Read Golin Kirisito main di maribe ere Yon tongure yalini bile tongwa 20 Bible Online

Kirisito main di maribe ere Yon tongure yalini bile tongwa 20 - Golin bible

Kirisito main di maribe ere Yon tongure yalini bile tongwa 20

¹Ena iru kanere pare, angel ta kamin ai pisere ere ime ungwa, na kaniwe. Angel iray iwe, yalini mile kol gaul ai kana giran ki milin aa tere, te ain yobilagi kan sen bilkaw para aa tomue.

²Iru aa te ire urere, oniba bil iray aa gi dire me erin binanwenbile, wan tausen, kan iray kule paalemue. Oniba bil milungwa iwe, goma oniba ta milere yalini Satan milemue.

³Angel iray Satan pusi kol gaul ai ali erere, kana giran mama yaale gariba kana giran du ere yomue. Satan me erin wan tausen gariba gul bilkaw ibal ta ta para milungwa bawle tekenama dire, kana giran iru kol yaalemue. Kamin kaun baan araway iray mili nangwa, wei sinangure pare, kamin kaun baan tawle kanin gule ere Satan tenamue.

⁴Ena iru kanere pare, yal bil kenin ere ke milungwa bol te ibal kobe bol iray amin di milungwa para na kaniwe. Kaniga ibalin kobi ka kol ere ibal tenama dire, God yobilaan iru pai tomue. Yesu ka main di maribe erungwa, te God ka dungwa, ibal kobe ka sutan i di gawa dimia, ena yal ton ibalin kobe si gulungure, ibalin kobi iban para milungwa na kaniwe. Ibalin kobi ana dire deminin si kabe biin te kabe biin i kobile galbale ta tekere, te kabe biin ibal maabin mina te aan mina minin ganin bile paalimba, ibalin kobi minin ganin i ole bilekemue. Ibalin kobi sigare kule si kwi yere, Kirisito bole me erin wan tausen kenin ere ke mile milemue.

⁵Te gulungwa ibal malia kwi ta alekungwa iwe, kaun iray sigare kule si kwi ta yekire, me erin wan tausen wei sinangwa kaun, sigare kule si kwi yenamue. Goma ibal kobe sigare kule si kwi yongwa iwe, gulere alungwa ta goma iru erungwa paamue.

⁶Ibal kobe kaun iray goma gulere alangwa, ena ibalin kobe wai pire miriin painamue. Enderin gaul ai mile painangwal painangwa main ibalin kobi iru ta mile paikinamue. God te Kirisito ka main kenin erungwa ibal milungwa mere, ibalin kobi iru milere, me erin wan tausen Kirisito bole kenin ere ke mile milamue. Satan kirara u sutaw nangwa

⁷Ena me erin wan tausen wei sinangure pare, Satan kanin paangwa, gule ere tenamue.

⁸Gule ere tenangure gariba gul bilin ibal ta ta para kobil kuman te geril bomai kole kole milungwa, yalini ibalin kobi bawle terala dire, u kole kole namue. Ibalin kobi ibal digan milere, kaan Gogo te Megogo. Pirin nil makalua wanin mege mege dungwa mere, ibalin kobi iru binanwenbile kura bilama dire, Satan ibalin kobi i ku bilamue.

⁹U ku bilere gariba kole kole para maale si suulu di warere, God ibalin gawliman kobe te God ogin ain ta yalini wai kanungwa wenabe dire i suna erimba, kamin ai enderin bil ere ime ure ibalin kobi dere de taa namue.

¹⁰Ibalin kobi kiraan sire bawle tongwa yal Satan milungure, God yalini pusi enderin de paangwal paangwa ai eramue. Ain iray ain yobilagi kaan sulpa enderin de paingwa, nega wen dungure, God kabe biin te yalini ka kebe yal para ai iray kaya yal sui pusi ali eramue. Ibalin kobi para ali milungwa, girungwa taangwa para gain giil pire milangwal milamue. God ka kol bil ere ibal tenangwa

¹¹Ena iru kanere pare, yal bil kenin ere ke milangwa bol bil ta pege kanere, te yal ta bol iray bolimina amin di milungwa para na kaniwe. Yalini milungwa ain kamin te gariba pisere kirara ere wei sungure, ibal kamin te gariba kwi ta kanekimue.

¹²Te gulungwa ibal maangwa te yaangwa para, kenin ere ke milungwa bol guman mina ale milungwa kaniwe. Ibal kobe mile pai erungwa mere, ka minin ganin iru buku mina bile paalungwa, buku iray polaa dungure, te ibal mile painangwal painangwa, ibalin kobi kaan buku ta mina bile paalungwa, para polaa dimue. Gulungwa ibal goma mile pai erungwa, buku iray ka minin ganin bilungwa mere, God ka kol ere gulungwa ibal tere pirin pai tomue.

¹³Pirin nil ali gulungwa alungure, te gulungwa ain te ibanin milungwa ain para alungure, ibalin kobi goma mile pai erungwa mere, God ka kol ere tere pirin pai ibalin kobi tomue.

¹⁴Tomia ena gulungwa main te gulungwa ibal ibanin baan ta milungwa main pusi enderin de paangwal paangwa ai eremue. Ibal enderin de paangwal paangwa ai nangwa kirara kawen gulemue.

¹⁵Ibal mile painangwal painangwa ibalin kobi kaan buku ta mina bile paalimba, ibal taw kobe kaan buku iray mina ta bile paalekenangwa, ena God ibalin kobi pusi enderin de painangwal painangwa ai eremue.