Read Golin Aposel 2 Bible Online

Aposel 2 - Golin bible

Aposel 2

¹Ena Yuda ibal erin kaun ta kaan Pendikos u bawa dungure Yesu duulin bilungwa kobe para, baan ta u ku bile milungwa.

²Milere teli dungwa ta, gwi bilkaw maare muubilin mu dungwa mere pirungwa. Pirungure goma kamin mina teli dire, gin taran ure ogu ala maa muulungwa.

³Kal ta enderin baul sungwa mere u maribe pire u sutaw pire, ibal inin inin gibilin mina baul si paangwa kanungwa.

⁴Ena God Kegemama Iban ibalin kobe den miriin suna pirere, sipapa sire yobilaan bile tongure inin ka pisere ibayal ka kowa kowa more more yuungwa.

⁵Ena kamin kaun iray Yuda nen kobe God ka dungwa morin wiina erere, gariba kole kole pisere pi Yerusalem ai ki pai milungwa.

⁶Milere ka derua poraal dungwa pirere, ibal binanbile u ku bilere yal kobe inin ka dungwa pirere

⁷buul kunere iru dungwa, “Yalin kobe Galili nen kobe milimba,

⁸tameran na yal kobe inin inin ka dungwa pire milebine?

⁹Na yal kobe ibal iru milebinwa. Patia ibal, te Midia ibal, te Ilam ibal, te Mesopotemia ibal, te Yudia ibal, te Kapadosia ibal, te Pontas ibal, te Esia ibal,

¹⁰te Pirisia ibal, te Pambilia ibal, te Isipi ibal, te Sairini ibal Ilibia gariba ki paingwa, te Yuda ibal, te ibal taw kobe Yuda ka main duulin bile warungwa Orom pisere u milungwa,

¹¹te Kiri ibal te Arebia ibal, na yal kobe abal bili bili ibal u milebinwa. Milebinba yalin kobe God kal naanin paingwa bolin kule tongure, na inan ka ta ta pirebinwa,” dungwa.

¹²Ibal para buul kunere nomanin su su sire iru dungwa, “Kal erungwa ta main paime?”

¹³Ibal taw iru dimba ibal taw kobe ka di sutaw ere tere, “Yal kobe wain nil nere, omilin maalemua,” dungwa. Pita ka di maribe erungwa

¹⁴Dimba Pita te nusi erungwa ongwa yal, Aposel, anan kole kole muru kawnan milin taran bole alere gala bil dire iru di ibal kobe tongwa, “Yudia nen kobe, te i ibal kobe Yerusalem ai ki pai milinga. kalkan u maribe ongwa i, ka dirala ere gule piro.

¹⁵Na yal kobe, ‘Nil wain nere omilin maalemua,’ dire i iru di pirinba, kwimile taanima milebinga omilin maalekemua.

¹⁶Kal iru erebinga mere God ka kebe yal, Yoel, goma iru dire bilungwa paangwa.

¹⁷‘God iru dungwa, kaun ta eme na Ibanan nusi eregire, nil kuun sungwa mere ibal para milungwa gul unamua. Unangure wanin abilin kobe ka main bolin kule di maribe erangure, te yal garamil kobe kiibi kanungwa mere omilin mina u maribe nangwa kanangure, te yal dimanin kobe kiibi wen kanamua.

¹⁸Ena kaun iray na Ibanan nusi eregire nil kuun sungwa mere unangure, nil erari yal abal kobe ire ka main bolin kule di maribe eramua.

¹⁹Kalkan ibal kane buul kunangwa, kamin mina i maribe eralwa. Te gariba gul ibal main pirama dire, mayan te enderin te enegi i maribe eralwa.

²⁰Kamin gariba bawa dire u taran nala di erangure, are si bilangwa te ba mayan baa dungwa mere dinamua. Dinangure pare God Singaba yobilaan bilungwa u maribe nangwa kaun u maala namua.

²¹Yal ta na aa ki do, di God Singaba tenangwa, ena yalini yal ta i aa ki dinangure sigare kule u wai namua.’ God iru dungwa pire Yoel ka minin ganin bilungwa.

²²“Isirel nen kobe, ka dirala piro. Yesu Nasarete ai ki paingwa yal i bole para milungure, God yalini nusi erungwa i kanana dire, God Yesu yobilaan bilungure yalini kal guman kwi dungwa erere, kalkan ibal kane buul kunungwa erere ibal main pirama dire kalkan para i maribe erungure, i yal kobe kaninwa.

²³Yesu kanin sungwa, goma wen God iru erala di nomanin si pirungure u maribe omua. I yal kobe yalini awli pi God ka dungwa wiina erekungwa yal kobe tere, ‘Eri pera mina si gulo,’ dingire si gulemua.

²⁴I iru ere yalini tenba, Yesu gulere alungwa God iru ere yalini tongwa. Gulungwa yongwa gul ta milekenangwa, God yalini awli baan ta omua. Ongwa iwe, yongwa gul kanin paangwa mere iru pai milamba, yobilaan bile alemua.

²⁵Yesu milungwa mere Debiti goma iru dungwa,‘Na Singaba gumanan mina milinga morin i kaniwa. Na kuril pirekeralga i u maala milinwa.

²⁶Iru milinga, na nomanin suna gun yere ka diga wai pire diwa. Na gariba ibal miliiba i unangire na yobilanan te gaynan u kwi nangwa, na wai pire miliwa.

²⁷I mile pai eringa mere na iru milala di pire miliga, na ibanan gulungwa yongwa gul ta milekenangure, simin nele kabe na ta nekenamua.

²⁸Kol wai bala di na tengire, mile pairabingal pairabinga i maribe ere na tenwa. Na i bole pena galebilga gun yere miriin pairalwa.’ Iru dimua.

²⁹“Na enan kobe, na yal kobe sanamoi Debiti milungwa mere, main di gawa dirabinwa. Yalini gulungwa maul ali yongure, na yal kobe yalini yongwa gul kane milebinga ibal milebinwa.

³⁰Debiti ka kebe yal milungwa, ‘I gawlin ta kenin erangwa yal bil milamua,’ dire God mabin mina aa taw sire iru di yalini tomua. Di tongure yalini Kirisito alama di pire, goma dimua.‘God Kirisito gulungwa yongwa gul piserekire simin nele kabe yobilaan te gain ta nekenamua,’ dire, para iru pire dimua.

³¹

³²Yesu gulere alungwa, God kal main iru ere yalini tongwa, na ibal kobe para kanebinwa.

³³God Yesu kaan aa te yebe erungure, yalini inin aan wen kol milemua. Milungure God goma mile aan kere ye tongwa mere, yalini inin Kegemama Iban Yesu tongure, yalini nusi ere na yal kobe na tomua. Kuun sungwa mere na tongure ire mile kal main main erebinga i, i yal kobe kaninwa.

³⁴Debiti yobilaan te gain kamin ai mine ibe pekungwa yalini inin iru dungwa,‘God Singaba iru di na Singaba tongwa, i ure na daanan wen kol amin di milo.

³⁵Milingire i kaymin ibal yaa ime sinama di pire, iru ere i teralwa.’ ”

³⁶Pita dire ainere iru dungwa, “Kalkan iru u maribe ongwa ka ta dirala, Isirel nen kobe kawen piro. Yesu eri pera mina si gulinga, yalini Singaba te God konagi erungwa yal, Kirisito, u milama dire God iru ere tomua,” dungwa. Ibal binanbile nomanin suna si kiruul sire nil bilungwa

³⁷Ena Pita ka dungwa i pire, ibal kobe miriin bil pirere iru di Pita te nusi erungwa ongwa yal kobe, Aposel, tongwa, “Na enan kobe, takal erabine?”

³⁸Dungure Pita maan dire iru dungwa, “I kal digan ere taalime eringa God kire di erama dire, i nomanin suna si kiruul sire te Yesu Kirisito kaan gale yebe ere, nil bile iyo. Iru eranga ena God yalini inin Kegemama Iban i tenangure inanwa.

³⁹‘I te gawlin kobe, te gariba tayan ibal kobe na miliga gul ere wo,’ dire Yesu Singaba di ibalin kobe tenangwa, ena God aan kere yere, ‘Na inan Iban teralwa,’ dungwa mere inamua.”

⁴⁰Yesu main paangwa Pita kanungwa ka binanbile ama dire, Pita ibal kobe kiraan aa tere iru di tongwa, “Ibal malia maalere kal ki wen erungwa i piserangire, God i aa ki dinangure sigare kule u wai nanwa.”

⁴¹Yalini ka main dungwa ibal binanbile pire gi dungure, nil bile tongwa. Tongure ibal binanwenbile, tiri tausen, kwi kwi maalungure Yesu ka main ibal taminin u bil ongwa. Pire gi di Kirisito tongwa ibal mile pai erungwa main

⁴²Nusi erungwa ongwa yal kobe, Aposel, ka main nil si tongwa pirere, te bole pena galere, te komina birete bege dire bole para nere, ana di God te milungwa. Iru erungwa oisa tongwa.

⁴³Aposel kalkan erungure ibal kobe buul kunungure, te kal guman kwi dungwa i maribe erungwa, ena ibal para wen God kuril de kanungwa.

⁴⁴Pire gi dungwa ibal para bole pena gale bona gana inin aa te nomba, imu dire ibal para maale gol aa te nongwa.

⁴⁵Bona gana te gariba aa te nongwa, ibal tere kobile moni ire obin si, kal aa te nekungwa ibal tongure kuunin kuunin milungwa.

⁴⁶Are kaun kaun ibal kobe bole para pi Yuda ibal ka main ogu bil ala pire, ana di God tere te ogu dungwa dungwa mere komina birete bege dire nerere, te komina bole para obin si nere, gun yere wai wen pire milungwa.

⁴⁷Ibalin kobe God deminin si tongure, ibal kobe para kanere wai pire gun ye tongwa. God ibal aa ki dungure sigare kule u wai pire, are kaun kaun Yesu ka main ibal taminin u bil ongwa.