Read Golin 1 Yon 2 Bible Online

1 Yon 2 - Golin bible

1 Yon 2

¹Na kule yega kobe, i ibal kobe kal digan ere taalime ta erekinana dire, ka minin ganin bile i teiwe. Ka bile i teiba, na ibal ta kal digan ere taalime erabinga, ena aa ki di ibal tongwa yal, Abe God bole milere yal iray, na ibal kobe pi kulere ka di God tere aa ki di na tenamue. Aa ki di ibal tongwa yal, Yesu Kirisito, kabin sire wai wen milungwa yal milemue.

²Kirisito kal wai ere na tongwa pire na ibal kobe kal digan ere taalime erebinga, God pirin i gule ere na tomue. Tomba na ibal kobe tawle tamama, gariba gul ibal para pirin gule ere terala dungwa paamue.

³God kile kaman ka wiina ere terabinga, ena yalini pire pol sibina di pirabinwe.

⁴Yal ta mile, “Na yalini pire pol siwa,” dinamba God kile kaman ka wiina ere tekenangwa, ena kakiibi kobaan mile ka main pire nomanin suna ta yekinamue.

⁵Dimba ibal ta God ka dungwa mere pire wiina erangwa, ena ibal iray den miriin kirara God tenamue. Yal ta mile, “Na God bole u taran pi milebinwa,” dire ena yalini Yesu konagi ere kalkan erungwa mere erala eremue. Iru erabinga, ena na ibal kobe bole pena gale God tobina di pirabinwe. Yal ta den miriin ibal tenangwa, ena nomanin naabilungwa milangwa

⁷Na ye nobinga kobe, kile kaman ka kwi ta minin ganin bile i tekebinba, kile kaman ka minin ganin bile i tega, kamin kaya goma wen bilungwa paamue. Paangwa mere kere di i tongure kaya piringiray.

⁸Dimba nomanin kama sungwa kalkan kobe kawen wei sungure, te nomanin naabile aw dungwa kalkan kobe kaya u maribe ongwa, ena kile kaman ka bile i tega, ka kwi ta u maribe omue. Yesu Kirisito te i ibal kobe para kal wai eringa, ena kile kaman ka iray kirara kawen dima di ibal kobe iru piremue.

⁹Ibal kobe nomanin suna naabilama dire, God aw di ibalin kobe tongwa, yal ta mile, “Na nomanin suna malia naabilemua,” dinamba yalini ka main enin kobe den miriin ki ye tenangwa, ena nomanin kama sungwa mere, imo dinangure mile paimue.

¹⁰Yal ta den miriin enin ta tenangwa, ena yal i nomanin suna naabile di painamue. Di paire ibal taw kal digan ere taalime erama dire, yalini kal ta iru ere ibalin kobe ta tekenamue.

¹¹Dimba yal ta den miriin ki ye enin ta tenangwa, ena yalini nomanin kama si painamue. Nomanin kama si paangure yalini omilin gi dungwa kol warungwa mere warere, gilaa bongi siribe yaangwa kol warere, nala di nangwa kol ta kanekimue.

¹²I ibal kobe, na kule yega kobe, God Yesu Kirisito ere wai ere na tongwa pire, i kal digan ere taalime eringa pirin gule ere i tongwa, ena ka minin ganin iray bile i teiwe.

¹³I gaan kule yenga yal kobe, kamin kaya goma wen Yesu Kirisito milungwa, i yalini main pire pol singa pire, ka minin ganin iray bile i teiwe. I yal garamil kobe, i yal kobe Satan i mun kol ere si kiranin bilinga pire, ka minin ganin iray bile i teiwe.

¹⁴Na kule yega kobe, i ibal kobe para Abe God main pire pol singa pire, ka minin ganin iray bile i teya. I gaan kule yenga ibal kobe, kamin kaya goma wen Yesu Kirisito milungwa, i yalini main pire pol singa pire, ka minin ganin iray bile i teya. I yal garamil kobe, i yal kobe yobilagi niminin milere, te God ka main dungwa i pire nomanin suna yerere, te Satan i mun kol ere si kiranin bilere, te iru ere milinga pire, ka minin ganin iray bile i teya. Gariba gul kal pirebinga maanangwa nomanin tegi dikirabinga

¹⁵Ena gariba gul kal iru piranga maanangure, nomanin tegi dikio. Yal ta kal iru nomanin tegi dinangwa, ena yal i den miriin Abe God ta tekenamue.

¹⁶Gain kal pirungwa maangure, te omilin kane irala di pirungure, te gain kal pire yebe ere kule si warungure, te kalkan iru, gariba gul kalkan iru main paangwa, Abe God iru main ta dekemue.

¹⁷Gariba gul wei sinangure, te gariba gul gain kal pirungwa maangwa para wei sinamba, ibal ta mile God ka di yalini tongwa wiina ere te milamia, ena yalini mile painangwal painamue. Kirisito kaymin kaya u maribe ongwa

¹⁸Ena na kule yega kobe, gariba kal wei sinangwa kamin kaun i u maala nangwa paimia. “Yesu Kirisito kaymin ibal unamua,” dungwa piringiwe. Pirinba malia Yesu Kirisito kaymin ibal binanbile u maribe omia, ena gariba kal wei sinangwa kamin kaun i u maala nama di kanebinwe.

¹⁹Ibalin kobi na ibal gawlimanan kobe wen ta milekemia, ena na ibal kobe piseremue. Ibalin kobi na ibal gawlimanan milangwa, na ibal bole taran milamba, na gawlimanan ta milekenangwa, ibal kobe iru wen kanama dire, ibalin kobi na ibal kobe piseremue.

²⁰Dimba God kabin sire wai wen milungwa yal, Kirisito yalini inin Iban nusi ere i tongwa, ena i ibal para inin inin nomanin paangwa milinwe.

²¹Ka main kawen dungwa paangwai, i ta pirekinga, ena ka minin ganin bile i tega i tamama. I ibal kobe pirere, te kakiibi ta, ka main kawen dungwa, taran ta dekungwa para piringa, ena ka minin ganin bile i teya.

²²Yal ta kakiibi dungwa yal ibena mileme? Yal ta mile, “Yesu imore milere God konagi erungwa yal Kirisito, ta milekemua,” dimia, ena yal i kakiibi dungwa yal milemue. Milere Kirisito kaymin ibal para milere Abe God te Wan para ka di kile di mena ere tomue.

²³Ibal ta God Wan ka di kile di mena ere tenangwa, ena ibal i God pi kulekire, “Na Abe,” ta di tekenamue. Dimba ibal ta God Wan pire gi di tere ka i di maribe erangwa, ena ibal i God pi kulere, “Na Abe,” di God tenamue. Ka main kawen paangwa Kirisito Iban ka nil si na tongwa

²⁴Ka nil si tongwa, goma kawn kule piringa iray, i nomanin suna yere aa gi di piro. Aa gi di piranga, ena i ibal kobe Abe God te yalini Wan Yesu bole pena gale pi taran milangirawa.

²⁵Na ibal kobe mile pairabingal pairabina dire, Kirisito inin, “Kal iru ere na ibal kobe teralwa,” dire aan kere ye na tomue.

²⁶Ibal kobe kakiibi dire bawle i terala di pirungure, na ibalin kobe pirere ka dungwa i ta pirekenana dire, ka minin ganin bile i teya.

²⁷Ibalin kobi milimba, Yesu Kirisito milere inin Iban nusi ere i tongure, inga milinwe. Iru milinga ibal ta para ka nil si i tenamba, Kirisito milere inin Iban nusi ere i tongwa, main para ka nil si i tomue. Ka nil si tongwa mere, kirara kawen dungure kakiibi ta dekemue. Yalini inin Iban ka nil si i tongwa, wiina erere Kirisito bole pena gale pi taran milo.

²⁸Ena na kule yega kobe, i yalini bole pena gale pi taran milo. Milanga ena yalini kwi gariba gul kwi u maribe pire unangwa, i ibal kobe kuril di kanekire gay ta gule tekenanwe.

²⁹Kirisito kabin sire wai wen milungwa, i ibal kobe iru kaninga, ena ibal kobe kabin sire kal wai erungure, God ibalin kobe kule yongwa milungwa para kananwe.