Read Golin Yemis 5 Bible Online

Yemis 5 - Golin bible

Yemis 5

¹Ena i ibal kobe kulgal bona binanbile aa te nenga ibal ka di i terala piro. Kal main ki erungwa te taalime obin dongwa, u maribe pi i tenangwa pire mun bile kay bil miyo.

²Kulgal bona aa te nenga gule daalin sungure, te i gal para muru gunagaan te sulatawla ne sutaw eremue.

³I kobile moni gol te i kobile moni milin aa te nenga maimbol gale sungwa, ibal kanere ka kol ere i tenangwa kawn, ka di mere si i tenangure, te kobile moni bil irala di pire den inanin girungwa enderin kalkan dongwa mere, i den suna denangure de wei sinamue. Kamin kaun wei sinangwa, kaun i malia dungure milebinba, i kulgal bona te kobile moni i ku bile yenba.

⁴Yal kobe i komina gul konagi ere i tongwa, i tobe terala dinga ole tekinga, ena yalin kobi kay mi milungwa i pirino? I komina buule i ala ye tongwa ibal para kay mi milungwa, angel te kamin ibal Yobilaan Kobaan God Singaba pirere, main paangwa mere ere i tenamue.

⁵I ibal kobe gariba gul mile kalkan binanbile nere inin gaynin kenin ere milinwe. Si kiingwa kaun u maribe nangwa, i ibal kobe komina depil nere kulin bile milinba.

⁶Milere kabin sire wai wen milungwa ibal ka kol ere tere, “Eringa paikimua,” di tere ibalin kobi i si gulinwe. Kal iru ere ibalin kobi tenba, ibalin kobe pire unin si mile i maan ta si kole erekimue. Yesu Singaba kwi ere ime unangwa suul mile kane unin si mile yobilaan bilabinga

⁷Ena na enan kobe, Yesu Singaba kwi ere ime unama di pire, pire gogo ere milere, unama unama di pirekio. Komina yaalungwa ibal komina bule nerala dire, suul mile kane milungwa, i kaninwe. Komina yaalala dire, nimin sinangwa kaun suul mile kanere, te yaalungwa milin pi sinama dire, nimin eme sinama di pire, suul mile kane unin si milemue.

⁸Milungwa mere, i para iru pire suul mile kane unin si milanwe. Yesu Singaba kwi ere ime unangwa kaun u maala omia, ena i denin miriin suna yobilaan bile milo.

⁹Na enan kobe, i milinga suna nigi de pire inin inin te ibeya erekio. God ka kol ere i tere pirin pai i tekenama dire, iru ta erekio. Ka kol pirungwa yal urala di erungwa u ai penin milemia, i kaneya ero.

¹⁰Ka kebe yal kobe God Singaba ka dungwa mere, pire kebe ere yuungwa, yalin kobi kal erungwa mere piro. Yalin kobe gain giil pire kane unin si milungwa mere, i kol iru para egilala dire, nomanin si piro.

¹¹Yalin kobi gain giil pire den miriin suna yobilaan bile milungure, yalin kobi miriin paima di pire kanebinwe. Yal ta kaan Yopo gain giil pire yobilaan bile kane unin si milungwa pirere, te God Singaba eme kalkan ere Yopo yalini tongwa pirinwe. Kal iru ere yalini tongwa main iwe, God Singaba miriin pire ibal tere, te piranin pai ibal tomue. Maabinin mina aa taw sikire kirara kawen do, di tongwa

¹²Ena na enan kobe, ka ta di i terala, pire gumanin mina yeyo. I anin kere yere, “Kal iru eralwa,” dinanga, ka dire maabinin mina aa taw sikio. Kamin gul mo, gariba gul mo, kal ta ama para i ta kane pire maabinin mina aa taw sikio. God ka kol ere i tekire gain giil pire i ta tekenama dire, i owa di piranga, owa tawle do. Te i o, o dirala di piranga, o, o tawle do. Kabin sire wai milungwa yal ana di God tenangwa pi nima nangwa

¹³Ena i ibal kobe milinga suna, ibal ta gain giil pire nomanin si gogo ere milemo? Milangwa ena ibalini ana di God tenangwa paamue. Ibal ta miriin paingwa ibal milemo? Milangwa ena ibalini deminin si God terala dire ka main geril dinangwa paamue.

¹⁴I ibal kobe milinga suna, ibal ta nibil ere milemo? Ta nibil ere milangwa, ena ibalini ka main goma yongwa yal kobe, “Ere wo,” di gala di tenangwa paamue. Gala di tenangure, ure nibil erungwa yal guman mina ale mile ana di God tere eri niriin ta gain mina bile tenangwa, Singaba Yesu Kirisito yobilaan pai na tongwa mere pire eri niriin i bile tenamue.

¹⁵Yalin kobi ka main pire gi dire ana di God tenangure, nibil ere milungwa yal i u wai namue. U wai nangwa God Singaba aa te pilaan pai tere, te kal digan ere taalime erungwa pirin gule ere tenangwa paamue.

¹⁶I ibal kobe kal digan ere taalime eringa bolin kule di maribe ere inin inin te ibeya erere, te i ibal kobe inin inin milinga suna kanin pire ana di God to. God aa te pilaan pai i tenama di pire, i kal iru ere milo. Kabin sire wai wen milungwa yal ta ana di God tenangwa, niminin mile pi nima pire u maribe namue.

¹⁷U maribe nangwa mere, goma Ilaya ana di God tongwa iwe. Na ibal kobe milebinga mere Ilaya para iru mile, “Nimin ta sikio,” dire yobilaan bile ana di God tongure, ena me erin sutakobe, te ta kole nimin ta sikimue.

¹⁸Iru erere yalini kwi ana di God tere, “Nimin so,” dungure nimin binanbile sungure gariba mina komina pi si maamue. Ka main pire piserungwa ibal kwi duulin bilama dire, aa ki di terabinga

¹⁹Ena na enan kobe, i ibal kobe milinga suna, ibal ta ka main pisere kol ta duulin bile pire warangure, ibalini ka main kol kwi duulin bilama dire, yal ta pi awli suna unangwa,

²⁰ena pi awli unanga yal i, ka di i terala piro. Kal digan ere taalime erungwa ibal, kol ta paikungwa duulin bile warungwa pisere, kwi u kol wai nama dire, yal ta kal wai iru ere ibalini tenamia, ena ibal iray iban u mena ta pekenama dire, yalini aa ki di tere, te ibal iray kal digan ere taalime erungwa main main God kire di ere tenama dire, kal main iru ere awli ungwa yal i tenamue.