Read Golin Kirisito main di maribe ere Yon tongure yalini bile tongwa 6 Bible Online

Kirisito main di maribe ere Yon tongure yalini bile tongwa 6 - Golin bible

Kirisito main di maribe ere Yon tongure yalini bile tongwa 6

¹Iru kanere pare, Bolima Siipe Siipe Gawlin kan paalin si yongwa, ta pu erungwa kaniwe. Kanigire, te kalkan sui sui kwi milungwa ta kamin guru dungwa mere, gala dire, “Wo,” dimue.

²Dungure bolima ausi pege ta milungwa kaniwe. Yal ta aw si milere simil ta aa tere, te kaymin i sutaw erungwa yal gibilin gal, gal iru yalini tongure, yalini kaure pire kaymin i sutaw erungwa yal mere pirere, te kaymin ibal i sutaw ere terala dire omue.

³Kanigire Bolima Siipe Siipe Gawlin goma kan paalin ta pu erungwa, malia ta ama pu erungwa kaniwe. Kanere kalkan sui sui kwi milungwa ta goma ka dungure, ta ama mile gala dire, “Wo,” dungwa piriwe.

⁴Ka dungure bolima ausi baa ta umue. Ibal bole kura bile inin inin si gulama dire, kamin wai taangwa kaun wei sinangwa, bolima ausi aw si milungwa yal, “Iru erana po,” di tomue. Di tere di kuba pera tomue.

⁵Kanigire Bolima Siipe Siipe Gawlin goma kan paalin sui pu erungwa, malia ta ama pu erungwa kaniwe. Kanigire kalkan sui sui kwi milungwa sui goma dungure, ta ama mile gala dire, “Wo,” dimue. Dungure kanere bolima ausi kama ta milungwa kaniwe. Bolima ausi iray aw si milungwa yal, kal obin dongwa main kanungwa kal, kaan sikel, aa tomue.

⁶Kalkan sui sui kwi milungwa kobe milungwa suna ka ta uma di pire, ka iru dungwa, “Keba taranta twenti kina bilungure, te dodal sutakobe ama twenti kina bilemua. Iru inanga paamba, eri niriin te nil wain tobe di mine ere ikio.”

⁷Iru kanigire Bolima Siipe Siipe Gawlin goma kan paalin sutakobe pu erungwa, malia ta ama pu erungwa kaniwe. Kanigire kalkan sui sui kwi milungwa, sutakobe goma ka dungure, malia ta ama mile gala dire, “Wo,” dimue.

⁸Dungure na kwi kanere, bolima ausi ta gain komiligi gi kulungwa milungwa kaniwe. Yal ta bolima ausi mun boliminai aw sungwa yal i, kaan Gulungwa, dungwa milemue. Yal ta mun kol duulin bile ungwa iwe, yalini kaan “Kel dimua,” dire (kaan Golin ka paangwa, “Ibal Gulungwa Ain yalini kaan dimua,”) dimue. Gariba ibal para muru taminin sui sui obin si milangwa, taminin ta mere yal sui iray si gulama dire, yobilaan bile yal sui iray tomue. Si gulangwa mere iwe, di kuba pera aa tere sirere, te kenan bil gulungwa kaun u maribe pi terere, te nibil main main pilau di ere terere, te kabe biin ele paangwa para si nenamue.

⁹Iru kanigire, Bolima Siipe Siipe Gawlin goma kan paalin sui sui pu erungwa malia ta ama pu eremue. Goma ibal taw God ka main kere di maribe ere ka iray di gawa di ongwa ongwa omia, ena ibal kobe ibalin kobi si gulemue. Ibalin kobi iban, kabe si gale God tongwa bol main ali mile paangwa, kaniwe.

¹⁰Ibal gulungwa iban i gala bil dire ka iru dungwa, “Kenin ere ke milinga yal, Yobilaan Kobaan Singabo, i kal dime di ere dorimil milere, te i main paangwa main i kirara kawen main paamua. Ibal kobe gariba gul mile na si gulungwa genawna i ibalin kobi maan sinane? Taw mile sinan mo, malia sinane?”

¹¹Dungure yalini galsuna pege araway inin inin obin si tomue. Tere, “I baan tawle imore mile suul milo. I gulinga mere i ka main enin gawliman taw para iru gulangure, para kuunin biinangwa, ena maan sirabinwa,” dire ka iru di ibalin kobi tomue.

¹²Te Bolima Siipe Siipe Gawlin goma kan paalin anan kole muru pu erungwa, malia ta ama pu erungwa kaniwe. Kanigire ememe bilkaw pilau dungure, te waiba gal kama dungwa mere are iru kama sungure, te mayan baa dungwa mere ba baa iru dongure,

¹³te gwi bil maangure akola milin de sire ule di yaa main sungwa mere, kulmama iru kamin mina pisere ule di yaa gariba gul simue.

¹⁴Ibal kaal yaale kaal gumilin i ku bile kole sungwa mere, kamin mina kalkan kobe iru u baan ta omue. Te kamin kuul para muru te gariba mege mege pirin nil wenabe gerungwa suna dungwa kobi para u baan ta omue.

¹⁵Iru erungure, ena gariba gul yal bil kobe te gabman yal singaba kobe te simil nen yal singaba kobe te kalkan binanbile aa te nere yobilaan bil bilungwa yal kobe te nil konagi ere milungwa ibal te nil konagi ta ere milekungwa ibal, ibal kobe para aal kule milama dire, pi kobile giran ali te kamin kuul kobile dungwa gul ali omue.

¹⁶Pirere ka iru di kamin kuul te kobile di tongwa, “Yal ta kenin ere ke milungwa bol amin di milungwa yal na ta kanekinama dire, te Bolima Siipe Siipe Gawlin den ki ye na tekenama dire, kiray yaare na si biro.

¹⁷Ka iru dibinga main iwe, yal sui iray den gule ibal tongwa kaun u bawa dimia, ibena niminin mile ale milame?” dire ka iru dimue.