Read Golin Kibiru 8 Bible Online

Kibiru 8 - Golin bible

Kibiru 8

¹Ena ka di i tega, main wen kwi di i terala piro. Ka main kenin erungwa yal bil ta mile, naanin wen paangwa yal, God guman mina Yesu amin di mile, na ibal kobe milebinga i pire, ka sirin bile God tomue.

²Ka main ogu bil ala kiile kulan ta dungwa mere, God kamin milungwa ain, Yesu na ibal kobe ka main kenin erungwa yal ali mile konagi ere milemue. Ogu iray ibal kiikimia, ena God Singaba inin kiimue.

³Yuda ka main kenin erungwa yal bil kobe para kalkan tere kabe si gale God tenama dire, paale suna ere imia, ena na ibal kobe ka main kenin erungwa yal bil Yesu para iru tenangwa paamue.

⁴Mose ka main dungwa mere Yuda ka main kenin erungwa yal kobe gariba gul mile kalkan God te milemia, ena Yesu gariba gul imo mile painangwa konagi iru ta erekinangwa paamue.

⁵Yalin kobi konagi erungwa iwe. Kamin ai ka main konagi erungwa mere, yalin kobi, “Iru erebinwa,” dire si paale ire ere milemue. Mose goma konagi erungwa mere, yalin kobi ere milemue. Goma Mose ka main ogu, sel ogu ta kiirala dungwa kaun, God ka iru di yalini tongwa, “Ogu kiinanga iray goma kamin kuul bole mile, ‘Iru iru kio,’ di i tega mere, i iru wen kio,” dire di tomue.

⁶Yalin kobi konagi iru ere milimba, Yesu ka main kenin erungwa yal konagi ere milungwa wi yebe omue. Wi yebe ongwa mere main iwe. God ka wai di bole pena gale ibal tenama dire, kile kaman ka di tongure, Yesu kalkan i ka di kuunin erungwa, ena main paangwa i wi yebe ongwa mere omue. Mose kile kaman ka wai paamba, God, “Kal wai wen ere i teralwa,” dire aan kere ye na ibal kobe tomia, ena main ta paangwa i, wi yebe omue. God ka wai di bole pena gale ibal para tenama dire main ta kwi paangwa u maribe ongwa

⁷God goma ka wai di bole pena gale Isirel ibal tenama dire, kile kaman ka di tongwa para kuunin eramia, ena main ta kwi paangwa ta erekinamba.

⁸Isirel ibal kobe kal ki erungwa kanere, God ka iru di ibalin kobi tongwa,“Isirel ibal te ibalin kobi gawliman ta kaan Yuda para ka wai di bole pena gale ibalin kobi terala dire, kile kaman ka kwi di teralga kaun iray, u maribe namua.

⁹Kile kaman ka kwi di teralga, goma ka di ibalin kobi sanamoi gilekume di tega mere, ta di tekeralwa. Goma ibalin kobi sanamoi gilekume Isipi gariba pisere, kwi abila awli uga kaun iray, kile kaman ka di tega mere, iru ta di tekeralwa. Ka di ibalin kobe tega pire wiina ta erekungwa, ena ibalin kobe ka dungwa na pire unin si miliwa.

¹⁰Milere pare na ka wai di bole pena gale Isirel ibal terala dire, kile kaman ka kwi di teralga, kal iru ere teralwa. Na kile kaman ka ibalin kobi nomanin suna yerere, te na kile kaman ka i den miriin suna painama dire, para iru yerere, te ibalin kobi God na miligire, te na ibalan gawlimanan ibalin kobi iru milamua.

¹¹Ibal maangwa yaangwa para na miliga main pire pol sinamia, ena yal ta mile, ‘God Singaba milungwa main pire pol so,’ dire ka iru di gawliman te enin kobe ta tekenamua.

¹²Ibalin kobi na kile kaman ka si keli simba, na miriin pire teralga, te ibalin kobi kal digan ere taalime erungwa, pire nomanin suna ta yekiralwa,” dire God Singaba ka iru dimue.

¹³God mile, “Kile kaman ka kwi iray di i teralwa,” dimia, ena goma ta di tongwa ka golin iray yaa ime simue. Yaa ime simia, ena gin taran wei sinangwa paamue.