Read Golin 2 Timoti 2 Bible Online

2 Timoti 2 - Golin bible

2 Timoti 2

¹Na wanane, ka iru diga paamia, ena na ibal kobe Kirisito Yesu bole pena gale u taran pire milebinga, kal wai ere na ibal kobe tomia, ena i yobilaan bile milo.

²Ibal binanbile guman mina na ale mile ka main nil si tega, i para pirinwe. Yal taw kobe i pi tegi yerala di piranga, te yalin kobi ka diga i nil si ibal tenangwa painangwa, si aine dire di yalin kobi to.

³Kirisito Yesu bole yere kal wai ere milinga, i para gaynin giil piranwe.

⁴Gaynin giil piranga main iwe. Simil nen ta kura bile milungwa kaun simil nen yal singaba wai pire na tenama dire, ibal imore mile konagi erungwa main yalini kal iru ta erekire, kura bilungwa main pire niminin mile bilamue.

⁵Te yal ta mugu di pire goma nala di pirungwa, yalini mugu di ongwa kile kaman ka pire wiina ta erekinangwa, ena yalini kal tobe ta ikinamue.

⁶Te yal ta komina gul konagi nega di erangwa, ena komina awan denangwa yalini goma nenamue.

⁷Na ka diga i, main nomanin si pire milo. Main i pire bawa dinana dire, Yesu Singaba aa ki di i tenamue.

⁸Ena Yesu Kirisito gulere alungwa, te yalini yal bil Debiti gawliman milungwa, i nomanin si pire milo. Yalini main iru milungwa mere, na ka main kere di maribe ere ibal teiwe.

⁹Na ka iru kere di ibal tega, ena na gaynan giil pirere kal ki erungwa yal kan kule paalungwa mere, kan iru na kule na tongure, miliwe. Miliiba God ka dungwa kamin kole kole para ware biikinama dire, kan ta kulekinangwa paamue.

¹⁰Ka main iru paimia, ena God paale suna ere ingwa ibal Kirisito Yesu para pire gi di tongure, God aa te pilaan pai tenangwa sigare kule u wai nama dire, te ibalin kobi para God naabile aw dungwa bole mile painangwal painama dire, na gaynan giil pire milalwe.

¹¹Ka ta di i teralga kirara kawen dirala piro.“Na ibal kobe Yesu Kirisito bole gulebinga, ena yalini si kwi yere mile pai erungwa mere, ere milabinwa.

¹²Ka main aa gi di pire milabinga, ena yalini kenin ere ke milangwa kaun na ibal kobe yalini bole para kenin ere ke milabinwa. Na ibal kobe yalini ka dungwa di kile di mena erabinga, ena yalini para iru ere na ibal kobe na tenamua.

¹³‘Na ibal kobe kal iru erabinwa,’ dire ka dibinga mere iru ta erekirabinba, yalini inin ka dungwa mere inin eramua. Iru erangwa main iwe, yalini inin ka dungwa inin di kile di mena erangwa, main ta paikinamua.” Yal ta ka main konagi wai erangwa God gun ye yalini tenangwa paangwa

¹⁴Ena malia ka diga i, ibal kobe nomanin si pire milama dire, ka di tere, te God maabin mina mile, “I kura ka ta dikio,” dire ka iru di ibalin kobe to. Kura ka dinangwa kal wai ta u maribe pekenangure, ka dinangwa main i pirere yaa ime sinamue.

¹⁵Ka main konagi eringa God kane, “Paimua,” dire ka iru di i tenama dire, konagi nega di ero. Ibal ta konagi erungwa, gay ta gulekire erungwa mere, i iru ere milo. Te God ka main nil si ibal tenga, milin u maribe nama dire, i ka main iru nil si to.

¹⁶God milungwa main ka ta dikire ka gogo dungwa, i mun kal waa to. Ka iru dinangwa, ena God main paangwa si kunal sire kal piril sungwa main kirara wen ere milamue.

¹⁷Nimbona ta kere tore sire si dinadi u bil ongwa mere, ibalin kobe ka digan nil si ibal tenangwa, iru si dinadi u bil namue. Ibalin kobe milungwa mere, yal Kaimenias te yal Pailitas yalin sui para kal iru ere milemue.

¹⁸Yalin sui ka main kawen dungwa, duulin bile pire ta warekire, te “I ibal kobe eme ta alekinanga paamua,” dire kakiibi dungwa, ena ibal taw kobe ka main pire gi dungwa piseremue.

¹⁹Kal iru erimba, God ka main mama dungwa, yalini inin iru pire eremue. Erungwa main iwe. Yalini ka iru dire bile paalungwa, “Na ibalan kobe guman kane pire pol siwa.” Te, “Ibal kobe mile, ‘Na Yesu Singaba ibalin kobe miliwa,’ dinangwa, ena ibalin kobi kal ki erungwa pisere kwi ta erekinangwa paamua.”

²⁰Ena yal singaba ogu ala muine taw binanbile dinamue. Muine taw kobile gol ere yerere, te taw ain yobilagi muine ere yerere, te taw eri muine baale ere yerere, te taw gariba muine ere yomue. Muine taw ibal aa tere konagi wai erungure, te muine taw ibal aa tere konagi wai ta paikungwa eremue.

²¹God ka main ibal taminin para main iru mere milemue. Ibal ta kalin nigi dongwa kan diga i pisere nomanin naabilangwa, ena muine ta ibal aa tere konagi wai erungwa mere, ere milamue. Ibal i iru mere milangwa, ka main konagi main wai dungwa paangwa eramue. Te kal dime dire ere milama dire, God yalini paale suna ere imue. Te konagi wai ere yal singaba tenamue. Te konagi wai dungwa main main para erala di pire milamue.

²²Yal garamil gain kal erala di pirungwa maangwa, kal main iray i u maribe pi i terala di erangwa, inin manaa di to. Te ibal kobe den miriin suna kabin sire wai wen milungwa, kal dime dire ere milala dire, te ka main pire gi di milala dire, te denan miranan ibal terala dire, te ibal kobe bole ka wai dire ere milala dire, sirin bile God tere, “Aa ki di na to,” dungwa, ena ibalin kobi mile pai iru ere milabina dungwa mere, i para iru ere milo.

²³Kal iru ere milanba, ibal kobe nomanin paikungwa ibal mile ka dire ka gogo dire bolebilin di nangwa nangwa, kura ka u maribe namia, i bole ka dikio.

²⁴Yesu Singaba nil konagi yal inin kura ka ta dekenangwa paamue. Yalini mone di mile aa te wai ere ibal terere, te ka nil si tenangwa, painama di pire milere, te kal digan ere tongure pire unin si milamue.

²⁵Milere kaymin paale tongwa ibal ka di kuunin ere tenangwa, ka mone di di tenamue. Ibalin kobi kal digan erungwa, nomanin suna si kiruul sire ka main kawen dungwa pire pol sinama dire, God kol ta bala di tenama di pire, ka mone di di tenamue.

²⁶Ibalin kobe kal iru erangwa, ena goma nomanin paangwa mere kwi nomanin si kiruul si pire, te Satan ibalin kobi kan kule paalungure, yalini ka dungwa pire wiina ere tongwa, kirara pisere u wai namue.