Read Golin Yon 20 Bible Online

Yon 20 - Golin bible

Yon 20

¹Ena Sarebil kaun kwimile taanima wen kamin kama si dungure, Madala ai abal ta Maria pi yene yobilaan gul pirere, kobile milin kobile giran si pere dungwa kaya yawle erungure kanungwa.

²Kanere mugu di pire Saimon Pita te Yesu gawlima ta den miriin tongwa yal iray, yal sui milungwa gul pirere ka iru di yal sui tongwa, “Ibal kobe ure Yesu Singaba yobilagi kaya i ongure, ibalin kobe yongwa ai ta kanekibinwa.”

³Dungure ena Pita te gawlima ta bole pi yene yobilaan gul kanala di ongwa.

⁴Yal sui iray mugu di omba, gawlima ta mugu goma di pire kobile giran yene yobilaan gul kaya u bawa dungure, Pita eme ungwa.

⁵Gawlima ta iray yaa gobin bile mile gal pege wai dungwa kanimba, pi ala ta pekungwa.

⁶Saimon Pita eme ure gin taran pi yene yobilaan kobile giran ala pire gal pege wai dungwa kanere,

⁷te gal ta Yesu gibilin mina yobile yongwa para imo dungwa kanungwa. Gal iray te gal pege wai dungwa ai taran ta dekimba, dain bile baan ta dungwa kanungwa.

⁸Pita iru kanungure, ena gawlima ta yene yobilaan gul kaya u bawa dungwa, yalini para pi ala pire kanere, Yesu alungwa kawen dima di pire, pire gi dungwa.

⁹Iru pirimba ka main minin ganin ta, “Yalini alamua,” dire goma bilungwa malia main wen pire pol sekungwa.

¹⁰Gawlima sui kal iru erere pare, ere ogin ongwa. Maria, Madala gariba ai abal, Yesu kanungwa (Mak 16:9-11)

¹¹Ena Maria yene yobilaan gul mena ale mile kay miingwa. Kay mi mile yaa gobin bile yene yobilaan kobile giran ali nore ere

¹²angel sutan gal pege sigi dungwa kanungwa. Angel sutan i Yesu yobilaan goma dungwa gul milungure, te angel ta gibilin kol milungure, te ta kawn kol milungwa.

¹³Angel sui mile ka iru sirin bile abalini tongwa, “Abalkuno, i tameran kay miine?” Dungure abalini ka maan dire iru dungwa, “Ibal kobe na Singaba yobilaan i baan ta ongure, na ta kanekiwa.”

¹⁴Ka iru dire pare sinaa dire Yesu ale milungwa kanimba, Yesu milema di pirekungwa.

¹⁵Yesu mile ka iru sirin bile abalini tongwa, “Abalkuno, i tameran kay miine? Ibena waa duune?” Dungure yalini eri kulungwa gul kenin erungwa yal milema di, abalini iru pirere ka iru di tongwa, “Yalkuno, i yalini baan ta i nanga, ena yenga kol di na tenanga pi iralwa.”

¹⁶Dungure Yesu mile, “Maria,” dire kaan galungure, abalini si kiruul sire ka iru di Yesu tongwa, “Ka nil si tongwa yalo,” dungwa.

¹⁷Dungure Yesu ka iru di abalini tongwa, “Na Abe milungwa gul kwi ole kaya pekega, ena i na aa tekio. Diiba i pi na enan kobe iru di to, ‘I Nenin na Abe, te i na God ena yalini milungwa gul ibe kwi ere nalwa.’ ”

¹⁸Dungure ena Madala ai abal Maria, pi Yesu gawlima kobe milungwa gul pire, “Yesu Singaba kaniwa,” di yalin kobe tere te, “Ka iru di to,” dungwa mere di maribe erungwa. Gawlima kobe Yesu kanungwa (Mak 16:14-18; Luk 24:36-49)

¹⁹Sare bil kaun iray gilaa taanima, gawlima kobe Yuda ibal milungwa kuril pirere ogu ala mile kol mama yaalungwa. Iru milungure Yesu u maribe pi mile, “Mile dinio. Denin miriin ura dire milo,” di tongwa.

²⁰Direre pare aan te daan i maribe erungwa. Gawlima kobe inin Yesu Singaba kanere, wai pire gun yongwa.

²¹Yesu kwi ka iru di tongwa, “I milinga gul wai wen milanwa. Na Abe na nusi erungwa mere, na i nusi eriwa.”

²²Iru dire pare giran miin pu di yalin kobe tere iru di tongwa, “God Kegemama Iban i teya, ire den miriin suna yeyo.

²³Ibal kobe kal digan ere taalime erungwa kire di erangire, u namua, te kire di erekinangire, ta u pekenamua.” Tomas Yesu kanungwa

²⁴Ena Yesu u maribe ungwa kaun iray gawlima kobe yal ta kaan Tomas, kaan ta Pual Gaan, yalini gawlima kobe bole ta milekungwa.

²⁵Ta milekungwa gawlima kobe taw mile, “Yesu Singaba kanebinwa,” di yalini tongwa. Tomas ka iru di yalin kobe tongwa, “Yesu aan bili nil sungwa nimbona bilin kane anan milin sin bile, te yalini daan bilin paangwa anan sin bilalga, ena pire gi diralwa. Imore pire gi diralga pisero.”

²⁶Sare ta i para wei sungure, gawlima kobe te Tomas bole ogu ala iray kwi milungwa. Kol mama yaalimba, Yesu ala ure yalin kobe milungwa suna ale mile, “Mile dinio. Denin miriin ura dire milo,” dungwa.

²⁷Direre ka iru di Tomas tongwa, “I anin milin dire dire na anan sin bile kano. Te i anin kwi dire dire na daanan ali sin bile piro. Pire gi di na tekinga pisere, pire gi di milo.”

²⁸Dungure Tomas maan dire ka iru di tongwa, “I na Singaba mile te na God para milinwa.”

²⁹Dungure Yesu di yalini tongwa, “Na kaninga pire gi dino? Ibal kobe na kanekire pire gi di na tenangwa, yalin kobe wai pire gun yenamua.” Yon ka minin ganin bilungwa main i maribe erungwa

³⁰Dungure Yesu gawlima kobe bole milungwa kal guman kwi dungwa taw ama binanbile erimba, buku iray minin ganin ta bilekigi.

³¹Yesu mile God konagi erungwa yal Kirisito milere, te God Wan para milungwa, i ibal kobe iru pire gi dinana dire, na ka pore minin ganin biligi. Pire gi dinanga, ena Kirisito yobilaan bile i tenangure, dorimil wai wen mile painangal painanga.