Read Golin 1 Korin 15 Bible Online

1 Korin 15 - Golin bible

1 Korin 15

¹Ena na enan kobe, Yesu Kirisito guun kan goma kere di maribe ere i ibal kobe tega, malia i kwi nomanin si pirana di piriwe. Ka main iray i kawen dima di pirere, aa gi di pire warinwe.

²I pire nomanin suna yere pire gogo ta erekinanga, ena ka main iray i aa ki di tenangure, sigare kule u wai nanwe.

³Yesu guun kan main di na tongwa mere, na goma si aine di i tega piro. Ka main minin ganin bilungwa mere na ibal kobe kal digan ere taalime erebinga, yalini pirin gule ere na terala dire, gulemua.

⁴Te ka main minin ganin bilungwa mere, ibal kobe yalini yobilaan irere yene yobilaan kobile giran ali yongure, are kaun sutakobe wei sungure, yalini u kwi pire alungwa, God kal iru ere tomua.

⁵Alere goma u maribe pi Pita terere pare, nusi erungwa ongwa yal kobe, Aposel, anan kole kole muru kawnan milin sutan milungwa gul u maribe pi tomua.

⁶Terere pare yalini gawlima kobe binanbile, paib kandret, u ku bile milungwa gul para u maribe pi tomua. Ibalin kobi taw binanbile imo milungure, ibalin kobe taw kaya gulemua.

⁷Ibalin kobi u maribe pi terere pare, Yemis u maribe pi terere, ena nusi erungwa ongwa yal kobe, Aposel para muru u maribe pi tomua.

⁸Na yal digan miliga eme wen yalini u maribe pi na tomue. Eme u maribe pi na tongwa mere iwe, abal ta baan tawle digan si mile gaan kaya gin taran kule nongwa mere, God na gin taran kule yongure miliwe.

⁹Aposel kobe milungwa mere, na para iru mere miliiba, yalin kobe yaa ime si na tomue. God ka main ibal kobe milungure, goma na ibalin kobi gain giil pire tere si kiranin biliga, ena ibal kobe mile, “I Aposel ta milekinwa,” di na tenamba.

¹⁰Ka iru diiba, God kenin ere aa te wai ere na tomia, ena na ere miliga mere miliwe. Yalini kenin ere aa te wai ere na tongwa na imore ta milekire, na konagi nega dire eriwe. Aposel kobe konagi erungwa na maa kora kule eriwe. Eriiba na inan konagi iru ta erekigire, God kenin ere aa te wai ere na tere aa ki di na tongure eriwe.

¹¹Yalin kobe ka dungwa mo, na inan ka diga mo, main i tamama, ka main diga i, na yal kobe para kere di maribe erebingire, te i ibal kobe ka main iray pire gi di milinga, i wi yebe omue. Ibal gulungwa kobe eme kwi alangwa

¹²Ena na yal kobe para mile, “Kirisito gulere alungwa, God kal iru ere yalini tomua,” dire kere di maribe ere ibal kobe tobinga, ena i ibalin kobe mile, “Ibal gulungwa u kwi pire kwi ta alekinamua,” dire, tameran ka iru dine?

¹³“Ibal kobe gulere u kwi pire ta alekinamua,” dinga i kawen dinanga, ena Kirisito ta gule alekinangwa, ka dinga i para kawen dinamba.

¹⁴Te Kirisito ta gule alekinangwa kawen dinanga, ena ka main ta kere di maribe ere i teralba, ka main kirara wen ta dekenangure, te ka main ta i, pire gi di tenanba, ka main kirara wen ta dekenamba.

¹⁵Ka dungwa i kawen dinangwa, ena kal main iru painangwa, na yal kobe mile, “Kirisito gulere alungwa, God kal iru ere yalini tomua,” dibina, ena na yal kobe kakiibi di ka digwane waa God tobinga main i, u maribe namba. Ibal kobe mile, “Ibal gulungwa u kwi pire ta alekimua,” dire ka iru dungwa i kawen dinangwa, ena Kirisito gulere alama dire, God kal iru ere ta yalini ta tekimba.

¹⁶Ibal kobe gulungwa God ulin yuungure, ta alekinangwa, ena Kirisito para ta alekinamba.

¹⁷Kirisito gulungwa God ulin yuungure, ta alekinangwa, ena i pire gi dinga kal main i imore pire yaa ime sinangure, te kal digan ere taalime eringa i pirin imo pai dinangure,

¹⁸te ibal kobe pire gi di Kirisito tere gulungwa, ibalin kobi kirara kawen gule wei sinamba.

¹⁹Gariba gul milebinga kaun Kirisito kal wai ere na terala dire, iru tawle pi tegi yerabinga, ena ibal kobe miriin pire ibal taw tenamba, miriin bilkaw pire na ibal kobe na tenamue.

²⁰Ena na ka iru diiba, kirara kawen di i terala piro. Ibal kobe gulangwa God mile, “Ibal kobe gulere alangwa kal iru ere terabinwa,” dungure ka dungwa i, ibal kobe kawen dima di pirama dire, God ulin yuungure, Kirisito goma kawn kule gule alemue.

²¹Ibal kobe gulungwa main iwe, yal taranta, Adam, goma u maribe pi kal digan erungwa, gulungwa main u maribe omue. Kal main iru erungwa mere ibal kobe gulere alangwa main iwe, yal taranta, Kirisito, goma u maribe pi kalkan erungwa gulere alungwa main u maribe omue.

²²Ka diga i main iru paangwa, Adam milungure, ibal kobe para yalini gawliman mile bole yomia, ena ibalin kobi para gulemue. Kal main iru painangwa mere, Kirisito milungure, ibal kobe para yalini gawliman milemia, ena ibalin kobi gulungwa God ulin yuungure, u kwi pire alamue.

²³Alamba duulin bilungwa mere, alamue. Goma Kirisito alungure pare, te Kirisito kwi gariba gul ere ime unangwa kaun, yalini ibalin kobe para alamue.

²⁴Alangure pare kamin kaun i wei sinangure, ena singaba te kobaan te ke milungwa ibal, ibalin kobi yobilaan bile konagi erungwa main para muru Kirisito yaa ime sirere pare, kalkan para muru kenin ere ke milungwa main yalini pusi Nen God aan mina eramue.

²⁵Kirisito kalkan para muru kenin ere ke mili nangwa nangwa, ena kaymin ibal para muru God si kiranin bilangure pare, kalkan para muru kenin ere ke milungwa main, Kirisito pusi Nen God aan mina eramue.

²⁶Kaymin ta eme wen si kiranin bilangwa iwe, ibal kobe gulungwa main iray si kiranin bilangure, gulungwa main i wei sinamue.

²⁷Kal iru eramia, ena ka main minin ganin iru bilungwa paangwa, “Kirisito kalkan para muru kenin ere ke milama dire, God kal iru ere yalini tenamua,” dire bilemue. Kalkan para muru kan dungwa main iwe. Main iru paangwa, God inin kanin ta dekungure, yalini inin kalkan para muru ere Kirisito tomia, ena yalini inin kanin ta dekungwiwe.

²⁸Kirisito kalkan para muru kenin ere ke milangure pare, God inin kalkan para muru kenin ere ke milama dire, Wan kalkan para muru iray pusi Nen aan mina erere te, “Na para na kenin ere ke milo,” di God tenamue.

²⁹Ena ibal gulere ta alekinamia, ena ka main ibal kaya gule nil ole bilekungwa nil bile terala dire, tameran ka main ibal taw ibalin kobi pi ain pire aa ki di terala dire, nil bileme? Takal u maribe nama di pireme? Ibalin kobi nil imore ta bilekimia, ibal gulungwa kobi kwi alama di pire, nil bile aa ki di tomue.

³⁰Te ibal kobe morin morin na sirala dungwa milebingi we, ibal gulere ta alekinamia, ena na konagi iru ta erekirabinba.

³¹Na enan kobe, i te na ibal kobe para Yesu Kirisito bole pena galebinga, na wai pire miinin maare i ibal kobe teiwe. Tega ena na ka iru di gawa di i tega, ibal kobe na si gulam mo, ta na si gulekinam mo, are kaun kaun na inan iru pire mile, “Ena para wa,” di maribe eriwe.

³²Na gulere ta alekirabinga, ena na Epesas mile na bolima awi biin eli paangwa bole kura bilega mere, bolebilin dire na ka main konagi iru eriga, u main nangwa paamba. Te main iru painangwa na mile, “Erima gulabinga, ena kemina komina bil nere nil neralwa,” dire ka iru diralba.

³³Ka si aine aine dungwa iru paangwa, “Ibal ki ere milungwa, ibal taw bole para kol warungwa, ena ibal taw i main wai paangwa mere i ki eremua.” Ka iru dungwa paimia, ena ibal kobe bawle i tenama dungwa i pirekio.

³⁴I nomanin paikungwa mere pisere, nomanin paangwa mere pire milo. Kal digan ere taalime eringa, kirara pisere kwi ta erekio. I ibal kobe gay gulana dire, na ka iru di i teralga, “I ibal kobe taw God main paangwa pirekun ta erekinwa.” Ibal gulere alangwa miin gain ka kwi kulangwa

³⁵Dimba ibal ta ka iru sirin bile na tenangwa, “Gulungwa ibal tamintan God ulin yuungure, u kwi pire alame? Te alangwa, ta miin gain te yobilagi kwi kule alame?”

³⁶Dinangwa ena na ka maan ka iru di kole ere teralga, i yal du dungwa milinwa. I komina milin yalala dinga, i kaya obin yere kirara ta gulekinangwa, ena i yalinga pi sire ta maakinamua.

³⁷I komina yalala dinga, maa piserungwa mere, eri arin te erin ta yalekire, dodal milin mo milin iru tawle yalinwa.

³⁸God komina milin kaan kaan para muru gain inin inin kule terala di pirungwa mere, ere kule tomua. Komina milin kaan kaan inin inin gain kulangwa mere, yalini inin kule tenamua.

³⁹Kalkan para muru kwi milungwa miin gain taran ta kulekemua. Ibal miin gain ta kulungure, te awi bolima te biin bera miin gain ta kulungure, te kauba miin gain ta kulungure, te nil kabe miin gain ta kulemua.

⁴⁰Kamin mina kalkan kobi miin gain ta kulungure, te gariba gul kalkan kobi miin gain ta kulemua. Kamin mina kalkan kobi ibal kane wai pire tenama dire, egin main ta galungure, te gariba gul kalkan kobi ibal kane wai pire tenama dire, egin main ta galemua.

⁴¹Are sungwa i egin main ta galungure, te ba dongwa i egin main ta galungure, te kulmama kobe dongwa i egin main ta galungure, te kulmama kaan kaan main inin inin egin galemua.

⁴²Iru paimia, ena ibal gulungwa God ulin yuungure, u kwi pire alangwa mere, main i maribe eremua. Yobilagi maul si yongwa i bile yaanamba, God ulin yuungure alangwa kaun i, imo di painangwal painamua.

⁴³Yobilagi maul si yongwa kaun miin gain kaan ta paikungure, niminin ta milekimba God ulin yuungure alangwa kaun i, kaan painangure kirara niminin mile milamua.

⁴⁴Yobilagi maul si yongwa kaun gariba gul ibal miin gain dungwa mere dimba, God ulin yuungure, alangwa kaun iban te nomanin miin gain taw kwi kulamua. Gariba gul miin gain ta dimia, ena iban te nomanin miin gain ta dinangiray.

⁴⁵Ka main minin ganin iru dire bilungwa paangwa, “Yal ta goma kaan Adam giran miin u suna ongure, kwi u kwi omua.” Omba Adam ta eme ungwa Yesu kan diga, ibal kobe u kwi pire milama dire, iru ere ibal kobe tenamua.

⁴⁶Dimba iban te nomanin miin gain goma u maribe ta pekenangure, gariba gul miin gain goma u maribe nangure pare, eme iban te nomanin miin gain u maribe namua.

⁴⁷Yal ta goma ere yongwa, God gariba irere Adam ere yongure, te yal ta eme ungwa Kirisito kamin mina pisere ere ime umua.

⁴⁸Ibal kobe gariba gul milungwa, yal ta gariba ere yongure milungwa mere, ibalin kobi para iru milungure, te ibal kobe ere kamin mina ongwa, yal ta kamin mina pisere ere ime ungwa mere, ibalin kobi para iru milamua.

⁴⁹God yal ta gariba ere yongure milungwa mere, na ibal kobe gumanan iru kulebinga, ena yal ta kamin mina pisere ere ime ure milungwa mere, gumanan iru si paale ire kulabinwa.

⁵⁰Na enan kobe, na ka diga main iru paimia piro. Gariba ibal miin gain te mayan kule milungwa, pi God kenin ere ke milungwa ain ala ta pekenangure, te yobilagi maul si yongure, bile yaangwa milungwa kwi imo ta mile paikinamua.

⁵¹Kal main ta aal kule paangwa, di maribe ere i terala piro. Na ibal kobe para ta gulekirabinba, gin taran miin gain ta kwi kulabinwa.

⁵²Bu ta eme dinangwa kaun, omilin kiimin sungwa mere, gin taran iru miin gain ta kwi kulabinwa. Bu ta i dinangwa kaun ibal kobe pire gi di Yesu tere gulungwa, God ulin yuungure u kwi pire alangure, te na ibal kobe para miin gain guman ta kwi kulabinwa.

⁵³Kal iru erabinga painangwa, na ibal kobe miin gain te yobilagi gule bile yaanangwa piserere, ena miin gain te yobilagi ta gulekire imo mile pairabingal pairabinga, guman ta iru kwi si paale ire kulabinwa.

⁵⁴Na ibal kobe miin gain te yobilagi gule bile yaanangwa piserere, te miin gain te yobilagi ta gulekire imo mile pairabingal pairabina dire, ta iru kwi si paale ire kulabinga kaun, ka main minin ganin bilungwa u maribe nangwa piro. “Ibal kobe gulungwa main God kirara si kiranin bilemia, ena ibal kobe kirara wen ta gulekinangwa paamua.”

⁵⁵“Ibal kobe gulungwa main na ibal kobe na ta si kiranin bilekenamua. Ibal kobe gulungwa main gain giil pire na ibal kobe ta na tekenamua.”

⁵⁶God kile kaman ka di ibal tomia, ena kal digan ere taalime erungwa main i maribe ere ibal tomue. Tere kal digan ere taalime erungwa pirin pai ibalin kobe tomia, ena gulungwa main gain giil pire ibal tomue.

⁵⁷Tomba Singaba, Yesu Kirisito kalkan ere na ibal kobe na tomia, ena ibal gulungwa main si kiranin bilabina dire, God yobilaan bile na tongure, na deminin si maki ye God tobinwa.

⁵⁸Na enan kobe, na ye nobinga milinga, ka main goma di i tega iru paamia, kwi dirala piro. Ka main pire niminin mile kirara girin di milo. Yesu Singaba konagi eringa, kal imore ta dekenama di piringa, ena konagi nega di ere yalini to.