Read Golin 2 Timoti 1 Bible Online

2 Timoti 1 - Golin bible

2 Timoti 1

¹Na Pol miligire, Kirisito Yesu nusi erungwa ongwa yal, Aposel, na milama dire, God iru pirala di pire, na paale suna ere ingure, na miliwe. Na ibal kobe Kirisito Yesu bole pena galebilga sigare kule u wai pi milere mile pairabingal pairabina dire, God iru ere na terala dungwa, na kere di ibal kobe tenama dire, God na nusi eremue.

²Na ka minin ganin i, bile na wanan taran, Timoti, teiwe. Abe God, te na ibal kobe Singaba Kirisito Yesu mile kenin wai ere i terere, te miriin bilkaw pire i terere, te denin miriin wai painama dire, kalin sutakobe iru ere i tenama di piriwe. Yesu ka main di gawa di ibal terabina dire, gay ta gulekirabinga paangwa

³Na sanamoi gilekume nomanin naabile konagi ere God tongwa mere, na para iru ere yalini tere maki ye God teiwe. Girungwa taangwa na ana di God tere, i kanin pire maki ye God teiwe.

⁴Na goma i bole mile pisere uga, i simil kay miinga nomanin si piriga, i kanala di piriga paamue. I kanalga na inan wai pire gun yeralwe.

⁵I ain Elois, te i manin Yunis, kirara kawen ka main goma pire gi dungwa mere, i para iru eme pire gi dinga, nomanin si pire te miliwe. Ka main iru, i pire gi dina di pire, kawen iru pire miliwe.

⁶Iru paima di piria, ena i ka main konagi ta miremil erana dire, na i gibilin anan aa taw siga kaun, God yobilaan bile i tomue. Tongwa i pire, “I konagi iray dime dire ere milana dire, suna niminin mile mile ero,” di i teiwe.

⁷God yalini inin Iban na yasu na tongwa, na yasu kuril ta pirekebilgi, yobilaan bilere, te denan miranan ibal terere, te gaynan kal pirebilga maangwa inan manaa di tobilwe.

⁸Ena kal main iru ere i tomia, na Singaba Yesu ka main di gawa di ibal terala dinanga, gay ta gulekio. Te na Yesu guun kan kere di maribe eriga, na kanin pai miliga pire, gay ta gulekio. God yobilaan bile i tongwa mere i, “Yesu guun kan kere di maribe ere gaynan giil pire milalga paamua,” di pire milo.

⁹God ibalin kobe na ibal kobe iru milama dire, na ibal kobe gala dire aa ki di na tongure, sigare kule u wai obinwe. Aa ki di na tongwa main iwe. Na inan kal wai erebinga pisere, yalini inin kal wai ere na terala di pire, aa ki di na ibal kobe na tomue. Kirisito Yesu bole pena gale milebinga, gariba gul ta ole ere yekungwa kaun kal wai ere na tongwa main iray, malia ere na ibal kobe na tomue.

¹⁰Ere na tomba, aa ki di na ibal kobe na tongwa yal, Kirisito Yesu u bawa dungwa kaun, kirara kawen i maribe ere na tomue. I maribe ere na tongwa main iwe, ibal kobe gulungwa main kirara wei sinama dire, Kirisito kal iru ere terere, te kal wai mile pai ere mile painangwal painangwa, ibal kobe para iru milama dire, inin guun kan kere di maribe ere ibal tomue.

¹¹Ka main i, nusi erungwa ega yal, Aposel na mile, kere di maribe ere ka i nil si ibal tenama dire, God konagi iru ye na tomue.

¹²Iru ere na tongwa eriga, ena malia gain giil pire na tongwa i, na pire miliwe. Pire miliiba, na gay ta gulekiga main iwe. Na pi tegi yega yal milungwa main kane pol siga, ena “Ka main kenin ero,” di na tongwa na kenin erigire, mama dinama dire, yalini kenin ere na tenamue. Kenin ere na te mile, Kirisito ere ime unangwa kaun, para kenin ere na te milamue.

¹³Ka main kirara kawen nil si i tega piringa, kol i duulin bile egilala dire, i guman mina yeyo. Na ibal kobe Kirisito Yesu bole pena gale u taran obinga, ena ka main pire gi dire, te denan miranan ibal terabina dire, mile pai iru ero.

¹⁴God mile, “Ka main wai paangwa kenin ero,” di i tongwa mama dinama dire, inin kenin wai ere milo. Ere milanga main iwe, God Kegemama Iban na ibal kobe denan miranan ali pai milere yobilaan bile ere i tongwa, kenin wai ere milanwe.

¹⁵Ena Esia ka main ibal para mun kal waa na tongwa, i kaningiray. Piselas te Kemosenis yal sui para mun kal waa na tomue.

¹⁶Onesiporas gawliman kobe kaun kaun yobilaan bile na tomia, ena God Singaba miriin pire ibalin kobi tenama di piriwe. Na kanin pai milega, yalini gay ta gulekungwi,

¹⁷Orom u bawa dungwa kaun yalini gin taran na waa duure na kanemue.

¹⁸Yalini Epesas mile ka main konagi ere ibal tongwa, i para kaningiray. Kirisito kwi ere ime ure ka kol ere ibal tenangwa kaun, God Singaba miriin pire tongwa mere iru pire yalini tenama di piriwe.