kire di erama dire, na inan mayan garu diralwa.

²⁹Na kawen dirala i piro. Malia na nil wain nega mere, iru ta ama nekeralba, God kenin ere ke milungwa ai pi milalga eme kwi neralwa.”

³⁰Dire geril ta di pisere ere malge pire, kamin kuul Olibe ongwa. Yesu mile, Pita ka di kile di mena ere na tenanwa, dungwa (Mak 14:27-31; Luk 22:31-34; <a href='B:500 13:36'>Yon 13:36-38)

³¹Ena Yesu iru di gawlima kobe tongwa, “Gilaa kaun i, i yal kobe nigi de pire na tere us sutaw nanwa. God mile, ‘Na bolima siipe siipe kenin erungwa yal sirabingire, bolima siipe siipe u sutaw namua,’ dungure ka main minin ganin iru bilungwa mere, u maribe namua.

³²Iru dinamba, na gulere alalga God iru erangure pare, na Galili gariba gul goma egire i eme unanwa.”

³³Dungure Pita ka dagi dire iru dungwa, “Yalin kobe nigi de pire i tere u sutaw namba, na iru ta pire i tekeralwa.”

³⁴Dungure Yesu iru di tongwa, “Na kawen i inin di terala piro. Kemina gilaa sia korale be dala di erangwa, i ginin sutakobe na kaanan di aal kule ka di kile di mena ere na tenanwa.”

³⁵Dungure Pita maan iru di tongwa, “I kaanin di aal kule i teralga, main iru ta paikimua. Iru tekiralga ibal kobe na i bole na si gulangwa, ena para wai we. I ka di kile di mena ere i tekeralwa.” Dungure gawlima kobe para iru di Yesu tongwa. Yesu Gesemani eri main ana di God tongwa (Mak 14:32-42; Luk 22:39-46)

³⁶Ena Yesu te gawlima kobe bole pi eri main ta kaan Gesemani ongure, Yesu iru di tongwa, “Na ana di God terala erebina, i alia amin di milo.”

³⁷Direre Pita te Sebedi wan sutan awli pirere, suna ku ku maa ungure miriin pire milungwa.

³⁸Milere iru di yal sutakobe tongwa, “Na inan miriin bilkaw pire milere, gulalga mere piriwa. I abila mile el kwi nu milo.”

³⁹Direre baan ta pi bawa dire, yaa i kwi bile ana dire iru dungwa, “Na Abe, giil malia na piralga, pirekerala di pire iru ere na tenanba, painama di pirangire, ena giil piralwa,” dungwa.

⁴⁰Dire pare urere, yal sutakobe ul paingwa kanere ulin yuure iru di Pita tongwa, “I yal kobe kaun tawliga kwi milekeno?

⁴¹Satan i kiranin sire kela kule tenangure i manaa dirala dire, i ul paikire si kwi ye mile ana morin di God te milo. I nomanin iru si piringa, ‘Na yobilaan biliga eralwa,’ di pirinba gain obin domua.”

⁴²Direre ginin ta kwi pire ana dire iru dungwa, “Na Abe, ena giil malia piralga i painama di piranga, giil piralwa.”

⁴³Dire pare sinaa dire kwi ure, yal sutakobe omilin meru dimia ul paingwa kanungwa.

⁴⁴Kanere goma ginin sutan ongwa, malia kwi pire, ana goma dungwa mere kwi dungwa.

⁴⁵Dire pare gawlima kobe sutakobe milungwa gul ure, iru di tongwa, “I yal kobe ul painga iray kwi paino? Ena i iru piro. Na U Ibal Obinga Yal, yal ta bale taal sinangure kal digan ere taalime erungwa, yalin kobe na sinangwa kaun u maala omua.

⁴⁶Ale, ere nabina wo. Bale taal na sinangwa yal kaya maala umia, kano,” dungwa. Yudas Yesu bale taal sire kaymin kobe tongwa (Mak 14:43-50; Luk 22:47-53; <a href='B:500 18:3'>Yon 18:3-12)

⁴⁷Ena ka iru di milungure, ena gawlima kobe anan kole kole muru kawnan milin sutan, yal ta kaan Yudas te ibal binanbile para, kuba te di kuba pera aa te ire u milungwa. Yuda ka main kenin erungwa yal bil kobe te singaba kobe, nusi erungwa u milungwa.

⁴⁸Bale taal sungwa yal goma iru di ibal kobe tongwa, “Yal ta guman mu diralga, yalini yal iray milamua. Iru kane aa gi di mile kanin so.”

⁴⁹Dire u bawa dire gin taran Yesu milungwa gul pire, “Singabo, mile dino,” dire guman mu dungwa.

⁵⁰Dungure Yesu iru di tongwa, “Ye nego, kal ta erala di eranga kal iray ero.” Dungure ure aan aa gi dire kanin sungwa.

⁵¹Yal ta Yesu bole milungwa di kuba pera i maribe ere, Yuda kenin erungwa yal bil yalini nil konagi yal ta, kiraan dual kule erungwa.

⁵²Erungure Yesu iru di yal ta iray tongwa, “I di kuba pera kwi gal gule ain yeyo. Yal ta di kuba pera aa te ibal sungure, ena ibal kobe yal iray, di kuba pera si gulangwa paamua.

⁵³Na Abe gala di teralga ena yalini gin taran angel taminin anan kole kole muru kawnan milin sutan, aa ki di na tenangwa nusi eramua.

⁵⁴Eramba, ‘Iru wen painamua,’ di ka main minin ganin bilungwa mere, tamintan milin u maribe name? Angel kobi nusi erangwa ta pekenamia, ena milin kawen u maribe namua,” dungwa.

⁵⁵Dire pare Yesu iru di u ku bilungwa ibal tongwa, “I di kuba pera te kuba ire unga, komina kunibe nongwa mere iru kuunin ta milebinga, kanin na kulala dire uno? Yuda ibal ka main ogu bil, kaun kaun ka nil si te milebinga, na kanin ta sikingirawa.

⁵⁶Ka kebe yal kobe ka main minin ganin bilungwa mere, kalkan iru ere milin u maribe omua.” Dungure gawlima kobe para yalini pisere si ere ongwa. Ka main kenin erungwa yal bil kobe, te kaunsol ibal para, Yesu ka kol ere tongwa (Mak 14:53-65; Luk 22:54-55, 63-71; <a href='B:500 18:13'>Yon 18:13-14, <a href='B:500 18:19'>19-24)

⁵⁷Yal kobe Yesu kanin si milere, Yesu awli pi Yuda ka main kenin erungwa yal bil kaan Kayapas milungwa gul ongwa. Ongure Yuda ka main nil si tongwa yal kobe, te singaba kobe para, u ku bile milungwa.

⁵⁸Milungure, Pita tawliga tayan mile duulin bile pire, kenin erungwa yal bil ogin malge pi bawa dire, ere suna ongwa. Pirere kalkan u maribe nangwa kanala dire, el kwi nu milungwa yal i bole amin di milungwa.

⁵⁹Ka main kenin erungwa yal bil kobe te u ku bilungwa ibal para muru, Yesu si gulala dire ka digwane waa Yesu tenangwa, ka i waa duungwa.

⁶⁰Waa duumba ka ta i maribe erekungwa. Dimba ka kol kanungwa ibal binanbile ure, “Kakiibi dirabina,” di pirungwa. Ena ka kol kanungwa ibal su ure

⁶¹iru dungwa, “ ‘God ka main ogu bil ibal kiingwa sulalwa. Sulere pare kaun sutakobe na inan kwi kiiralwa,’ dire Yesu iru dungwa na yalsu pirebilwa,” dungwa.

⁶²Dungure Yuda ka main kenin erungwa yal bil alere iru di Yesu tongwa, “I maan ka ta piranga ta dekino? Ka kol kanungwa yal kobe di maribe erungwa tamintan mere dime?”

⁶³Iru sirin bilimba, Yesu pire unin si milungwa. Ka main kenin erungwa yal bil, kwi dire iru di tongwa, “God kwi mile paangwal paangwa, i pire maabinin mina aa taw sire i kirara kawen di na to. I God konagi erungwa yal Kirisito milino? Te i God Wan milin mo, milekene?”

⁶⁴Dungure Yesu maan iru di tongwa, “I iru dingiwe. Dinba ka di i ibal kobe terala i piro. Malia miliga i kaninba, eme Na U Ibal Obinga Yal, God Yobilaan wen Kobaan aan wen kol amin di miliga kanere, te kawa bolimina urabinga para kananwa.”

⁶⁵Dungure ena kenin erungwa yal bil iray, galsuna aa te ole dire iru dungwa, “Yalini God gain ka simua. Ka kol kanungwa yalin kobe tameran ka kwi diname? Yalini gain ka sungwa pirere,

⁶⁶i takal waa di nomanin si pirine?” Dungure yalin kobe maan dire iru dungwa, “Yalini kal ki ere pirin paamia, ena si gulo.”

⁶⁷Ena yal taw kobe ebil sipadi, Yesu guman mina tere sire, te ibal taw de dagi sire

⁶⁸iru dungwa, “God konagi erungwa yal Kirisito, ka kebe yal dungwa mere bolin kule di maribe ero. Ibena i sime?” Pita Yesu na kanekiwa, dire ka di kile di mena ere dungwa (Mak 14:66-72; Luk 22:56-62; <a href='B:500 18:15'>Yon 18:15-18, <a href='B:500 18:25'>25-27)

⁶⁹Ena Pita malge yene i milungure, kenin erungwa yal bil nil konagi gi ta urere iru di tongwa, “Yesu Nasarete nen milungware i bole para milingirawa.”

⁷⁰Dimba ibal para milungwa mina, Pita ka di kile di mena ere iru dungwa, “I ka dingi na ta pirekun erekiwa.”

⁷¹Dire ogu malge yene kana giran ta ongure, nil konagi gi ta mile, iru di yal kobe tongwa, “Yalini Nasarete nen Yesu bole milungwa yal milemua.”

⁷²Dungure Pita kwi ama ka di kile di mena ere, maabin mina aa taw sire iru dungwa, “Yalini guman na kawen kirara ta kanekiwa.”

⁷³Dungure kawn tawliga mile pare, yal kobe maala milere iru di Pita tongwa, “Yesu gawlima kobe kowa kowa dungwa mere i para iru dingi, ena i yal ta milingirawa.”

⁷⁴Dungure Pita ka nigi dongwa dire iru dungwa, “God mabin mina kawen di tekerala God na sinangwa paamua. Yalini i kane dinga, na guman ta kanekigirawa.” Dungure sia korale gin taran be dungwa.

⁷⁵“Sia korale be dala di pirangwa, i ginin sutakobe na kaanan di aal kule ka di kile di mena ere na tenanwa,” dire Yesu goma iru di Pita tongwa, nomanin si pirere, Pita mena pire kay mun bile yaare simil kay miingwa.