Read Golin Maka 11 Bible Online

Maka 11 - Golin bible

Maka 11

¹Ena ibal yalin kobe Yerusalem ai u maala ure, ogu ai sutan Betepage te Betani suna u bawa dungwa. Ogu ai iray kamin kul kaan Olibe binan kol dungwa. Baan iray u bawa dungure, Yesu gawlima sutan nusi ere

²ka iru di tongwa, “I ogu gul kola kaninga po. Pirere ala nala di erangire bolima donki gawlin kumil kwi, naan kan kule paalungwa kananwa. Ibal aw ta sikungwa milungure, i kan gule ere awli wo.

³Yal ta mile, ‘Tameran kan gule erine?’ di i tenangwa, iru di ta, ‘Singaba aw si warangwa wei sinangure gin taran nusi ain eramua.’ ”

⁴Yesu di tongure pirere, bolima donki gawlin kumil kwi naan kan kule, ogu kana giran kombil malge yongwa kanere kan gule erungwa.

⁵Ibal kobe baanin kole milungwa iru di yalsui tongwa, “Bolima donki, tameran kan gule erine?”

⁶Dungure, Yesu goma ka di yalsui tongwa mere bolin kule tongure, ibal pire “Ena ere po,” di tongwa.

⁷Di tongure, yalsui bolima donki Yesu milungwa gul awli pirere, mun bolimina inin gal kaw tongure Yesu bolima donki aw sungwa.

⁸Sungure ibal binanbile gal kombil bolimina pilaa di yongure, ibal taw kobe eri minin arin bole wi yuure kombil para pire yongwa.

⁹Ibal kobe taw goma ongwa, te eme ongwa para, “Aya maya,” dire iru gala dungwa “Yal ta God ka dungwa kebe ere yuungwa, God miriin pai tenamua.

¹⁰Na sanamoi Debiti kwi kenin ere ke milangwa wai wen u maribe namua. Kamin ibal kobe para God maki ye tomua.”

¹¹Yesu Yerusalem ai u bawa dire Yuda ka main ogu bil ala pirere kalkan kane kole kole erungure, kamin kaya girungwa yalini te gawlima kobe bole ere Betani ai ongwa. Eri akola milin kulekenama dire, Yesu kura ka di tongwa (Mat 21:18-19)

¹²Ena Yesu te gawlima kobe ul paangwa alere, Betani ai pisere ere pire yalini kol baan kenan gule milungwa.

¹³Milere Yesu eri akola tayan dungwa arin sungwa kanere, milin kulangwa kanala dire ongwa. U bawa dungure akola milin kulekungwa kaun dungwa, arin tawle sire milin kulekungwa kanere

¹⁴iru di eri tongwa, “Ibal kobe i milin ta ule nekinamua.” Ka dungwa i gawlima kobe pirungwa. Ka main ogu ala ibal kalkan aibe tobe irala di yongwa Yesu i sutaw erungwa (Mat 21:12-17; Luk 19:45-48; <a href='B:500 02:13'>Yon 2:13-22)

¹⁵Ena Yerusalem ai u bawa direre Yesu Yuda ibal ka main ogu bil ala pirere, kal yongwa ibal te gibilin sungwa ibal sire waa kile di malge erere, kobile tobe sungwa yal kobe bol a sinaa direre, kauba yongwa ibal bol sea para a garu dungwa.

¹⁶Ibal bona kawi ire Yuda ka main ogu bil suna ongure manaa di tongwa.

¹⁷Di tere ka nil si tere iru dungwa, “Ka main minin ganin iru bilemo? Bilemia ena i piro. God ka iru dungwa, ‘Ibal gariba gul muru milungwa, na ogu ala ana di na tenamua.’ Tenamba, i kalkan yere te gibilin singa ena kunibe ibal kobile giran ale paangwa mere, na ogu ama iru eringa paamua.”

¹⁸Dire Yesu ka iru dungwa ibal kobe pire buul kunungure, Yuda ka main kenin erungwa yal kobe, te ka main nil si tongwa yal kobe kuril pirere Yesu si gulabina dire, kol ta waa duungwa.

¹⁹Kamin girungwa kaun u bawa dungure ogu ai bil iray pisere ere mena ongwa. Yal ta, na kal ta irala waa dire God ana di tenangwa, kal i inamua (Mat 21:20-22)

²⁰Ena kwimile taanima erima ongwa mere pirere, akola kwi kanungure, akola minin kengi sire dulaanin para gulungwa.

²¹Yesu ka di eri tongwa Pita nomanin si pire iru di Yesu tongwa, “Singabo, eri akola i manaa di tenga kengi sire gulemia kano.”

²²Dungure Yesu maan dire dungwa, “I God pire gi do.

²³Na kawen di terala piro. Yal ta mile nomanin sutan sikire, ka diga mere u maribe nama di pirere, ‘Kamin kuul i pi pirin nil suna ali yaa so,’ dinangwa, ena kamin kuul i ka dinangwa mere pire wiina ere yaa sinangwa paamua.

²⁴Kal erungwi i pire iru di teya. I yal kobe, ‘Kal ta na to,’ dire ana dire, ‘Kaya iwa,’ dire pi tegi yenanga ena inanwa.

²⁵I alere ana di God tenanga kaun, yal ta kal digan ere taalime ere i tongwa, ena pirin i gule ere to. I Nenin kamin mina milungwa, i kal digan ere taalime eringa pirin i gule ere i tenama dire, i para gule ere to.

²⁶[Dimba, ibal taw kobe kal digan ere taalime erungwa pirin i gule ere tekenanga, i kal digan eringa i Nenin kamin mina milungwa, pirin i gule ere i tekenamua,” dire Yesu iru dungwa.] Yesu main erungwa ibena yobilaan bile tome? dire sirin bilungwa (Mat 21:23-27; Luk 20:1-8)

²⁷Ena Yerusalem ai kwi u bawa dungwa Yesu Yuda ka main ogu bil ala nala di ongure, ogu iray kenin erungwa yal bil kobe, te nil si tongwa yal kobe, te singaba kobe urere

²⁸ka iru sirin bile di yalini tongwa, “I kal main eringa, ibena yobilaan bile i tome? Ibena ‘Ero,’ di i tome?”

²⁹Dungure Yesu ka iru di tongwa, “Na ka ta sirin bile i tegire, i maan di na tenanga ena yal ta ‘Ero,’ di na tongwa di maribe eralwa.

³⁰Yon nil bile tongwa main u maribe ongure God nusi erim mo, ibal nusi ereme? Maan dinangire piralwa.”

³¹Dungure yal kobe inin ka diria ere iru dungwa, “ ‘God nusi eremua,’ dirabinga yalini iru dinangwa, ‘Tameran yalini i pire gi di tekine?’

³²Paamba, ‘Ibal nusi eremua,’ dirabinba?” Ibal muru Yon ka kebe yal wen milema di pirungure, yalin kobe kuril pirungwa.

³³Diria ere iru dire, yalin kobe iru maan dire di Yesu tongwa, “Na yal kobe pirekun erekibinwa.” Dungure Yesu di yalin kobe tongwa, “I iru dinga ena yal ta ‘Ero,’ di na tongwa, para di maribe ere i tekeralwa,” dungwa.