Read Golin 2 Korin 8 Bible Online

2 Korin 8 - Golin bible

2 Korin 8

¹Ena na enan kobe, God kal wai ere Masedonia gariba gul ka main ibal taminin ta ta para tongwa, main i pirana di pirebina piro.

²Ibalin kobi ka main pire gi dungwa u main nam mo, wi yebe nam mo, kanama dire, gain giil bilkaw pirimba, ibalin kobi miriin wen paimia, ena kobile moni i ku bile te kora kule Yudia ibal tomue. Ibalin kobi kulgal bona aa te nekimba, iru tomue.

³Kalkan aa te nongwa mere, iru kuunin tongwa kanere, te ibalin kobe inin nomanin si pire maa kora kule te mine erungwa, para kanebinwe.

⁴Kanere, te Masedonia ka main ibal kobe, God ibalin kobe Yerusalem milungwa, aa ki di ibalin kobi terala dire, “Kobile moni iyo, iyo,” dire, yobilaan bile di tomue.

⁵Ibalin kobi iru tenama di piriga mere, ta tekungwi. God Singaba nil konagi ere terala dire, goma bole yomue. Yere pare ibalin kobi kal ta erangwa God “Owa,” dungwa, aa ki di na tenama dire, eme na bole yobilwe.

⁶Ibalin kobi iru eremia, ena Taitas goma i ibal kobe kobile moni i ku bilana dire, yalini kawn kule konagi erungure, “Malia i konagi iray ere wei so,” dire di yalini tobinwe.

⁷Kal para eringa i ibal maribe milingi. I ka main pire gi dinga, pi nima ongure, te ka main kere di maribe eringa, pilaan paangure, te ka main pire bawa dingire, te aa ki di ibal terala dire, konagi nega di eringire, te denin miriin maa kora kule na tengire, te iru ere milina, ena malia aa ki di Yerusalem ibal terala dinga, konagi nega di ere maa kora kule ere tenan mo.

⁸Ena ka diga i, i kiranin aa tere kile kaman ka di i tekiiba, i denin miriin ibal tenga kawen kirara ten mo, tekin mo, na kanala dire, Masedonia gariba baan ta ka main ibal kobe nega dire ibal taw aa ki di terala dungwa mere, di maribe ere i teiwe.

⁹Singaba Yesu Kirisito kal wai ere ibal tongwa main, i pire pol singiwe. Yalini kalkan para wen kobaan yal milimba, God i ibal kobe nomanin wai tongure milana dire, ere ime ure u ibal pire kalkan aa te nekungwa mere omue.

¹⁰Kal tenanga iray na main kaniga mere, di i terala piro. Me erin ta goma i ibal kobe kawn kule, “Kobile moni terabinwa,” di pire kobile moni taw i ku bile maule yenwe.

¹¹Iru eringa, ena maliaga i ku bile to. Goma i yobilaan bile terala dinga, ena malia kalkan aa te nenga mere, kobile moni maule i ku bile to.

¹²Yal ta terala di pire nega di eramia, ena i kalkan aa te nenga mere tenanga God kanere, “Aa te nongwa mere na tomua,” dire wai piramue.

¹³“To,” di i tega iwe. Ibal taw aa ki di tengire, dorimil milama dire, pirin bil pai i teralga, tamama. Dimba malia kalkan binanbile aa te nenga, ena aa te nekungwa ibal aa ki dire tenanga, kuunin painamue. Iru eranga, ena kamin kaun ta eme i kal tawle aa te nenanga kaun, ibalin kobi kalkan maan i tenamue. Iru painangwa i ibal kobe te ibalin kobi kuunin kuunin milanwe.

¹⁵Milanga main i pire ka main minin ganin iru dire bilungwa paangwa,“Yal ta komina poraa bulimba, komina imo ta dekungure, ne kuunin biimua. Te yal ta komina tawle bulimba, kenan ta gulekire, ne kuunin biimua.” God konagi erungwa yal taw Korin ai unamua dungwa

¹⁶Na yobilaan bile aa ki di i terala di pirebinga mere, God yobilaan bile Taitas tongure, yalini bole ereko aa ki di i terala di piremue. Iru di piremia, ena na wai pire maki ye God tobinwe.

¹⁷Na yal kobe mile, “I Korin ai ka main ibal konagi ere tenana nano?” dire sirin bile Taitas tobinba, yalini kaya inin goma nomanin si pire nala di piremue.

¹⁸Taitas taran nusi erabinga, taman. Yesu guun kan ware biinama dire, yal ta ka main kere di maribe erungure, ka main ibal taminin ta ta para yal i kaan pire yebe erungwa, yal iray Taitas bole nusi erabinwe.

¹⁹Nusi erabinga yal iwe, na yal kobe aa te wai konagi erebinga i, yalini na bole warabina dire, ka main ibal taminin kobe yalini i maribe ere imue. God Singaba kaan ibal ai yebe dinama dire, te aa te wai konagi erebinga i, nega di erebinga i iru kanana dire, konagi iru erebinwe.

²⁰Kobile moni i ku bilungwa i kenin ere aa tekun erebinga, ibal iru kanama dire, main paangwa mere erebinwe.

²¹God Singaba maabin mina tawle kal wai erabinga, taman. Ibal kobe maabin mina para kal wai erala di pirebinwe.

²²Te ka main enan ta ama para yal sui kan diga bole nusi i milinga gul para erabinwe. Yal ta kan diga iwe, yalini ka main konagi nega di erungwa, kane kane milebingire, yalini i Korin ibal pi tegi yomia, ena malia inin nala di pire niminin mile milemue.

²³Ena Taitas milungwa iwe, yalini bole pena gale na terere, te i ibal kobe aa ki di i terala dire, ka main konagi bole erebilwe. Te ka main enan sui kan diga i, Taitas bole nusi erebinga yal sui iray ka main ibal taminin taminin ka kebe ye yal sui tongure milere, Kirisito guun kan aa yebe di terala dire, konagi ere milemue.

²⁴Milemia ena aa te wai ere tere bole pena gale yalin kobi to. Tenanga ka main ibal taminin ta ta para kanere, te na i ibal kobe guun kan gale yebe erebinga, “Na ka diga paamua,” di piramue.