Read Golin Maka 4 Bible Online

Maka 4 - Golin bible

Maka 4

¹Ena ginin ta Yesu Galili nil benge makalua binan kole milere, kwi kawn kule ka nil si tongwa. Ibal kobe binanwenbile u ku bilungure, sipe ta nil minimina warungwa Yesu ala pirere, amin di milungwa. Ibal kobe para wen nil benge binan kole milungwa.

²Yesu ka di bile dire, main ta ta para nil si tere iru di tongwa,

³“Ka di i teralga piro. Yal ta milin sigilala dire omua.

⁴Sigile milungure, taw yaa kombil bolimina sungure kauba urere nomua.

⁵Kobile bilkaw dungwa minai gariba wanin tawliga bolimina dungwa gul milin taw yaa sire, gariba binanbile ta dekungwa gin taran maamua.

⁶Maamba, are bil dongure dulaanin warekimia, minin kengi sire gulemua.

⁷Milin taw kul galan yongwa suna ali yaa sirere bole para maangure, kul galan yongwa naan yobilungure gulemua.

⁸Milin taw gariba wai dungwa gul yaa sirere, gune di maare arin sire milin kule sulu dimua. Ena erin ta milin taran taran, teti paingure, ta milin binanbile, siksti paingure, ta milin binanwenbile, wan kandret paimua.”

⁹Dire ainere iru dungwa, “Ibal kiranin gi dekemia kiranin gule piro.” Yesu ka di bile dungwa main di maribe erungwa (Mat 13:10-17; Luk 8:9-10)

¹⁰Ibal kobe u ku bile ongure pare, gawlima kobe anan kole kole muru kawnan milin sutan te ibal taw para milere, di bile dungwa mere sirin bile Yesu tongwa.

¹¹Tongure yalini ka iru di tongwa, “God kenin ere ke milungwa mere main aal kule paangwa, God di maribe ere i tongure pirinwa. Pirinba, ibal mena milungwa main para pirekenamba, God di maribe ere i tomua. Ka di bile di tega, pire pol ta sekemua.

¹²‘Ibal mena milungwa ka di bile dungwa imore pire kanimba wai wen ta kanekinamua, te kiraan pirimba pire bawa dikinamua. Wai wen kane pire bawa dinangwa, ena nomanin si kiruul sinangure, te kal digan ere taalime erungwa pirin paangwa, i gule ere tenamba.’ ” Komina milin sigilungwa di bile dungwa, main di maribe erungwa (Mat 13:18-23; Luk 8:11-15)

¹³Ena Yesu ka iru di gawlima kobe tongwa, “Ka di bile di i tega i pirekina, ena ka di bile di i teralga, muru tamintan pirane?

¹⁴Sigilungwa yal i God ka main milin mere sigilemua.

¹⁵Ka main milin kombil bolimina sigilungwa mere, ibal iru mere milemua. Ka main pirungure, Satan gin taran urere ka main milin nomanin suna sigilungwa, i omua.

¹⁶Main ta ama iru kuunin dungwa. Ka main milin kobile bolimina sigilungwa mere, ibal iru mere milemua. Ka main pirere, wai pire miriin paamba,

¹⁷dulaanin ikire ka main baan tawle aa gi di milemua. Yalini ka main aa gi di pirungwa ibal kura pai tere, te taalime u maribe pi tomia, ena ka main i, i mun kol eremua.

¹⁸Erungure, ka main milin kul galan yongwa ali sigilungwa mere, ibal iru mere milemua.

¹⁹Ka main pirimba, gariba kal i guman mina yerere, kobile moni te kulgal bona nomanin pirungwa maangure milere, te gain kal pirungwa maangure milemua. Iru milungure, ka main nomanin suna paangwa gule bile yaamua.

²⁰Goma ka main milin sigilungwa mere iru milimba, ka main milin gariba wai wen dungwa gul sigilungwa mere, ibal iru mere milemua. Ka main pirere pire gi dungure, milin paamua. Yal taw milin taran taran, teti paingure, yal taw binanbile siksti paingure, yal taw milin binanwenbile wan kandret paimua.” Enderin derin bol main ali yongwa dungwa (Luk 8:16-18)

²¹Yesu ainere ka iru di tongwa, “Enderin derin gale i ogu ala pirere, bale bilkaw main ali yenam mo, bol main ali yenam mo, bol bolimina yename? Bol bolimina yenangiray.

²²Kal aal kule paangwa muru eme main u maribe namua, te sa alibe erungwa eme aw di u maribe namua.

²³Ibal kiranin gi dikimia, kiranin gule piro.”

²⁴Dire ka iru di tongwa, “Ka piranga nomanin si ere gule piro. I ibal ere tenanga mere, God maan i ere kora kule tenamua.

²⁵Yal ta kalkan binanbile kenin ere milungure, taw ama tenangure inamua. Te yal ta kalkan tawle kenin erekungwa ta tekinangure, kal tawle dungwa yal ta tawal di inamua.” Komina milin maangwa di bile dungwa

²⁶Yesu ainere iru dungwa, “God ibal kenin ere ke milungwa mere iru paimua. Yal ta milin sigilungwa

²⁷girungwa taangwa dungure, milin gune di maare arin simba, main pirekimua.

²⁸Gariba ali inin bugu di maare goma arin sirere, eme maanin sire milin paamua.

²⁹Awan dongwa kaun u maribe ongure, milin bol yongwa di sire ulemua.” Eri koruul milin ka di bile dungwa (Mat 13:31-32; Luk 13:18-19)

³⁰Dire Yesu ainere iru dungwa, “God ibal kenin ere ke milungwa kal ta di bi kanabin mo, ka di bile dungwa tamintan i maribe ere kanabine?

³¹Eri koruul milin mere di bile diralwa. Milin ta ta para mege dimba, eri koruul milin megemaawenga paamua.

³²Paamba, milin kulungure pare bilkaw wen bere gune dire maare, yaan bilkaw waremua. Warungure, kauba ure yaan guule yongwa aan yomua.” Yesu ka di bile dire morin dungwa (Mat 13:34-35)

³³Ka di bile dungwa iru main main, ka main iru di ibal kobe tongwa. Ibal main iru tawle pirama di pirungwa mere, di tongwa.

³⁴Ka di bile dungwa morin morin di ibal tomba, gawlima kobe inin bole milungwa kaun, main di maribe ere tongwa. Yesu gwi bilkaw koban si tongwa (Mat 8:23-27; Luk 8:22-25)

³⁵Iru di tongwa kaun iray, kamin girungure Yesu ka iru di gawlima kobe tongwa, “Nil benge binan koli iray nabina wo.”

³⁶Direre sipe ali milungure, gawlima kobe ibal u ku bile milungwa pisere, Yesu awli sipe bolimina erere ere ongwa. Sipe taw ama bole para ongwa.

³⁷Ongure gwi bilkaw wen maangwa, nil yugu di ime pirere, sipe si ali ibe erere, nil maa muulungwa.

³⁸Iru erimba, Yesu sipe den yuin kol eri pera yere ul pay milungwa. Milungure yalini ulin yuure iru di tongwa, “Ka nil si tongwa yalo, na gulabinga paamua. I miriin pire na yal kobe tekeno?”

³⁹Yesu alere gwi koban si tere, “Ena para, mone di milo,” dire di nil benge tongwa. Tongure, gwi si oli dire kal para sua si dungwa.

⁴⁰Yalini ka iru di gawlima kobe tongwa, “Tameran i kuril pirine? I u tegi ye na tekino?”

⁴¹Yal kobe kane buul kune, giran saa dire ka iru diria ere dungwa, “Nil te gwi yalini ka dungwa pire wiina erungwa, yalini ibena mileme?”