Read Golin Maka 1 Bible Online

Maka 1 - Golin bible

Maka 1

¹God Wan Yesu Kirisito, yalini guun kan kawn kule u maribe ongwa.

²U maribe ongwa main iru paangwa. God ka kebe yal Aisaya ka minin ganin iru dire bilungwa paangwa,“God ka iru di na tongwa, ‘Na ka kebe yal ta nusi erebingire, yalini goma ye tere kol bala di i tenamua.’

³Gariba simi yongwa gul yal ta mile, ‘Singaba unangwa kol bala di tere aa tekun ero,’ dire gala iru dimua.”

⁴Dungwa main iwe, nil bile tongwa yal Yon, gariba simi yongwa gul u maribe pi mile, main iru kere di maribe ere ibal tongwa, “Kal digan ere taalime eringa pisere, nomanin suna si kiruul sire, nil bile iyo. Iru ere milanga God pirin gule i tenamua.”

⁵Yudia gariba gul ai ta ta para, te Yerusalem ogu ai bil ibal pi yalini ka dungwa pirala di pirere, kal digan ere taalime erungwa di maribe erungure, Yon Yodan nuule mile nil bile ibal tongwa.

⁶Ena Yon bolima kamel igin gal ware sigi dire, bolima gain kin mere dere, gomare nere te deboma niriin nongwa.

⁷Yalini kere di maribe ere iru dungwa, “Yal ta eme na munan kol u milamua. Yalini yobilaan bil pai tongure na yobilanan kuunin ta pai na tekemua. Na yalini gal kine teralba, na yal digan mile kuunin ta paikimua.

⁸Na i nil wo bile teiba, yalini God Kegemama Iban i tenangure i nomanin sigi dinamua.” Yon nil bile Yesu tongwa (Mat 3:13-17; Luk 3:21-22)

⁹Di tongwa kaun i, Galili gariba gul ai ta kaan Nasarete Yesu piserere, pi Yodan nuule ongure, Yon nil bile Yesu tongwa.

¹⁰Yesu nil ali milere ere mena ungure, kamin aw di ala di kole kole ongure, God Iban imil giran guman kulungwa mere, si paale ire Yesu milungwa gul ime ungwa.

¹¹Ungure kamin mina ka ta iru ere ime ungwa, “I na Wanan taran milinwa. Kanere na gun ye wai wen pire i teiwa.” dungwa. Satan ure Yesu kela kule tongwa (Mat 4:1-11; Luk 4:1-13)

¹²Iru dungure, God Iban milere Yesu gariba simi yongwa sa nusi erungure, ere ongwa.

¹³Pirere, yalini gariba simi yongwa gul are kaun yal sutan aan kawn muru milere, Satan kiraan sire kela kule te milungwa. Te milungure kabe biin eli paangwa bole para milungure, angel aa ki di te milungwa. Yesu Galili gariba gul konagi kawn kule erungwa (Mat 4:12-17; Luk 4:14-15)

¹⁴Ena Yon kanin pai milungure pare, Yesu Galili gariba gul pi bawa dire, God guun kan kere di maribe erungwa.

¹⁵Erere ka iru dungwa, “God kenin ere ke milangwa kaun kaya u maala ongure, kaun i u maribe pi na tomia. Kal digan ere taalime eringa pisere, nomanin suna si kiruul sire, God guun kan pire gi do.” Yesu yal sui sui na duulin bilana wo, di gala dungwa (Mat 4:18-22)

¹⁶Direre Galili nil benge binan warungure, Saimon te yalini kebinbi Endiru, nil kabe sungwa gal pusi nil ali erere yal sui nil kabe si sire erungwa yal milungure, Yesu kanungwa.

¹⁷Kanere Yesu iru di tongwa, “I na munan kol duulin bilo. Bilanga konagi main nil si i teralgire, nil kabe singa mere, ibal iru di ku bilanwa.”

¹⁸Dungure yal sui gin taran nil kabe sungwa gal pisere paale, yalini mun kol duulin bile ongwa.

¹⁹Ena Yesu tawlita tayan ongure pare, Sebedi wan sui Yemis te Yon, sipe ala milere, nil kabe sungwa gal bali sungwa kwi si bile milungure, Yesu yal sui kanungwa.

²⁰Kanere “Nabina wo,” dire gin taran gala dungure yal sui nen Sebedi, te nil konagi yal sipe ala milungwa piserere, Yesu mun kol duulin bile ongwa. Yesu yal ta sia den suna milungwa maa si mena erungwa (Luk 4:31-37)

²¹Ena yalin kobe Kapanaum ai pi milere, Sare kaun u bawa dungure Yuda ibal ka main ogu ala pirere, Yesu ka nil si tongwa.

²²Nil si tongwa main i ibal pire buul kunungwa. Yuda ka main nil si tongwa yal kobe, nil si tongwa mere, yalini iru ta dikimia. Ka yobilaan bilungwa dungure maa yebe omia, ibal pire buul kune milungwa.

²³Kaun iray yal ta sia den suna milungwa, Yuda ka main ogu kaya u maribe pi milungwa.

²⁴Milere gala dire iru dungwa, “Yesu Nasarete nen na kanan paamia, i kanin ta painan dino? Na yal kobe na si sutaw ere na terala dire uno? God kabin sire wai wen milungwa yal, i yalini milinga, na i gumanin kaniwa.”

²⁵Iru dimba Yesu kan tere, “Ka ta dikire, yalini pisere ere mena po,”

²⁶dungure sia yal i nibil maalame tere, gala bil dire ere mena ongwa.

²⁷Iru erungure ibal kobe para kane buul wen kunere, diria ere iru dungwa, “Ayo, takal ereme? Ka main ta kwi u maribe pire maa yebe omua. Ka yobilaan bilungwa di sia tongure, sia iray wiina eremua.”

²⁸Ena Yesu guun kan gin taran Galili gariba gul, te gariba binan kole kole para, ware biingwa. Pita wounbi nibil ere paingure, Yesu aa te wai ere tongwa (Mat 8:14-15; Luk 4:38-39)

²⁹Yesu te Yemis te Yon, ka main ogu iray piserere pi Saimon te Endiru ogin ala milungwa.

³⁰Ena Saimon wounbi nibil ere paire gain nega dungure, yalin kobe Yesu gin taran di tongwa.

³¹Tongure Yesu abalini milungwa gul urere, aan aa tere aa ki di alungure, gain nega dungwa gwi sungure, komina gin taran ki yalin kobe tongwa. Yesu yal abal binanbile aa te pilaan pai tongwa (Mat 8:16-17; Luk 4:40-41)

³²Kaun iray kamin kaya gire kama sungure, ibal kobe nibil erungwa ibal, te sia den miriin suna milungwa ibal para, awli Yesu milungwa gul ungwa.

³³Ibal taminin ta para muru ogu ai penin u ku bile milungwa.

³⁴Nibil main main ere milungwa aw di pilaan pai tere, te sia para maa si mena erungwa. Erungure sia Yesu guman kanere ka dala di erungure manaa di tongure, ka ta dikungwa. Yesu Galili suna konagi ere warungwa (Luk 4:42-44)

³⁵Kwimile taanima wen kamin kama si dungure, Yesu alere ai simi yongwa gul pirere, ana di God tongwa.

³⁶Saimon te ibalin kobe para, Yesu kanala dire waa duu i ongwa.

³⁷Waa duu i pi kanere, “Ibal para i waa duumua,”

³⁸dungure, yalini ainere ka iru di yalin kobe tongwa, “Ogu ain kole kole maala dungwa, ka main kere di maribe ere terabina, nabina wo. Konagi iru erala dire, na wiwa.”

³⁹Dire, Galili gariba gul suna para warere, Yuda ka main ogu ala ka main kere di maribe ere ibal tere, sia maa si mena erungwa. Yesu seki egilungwa yal aa te pilaan pai tongwa (Mat 8:1-4; Luk 5:12-16)

⁴⁰Seki egilungwa yal ta, yalini milungwa gul urere, yaa gobin bile mile kawan dire iru dungwa, “I na nimbona aa te wai ere na terala di piranga, aa te wai ere na tenanga, kuunin painamua.”

⁴¹Dungure Yesu miriin wen pirere, aan dire dire aa tere iru dungwa, “I aa te wai erabinga di pirebina i u wai pi milanwa,” dungwa.

⁴²Dungure seki egilungwa yal, gin taran gain wiige sire u wai ongwa.

⁴³Ongure Yesu yalini kiraan aa tere iru dungwa,

⁴⁴“Kal ere i tega, i ibal kobe di tekio. Tekenanba, pi Yuda ka main kenin erungwa yal, gaynin wiige sungwa i maribe eringire, kanamua. I gaynin wiige singi, Mose goma, ‘Kal ta to,’ ka dungwa mere wiina erangire, gaynin wiige singa ibal kanamua.” Di tere gin taran nusi ere, “Ere po,” dungwa.

⁴⁵Yesu “Di tekio,” dire manaa di tomba yalini pirere ibal para bolin kule tere, ka i di warungwa. Ka i di warungwa, Yesu ogu ai bil ala nala di omba, ala pekenangwa paangwa. Gariba simi yongwa gul pi milimba, ibal gariba binan kole kole para, yalini milungwa gul kire di u taminin sungwa.