Read Guanano Mateo 1 Bible Online

Mateo 1 - Guanano bible

Mateo 1

¹Jesucristo coyeare panopʉ macainare õ sehe ni yahuihtja yʉhʉ. Jesucristo ñʉchʉno cjiro panopʉ macariro Davi wama tiriro jia tiha. To jihto pano ti ñʉchʉno cjiro Abrahã wama tiriro jia tiha.

²Abrahã Isaa pʉcʉro jiha.Isaa Jacobo pʉcʉro jiha.Jacobo Juda cʉ̃hʉ pʉcʉro jiha.

³Juda pohna pʉaro jiha. Fares, Zara jiha. Ti pocoro Tamar wama tiricoro jiha.Fares Esrom pʉcʉro jiha.Esrom Aram pʉcʉro jiha.

⁴Aram Aminadab pʉcʉro jiha.Aminadab Naasón pʉcʉro jiha.Naasón Salmón pʉcʉro jiha.

⁵Salmón Booz pʉcʉro jiha. Booz pocoro Rahab jiha.Booz Obed pʉcʉro jiha. To pocoro Rut jiha.Obed Jesé pʉcʉro jiha.

⁶Jesé Davi pʉcʉro jiha.Davi sehe Israe masa bui pʉhtoro jiha. Tiro Uria wama tiriro cjiro namonore to nʉoari baharo Salomo wama tirirore pohna tiha.

⁷Salomo Roboã pʉcʉro jiha.Roboã Abías pʉcʉro jiha.Abías Asa pʉcʉro jiha.

⁸Asa Josafat pʉcʉro jiha.Josafat Joram pʉcʉro jiha.Joram Uzías pʉcʉro jiha.

⁹Uzías Jotam pʉcʉro jiha.Jotam Acaz pʉcʉro jiha.Acaz Ezequia pʉcʉro jiha.

¹⁰Ezequia Manase pʉcʉro jiha.Manase Amón pʉcʉro jiha.Amón Josia pʉcʉro jiha.

¹¹Josia Jeconia cʉ̃hʉ pʉcʉro jiha. Tina ti jiri pjare Israe yahpa macainare Babilonia macaina sehe ñaha wahcãha ti ya yahpapʉ.

¹²Ã yoa Babilonia yahpai ti sʉri baharo,Jeconia Salatiere pohna tiha.Salatie Zorobabe pʉcʉro jiha.

¹³Zorobabe Abiud pʉcʉro jiha.Abiud Eliaquim pʉcʉro jiha.Eliaquim Azor pʉcʉro jiha.

¹⁴Azor Zadoc pʉcʉro jiha.Zadoc Aquim pʉcʉro jiha.Aquim Eliud pʉcʉro jiha.

¹⁵Eliud Eleazar pʉcʉro jiha.Eleazar Matán pʉcʉro jiha.Matán Jacobo pʉcʉro jiha.

¹⁶Jacobo José pʉcʉro jiha. José María manʉno jiha. María sehe Jesu pocoro jire. Jesu sehe masare yʉhdohtiro jiro Cristo ti ni pisuriro jire.

¹⁷Tó sehe jiro Abrahãre mari quihõ mʉhtachʉ, pʉ Davipʉre mari quihõ batoachʉ ahrina jipihtina ti panamana ji turiaina mehne jia, catorce curuari waro jiha. Pari turi Davire mari quihõ mʉhtachʉ, pʉ Babiloniapʉ Israe masare ti naahto pano mari quihõ batoachʉ jipihtina ti panamana ji turiana mehne jia, catorce curuari waro pari turi jiha. Ã yoa tuhsʉ Babiloniapʉ ti sʉri baharo mari quihõ mʉhtachʉ, pʉ Cristo to masa bajuachʉpʉ mari quihõ batoachʉ jipihtina ti panamana ji turiaina mehne jia, catorce curuari waro jiha tjoa. Jesucristo to masa bajuarire yahuha

¹⁸Ã yoa õ sehe Jesucristo masa bajuari jire. To pocoro María sehe José namono cjihto jiri jire. Wiho mejeta ti pʉaro ji dʉcahto pano Espíritu Santo to tuaa mehne wahma nijinocãre bocaro masiha ticoro to basi.

¹⁹Ã yoa José to manʉno cjihto quihõno yoariro jiro, tíre masino, ticorore cohãno taro nimaha. Masa ti ñʉrocaroi ticorore buhiri tichʉ yoa duaeraro, masa ti tʉhoerasinichʉta yaroca ticorore cohãno taro nimaha.

²⁰Tíre to tʉhoturo watoi Cohamacʉ anjo sehe cahãnopʉ Josére bajuaro, õ sehe niha: —José, Davi cjiro panamino, Maríare bʉo tiro marieno namo tiga. Ticoro Espíritu Santo to yoadohoro mehne wahma nijinocãre bocaricoro jira. Ã jicʉ bʉo tiro marieno namo tiga ticorore.

²¹Ticoro pohna tirohca. Tirota to macʉnota to masare, pichacapʉ wahaborinare yʉhdohtiro jirohca. To ã yʉhdohtiro jichʉ ñʉcʉ, Jesu ni wama pisuihca mʉhʉ —niha anjo Josére.

²²Panopʉ macariro Cohamacʉ yare yahu mʉhtariro cjiro “Ã waharohca”, to ni joariro seheta ahri jipihtia ã wahaa tiha. Ahri ã wahahtore õ sehe ni joa dutia tiha Cohamacʉ tirore:

²³“Cʉ̃coro nuhmino, ne mʉno mehne jieraricoro, nijinocãre bocaro pohna tirohca to macʉnocãre.Tirocã Emanuel wama tirohca”, ni joaa tiha Cohamacʉ yare. (Emanuel nino: “Cohamacʉ mari mehneta jira”, nino nica.)

²⁴Cohamacʉ anjo Josére to ã ni yahuri baharo José sehe wahcã, anjo to dutiriro seheta tiro María mehne wamomaca dʉhteha.

²⁵To macʉnocãre to pohna tihto pano José sehe ticoro mehne jiera tiha. Baharo ticoro sehe pohna tia wahaha. Tiro sehe wihãrirocãre Jesu wamoaha.