Read Golin Maka 3 Bible Online

Maka 3 - Golin bible

Maka 3

¹Yesu Yuda ibal ka main ogu kwi ala ongure yal ta aan kebil sungwa milungwa.

²Milungure ibal kobe nai kanere iru nomanin si pirungwa, “Sare kaun dungwa Yesu aa te wai ere yal ta tenam mo, tenangwa yalini ka di mere si terabinwa.”

³Dungure yalini ka iru di aan kebil sungwa yal tongwa, “I alere u gumanan kol milo.”

⁴Di tere ka iru sirin bile ibalin kobe tongwa, “Na ibal kile kaman ka takal waa dungwa pirine? Sare kaun kal wai erabin mo, kal piril sungwa erabine? Ibal aa ki di terabin mo, si gule terabine?” Iru di tomba, ibalin kobe imore mile pire unin si milungwa.

⁵Ibalin kobe pire unin si mile girin dungwa, Yesu miriin pirere kole kole den gule kanere, iru di aan kebil sungwa yal tongwa, “Anin dire do.” Dire dungure kwi u wai ongwa.

⁶Parasi kobe u malge pirere Kerodi gawlima kobe bole Yesu si gulala dire, di paalungwa. Ibal binanbile nil benge binan u ku bilungwa

⁷Yesu gawlima kobe bole pi nil benge ai ongure Galili ibal kobe binanwenbile duulin bile ongwa. Ena Yudia ibal te Yerusalem ibal te Idumia ibal, te Yodan nuule binan kole iray ibal, te Taya te Saidon binan kole ibal, ibalin kobe iru Yesu yalini kal erungwi pirere, ibal binanwenbile yalini milungwa gul ungwa.

⁹Ibal binanwenbile u ku bilungure, na yobile suna erama di pirere, Yesu ka iru di gawlima kobe tongwa, “Sipe ta pi ala milabina di erabinga, i ere maala wo.”

¹⁰Iru dungwa main iwe. Ibal miriki aa te wai erungure, nibil erungwa ibal Yesu aa terala dire diibe daibe erungwa.

¹¹Sia Yesu kanere i kwi bilere iru gala dungwa, “I God Wan milinwa.”

¹²Dire Yesu guun kan warekinama dire Yesu manaa di yobilaan bilungwa. Yesu kal iru erungwa, ena sipe ta i, “Ere maala wo,” dungwa. Yesu gawlima kobe paale suna ere ingwa (Mat 10:1-4; Luk 6:12-16)

¹³Ena Yesu kamin kuul maa pirere yal kobe yalini bole konagi erala di pirere, gala dungure yalini milungwa gul ongwa.

¹⁴Yesu gawlima kobe anan kole kole muru kawnan milin sutan bole para milala dire kaan ye tongwa. Tongwa ka main di tenama dire nusi erere

¹⁵sia maa si mena erama dire yobilaan bile tongwa.

¹⁶Gawlima kobe anan kole kole muru kawnan milin sutan paale suna ere ingwa, kaan iru paangwa, Saimon kaan ta kwi Pita yerere,

¹⁷ta Sebedi wan Yemis, ta Yemis kebinbi Yon, kebin abin sutan i, kaan ta Boanesi (Golin ka, kamin guru dungwa yal milungwa) yerere,

¹⁸ta Endiru, ta Pilipi, ta Batolomiu, ta Matyu, ta Tomas, ta Alpias wan Yemis, ta Tadias, ta yobilaan bilungwa yal kaan Saimon,

¹⁹ta bale taal sungwa yal kaan Yudas Isikerio. Sia bil wen kaan Bielsebul Yesu yobilaan bile tomua, dungwa (Mat 12:24-32; Luk 11:14-23, 12:10)

²⁰Yal kobe iru paale suna ere ire pare, Yesu ere ogin ongwa. Yesu te gawlima kobe komina nerala dimba, ibal binanbile kwi ama u ku bilere ogu si di dungwa, komina ole nekungwa.

²¹Iru erungwa Yesu ibalin kobe pirere, “Yalini kiraan gi dimua,” dungwa. Direre aan aa tere awli urala dire ongwa.

²²Yuda ka main nil si tongwa yal kobe Yerusalem pisere ere ime urere, “Sia bil wen kaan Bielsebul Yesu nomanin suna milere, yobilaan bile tongure sia maa si mena eremua,” dungwa.

²³Dungure Yesu, “Na milebinga gul ere wo,” direre ka di bile dire iru dungwa, “Satan inin milungwa, tameran kwi inin maa si mena erame?

²⁴Gariba baan ta yal kobe suna si bine dire kura bilangwa u sutaw namua.

²⁵Nen abin kobe guman inin inin dinangwa u sutaw namua.

²⁶Satan inin gain di keli sinangwa, eme ime naanin ta pai milekire, eme wei sinamua.

²⁷“Yal ta pi yal naanin paangwa ogu kol di guru di erere, bona kunibe irala di nangwa ala pekenamba, goma naanin paangwa yal aan kawn kole si paale, ala pire bona inamua.

²⁸“Na ka wo di i teralga piro. Yal kobe kal digan ere taalime erangwa, te gain ka sinangwa pirin paangwa para muru iray, God gule ere tenangwa paamua.

²⁹Paamba, ibal God Kegemama Iban gain ka si tenangwa, pirin paangwa i gule ere tekenangwa paamua. Pirin i, pai dinangwal dinamua.”

³⁰Ibal taw mile, “Yesu den suna sia milemua,” dimia, yalini ka iru di tongwa. Yesu man te kebin kobe ure, ere wo, di gala ungwa (Mat 12:46-50; Luk 8:19-21)

³¹Yesu man te kebin kobe urere malge milere, yal ta nusi erere, “ ‘Yesu wo’ do,” dire iru di tongwa tongwa.

³²Ibal binanbile Yesu milungwa gul amin di milere iru di yalini tongwa, “Ena i manin te kebinbi bole malge milere i ‘Ere wo,’ dimua,” dungwa.

³³Yesu waa dire, “Na mina te kebinanbi ibena kuunin mileme?” dire sirin bile tongwa.

³⁴Ibal Yesu milungwa gul amin di milungwa, Yesu u kane kole kole erere iru dungwa, “Na mina te kebinanbi ali milemiawa.

³⁵Ibal kobe God ka dungwa pire wiina erangwa, ena ibalin kobi, na kebinanbi te alanbi, te na mina mere milemua,” dungwa.