Read Golin Luku 3 Bible Online

Luku 3 - Golin bible

Luku 3

¹Ena yal bil Sisa Taibirias milere Orom gariba gul muru kenin ere milungure, ena bolima ogu anan kole kole muru kawnan milin kole muru wei sungwa kaun iwe. Pontias Pailete singaba mile gariba bilin mege ta, Yudia gariba gul kenin ere milemia, te Kerodi mile gariba bilin mege ta, Galili gariba gul kenin ere milemia, te Kerodi kebinbi Pilipi mile gariba bilin mege ta, Ituria gariba gul te Tirekonaitis gariba gul imu dire kenin ere milemia, te Elaisenias mile gariba bilin mege ta, Abilini gariba gul kenin ere milemia.

²Yal singaba iru gariba bilin dungwa dungwa i kenin ere milungure, ena Anas te Kayapas bole Yuda ka main kenin erungwa yal bil milebilga. Yalin kobe milungwa kaun i, ena Sekaraya wan Yon gariba simi yongwa gul milungure, God ka main milin nil si te milungwa.

³Milemia Yon Yodan nuule kolia kolibe para pire, ka kere di tere iru dungwa, “I nomanin si kiruul singire nil bile tenangure, kal digan ere taalime eringa kire di ere tenamua.”

⁴Dungwa mere Aisaya minin ganin bilungwa i milin paimia piro.“Gariba simi yongwa gul yal ta iru gala dimua, ‘God Singaba kol bala di tere unangwa aa tekun ero.

⁵Kamin kuul maangwa te kowan yaangwa, si yugu dire si pare kulamua. Kol giingwa si diru dire, te kol maa si yaa si erungwa si pare kulamua.

⁶God ibal aa ki di tongure sigare kule u wai ongwa, ibal para wen kanamua.’ ”

⁷Yon nil bile na tenama di pire ibal binanbile yalini milungwa gul ongwa. Ongure yalini iru di tongwa, “I oniba gawlin milungwa mere ibal digan milingi. I kal digan ere taalime eringa pirin paimia, God i sirala di erungwa ibal ena, ‘Si po,’ di i tome? Si pekenanga kirara i sinangurawa.

⁸Kal digan ere taalime erere nomanin suna si kiruul singire, ibal kawo pirama dire kal wai kwi ero. ‘Na Ebarakam gawliman kobe milebinga, para wai milebinwa,’ dire i yal kobe ka kawn kule iru dikio. Dinanga mere iru na di i terala piro. God kal guman kwi dungwa erama di pirangwa, ena kobile i Ebarakam gawliman kobe u maribe namua.

⁹Di aa tere eri main wiirala di eremua. Eri milin kulekungwa ibal, para muru wiire enderin galangwa paimua.”

¹⁰Dungure ibal kobe sirin bile iru di tongwa, “Ka dingai na ibal kobe takal erabina pire dine?”

¹¹Dungure Yon iru di tongwa, “Yal ta galsuna sutan aa te nenangwa, ena yal ta galsuna ta aa te nekenangwa, yalini ta to. Te yal ta komina taw dinangwa ama iru obin si to.

¹²Kobile takis ingwa yal kobe nil bilala di pire ure iru dungwa, “Ka nil si tongwa yalo, na yal kobe takal erabinga pire dine?”

¹³Sirin bile tongure iru di tongwa, “Kobile takis tobe paalungwa mere iru tawle iyo. I taw kela kule ikio.”

¹⁴Dungure simil nen taw ure di tongwa, “Na yal kobe we, takal erabinga pire dine?” Di tongure Yon iru dungwa, “Kobile moni kunibe irala dire imore sire te kela kule tere bawle tekio. Aibe tobe paalungwa mere, ‘Para paamua,’ dire ena iyo.”

¹⁵Ena iru dungure ibal kobe mile kamin ta u maribe nama di pire nomanin si pire iru dungwa, “God konagi erungwa yal, Kirisito Yon i milim mo?”

¹⁶Dimba Yon iru di tongwa, “Yal ta eme unangwa i yobilaan bil pai tongure, na yobilanan kuunin ta pai na tekemua. Na gal yalini kine teralba, na yal digan mile kuunin ta paikimua. Na nil wo bile tobinba, yalini God Kegemama Iban nusi ere i tenangure, i nomanin sigi dinangwa te nomanin naabilama dire, gaynin enderin denangwa mere God gain giil pire i tenamua.

¹⁷Yalini dodal milin inama dire olanin pisere, milin komina ogu ala yenamua. Yenamba olanin enderin galangwa de painangwal painamua,” dungwa.

¹⁸Ibal kobe ka main aa gi di pire milama dire, Yon ka ta ta iru God guun kan kere di tongwa. Kerodi Yon kanin pai tongwa

¹⁹Ena gariba gul kenin erungwa yal singaba Kerodi, kebinbi ebin kaan Kerodias ingwa te yalini kal nigi dongwa para erungwa, ena Yon kan tongwa.

²⁰Iru dimia ena Kerodi Yon kanin sire kanin paangwa ogu ala erungwa. Iru erungwa kal main i piril sungwa. Yon nil bile Yesu tongwa (Mat 3:13-17; Mak 1:9-11)

²¹Ena ibal binanbile nil bile tere Yon para nil bile Yesu tongwa. Tongure Yesu ana di God te milungwa, kamin aw di ala di kole kole ongure,

²²God Kegemama Iban kauba imil giran guman kulungwa mere, si paale ire Yesu milungwa gul ime ungwa. Ungure kamin mina ka ta iru ere ime ungwa, “I na Wanan taran milinwa. I kanere gun ye wai wen pire teiwa.” Yesu sanamoi gilekume u maribe ongwa kaan bilungwa (Mat 1:1-17)

²³Ena Yesu ka main konagi kawn kule erungwa, yalini bolima ogu yal ta aan kawn muru na anan kole kole milungwa. Milungure ibal kobe Yosepe wan kawo milama di pirungwa. Yosepe nen, Kelai milungwa.

²⁴Kelai nen, Mata milungwa. Mata nen, Ilibai milungwa. Ilibai nen, Melkai milungwa. Melkai nen, Yanai milungwa. Yanai nen, Yosepe milungwa.

²⁵Yosepe nen, Matatayas milungwa. Matatayas nen, Emos milungwa. Emos nen, Neyam milungwa. Neyam nen, Eselai milungwa. Eselai nen, Nagai milungwa.

²⁶Nagai nen, Maata milungwa. Maata nen, Matatayas milungwa. Matatayas nen, Semen milungwa. Semen nen, Yosepe milungwa. Yosepe nen, Yoda milungwa.

²⁷Yoda nen, Yoanan milungwa. Yoanan nen, Eresa milungwa. Eresa nen, Serababel milungwa. Serababel nen, Sialtiel milungwa. Sialtiel nen, Nerai milungwa.

²⁸Nerai nen, Melkai milungwa. Melkai nen, Edai milungwa. Edai nen, Kosam milungwa. Kosam nen, Elmedam milungwa. Elmedam nen, Era milungwa.

²⁹Era nen, Yosua milungwa. Yosua nen, Eliesa milungwa. Eliesa nen, Yorim milungwa. Yorim nen, Mata milungwa. Mata nen, Ilibai milungwa.

³⁰Ilibai nen, Simion milungwa. Simion nen, Yuda milungwa. Yuda nen, Yosepe milungwa. Yosepe nen, Yonam milungwa. Yonam nen, Elayakim milungwa.

³¹Elayakim nen, Melia milungwa. Melia nen, Mena milungwa. Mena nen, Matata milungwa. Matata nen, Netan milungwa. Netan nen, Debiti milungwa.

³²Debiti nen, Yesi milungwa. Yesi nen, Obete milungwa. Obete nen, Boas milungwa. Boas nen, Salamon milungwa. Salamon nen, Nason milungwa.

³³Nason nen, Aminada milungwa. Aminada nen, Adin milungwa. Adin nen, Anai milungwa. Anai nen, Keseron milungwa. Keseron nen, Peres milungwa. Peres nen, Yuda milungwa.

³⁴Yuda nen, Yakobo milungwa. Yakobo nen, Aisaka milungwa. Aisaka nen, Ebarakam milungwa. Ebarakam nen, Tera milungwa. Tera nen, Neko milungwa.

³⁵Neko nen, Seraka milungwa. Seraka nen, Iriyu milungwa. Iriyu nen, Peleke milungwa. Peleke nen, Iba milungwa. Iba nen, Sila milungwa.

³⁶Sila nen, Kenan milungwa. Kenan nen, Apakasa milungwa. Apakasa nen, Sem milungwa. Sem nen, Noa milungwa. Noa nen, Elemeke milungwa.

³⁷Elemeke nen, Metusala milungwa. Metusala nen, Inoke milungwa. Inoke nen, Yerete milungwa. Yerete nen Makalali milungwa. Makalali nen, Kenan milungwa.

³⁸Kenan nen, Inos milungwa. Inos nen, Sete milungwa. Sete nen, Adam milungwa. Adam God wan milungwa.