Read Guanano Hebreos 3 Bible Online

Hebreos 3 - Guanano bible

Hebreos 3

¹Jesu to ã jiriro jichʉ ñʉna tirore noano wacũga mʉsa. Yʉ coyea Jesu yaina, Cohamacʉ to beseina jira mʉsa. Tiro Jesu sehe Cohamacʉ to warocariro jiro mari sacerdotea pʉhtoa ti bui pʉhtoro jira. To buheare noaa buheare mari quihõno tʉho, buheja. Tiro sehe Cohamacʉ warocariro, mari sacerdotea bui pʉhtoro to jia tiare noano wacũga mʉsa.

²Cohamacʉ tirore marine to yʉhdʉchʉ yoahtore to cũchʉ tiro sehe to cũriro seheta yoari jire. Ne yʉhdʉrʉcaerari jire. Moise cjiro cʉ̃hʉ Cohamacʉ yaina Israe masare yoadohoro ne yʉhdʉrʉcaerari jire. Ãta yoari jire Jesu cʉ̃hʉ.

³Moise cjirore ti ño payoriro yʉhdoro Jesu sehere ño payoro cahmana marine. Õ sehe jira tí mari piti dahre buhechʉ: Wʉhʉre mari ño payoriro yʉhdoro wʉhʉ dahreriro sehere ño payoro cahmana marine. Ã jiro Jesu sehe wʉhʉ dahreriro yoaro sehe jiriro to jichʉ Moise cjirore mari ño payoriro yʉhdoro tiro sehere ño payoro cahmana marine.

⁴Õ sehe jira ti: Mari Cristo yaina Cohamacʉ ya curua macaina jija. Cristo sehe wʉhʉre to cũboriro seheta marine to ya curua macaina cjihtire cũno nina. Masa sehe wʉhʉse yoaina jira. Cohamacʉ sehe jipihtiare yoariro jira. Moise cjiro sehe Cohamacʉ ya curua macainare yoadohorucuriro jiro, baharopʉ Cohamacʉ to yahuhtore yahua tiri jire masare. Cristo sehe Cohamacʉ macʉno jiro, Cohamacʉ yare yoarucuriro jiro, Cohamacʉ ya curua macaina bui pʉhtoro jira. To ã jiriro jichʉ ñʉna Moise cjirore mari ño payoriro yʉhdoro Cristo sehere ño payoro cahmana marine. Ã jina mari sehe Cristore wacũ tua duhuerana, marine to yʉhdʉchʉ yoahtore ã wahcherucuna to ya curua macaina jija mari. Cohamacʉ to yainare tiro mehne ti noano sochʉ cahmana

⁷Ã jina Cristore mari wacũ tua duhuerahtore õ sehe yoaro cahmana marine. Õ sehe nina Espíritu Santo:“Michare yʉhʉ Cohamacʉ mʉsare yʉ yahuchʉ, yʉhti duaeraina jiena tjiga.

⁸Noano yʉhtiga mʉsa yʉhʉre.Panopʉ Israe masa masa marienopʉ jia, ãta yʉhdʉrʉcarucure yʉhʉre.Ã jina tina yoaro sehe yoaena tjiga mʉsa yʉhʉre.

⁹Tópʉre cuarenta cʉhmari waro tinare yʉ tuaa mehne yoa ñomai.Yʉ ã yoa ñopachʉta tina sehe õ sehe ni tʉhotua timare: ‘¿Ñaare mari yoachʉ ñʉno Cohamacʉ marine buhiri dahrebocari?’ ni tʉhotua timare.Ã ni tʉhotua ñano yoa ñʉa tire.

¹⁰Ti ã yoachʉ ñʉcʉ tina mehne suai.Ã suacʉ õ sehe nii: ‘Tina yʉ durucuare tʉho duaeraa, soro jia buheare ã wacũmacarucua nina.Ya sehere ne yʉhti duaerara’, nii tinare.

¹¹Ã jicʉ tina mehne suacʉ õ sehe ni yahui: ‘Tina yʉhʉ mehne macaina ne jisi.Ã jia wapʉ tiro marieno jisi tina’, ni yahuri jire Cohamacʉ”, niri jire Espíritu Santo sehe.

¹²Ã jina yʉ coyea, noano yoaga mʉsa, “Cohamacʉre cohãri”, nina. Mʉsa ñaare tʉhotuna, Cohamacʉre catirirore wacũ tuaerana, tirore cohãboca mʉsa. Ne cʉ̃iro mʉsa mehne macariro ã yoaero tjijaro.

¹³Ã jina ahri sehere yoaro cahmana mʉsare: Mʉsa mehne macainare dachoripe Cohamacʉ yare mʉsa basi cahma durucuga “Ñaare yoari”, nina. Ñaare yoana, “Tí mehne wahcheja” nina, mahñoare tʉhotuna nija mari. Ã ni tʉhotuena tjiga. Ñaare yoarucuna Cohamacʉ ya sehere ji coaeraja mari. Ã yoana ñaare duhu duaeraja. “Ã yoari” nina, mʉsa mehne macainare Cohamacʉ yare mʉsa basi cahma durucuga. Cristo to tahto pano dachoripe tíre ã cahma durucurucuga.

¹⁴Wahmanore Cristore mari wacũ tua dʉcariro seheta tó seheta mari wacũ tuarucuna, mari catiro puro to yare duhuerana, tiro mehne macaina jija.

¹⁵Õ sehe nina Cohamacʉ yare ti joari pũi:“Michare yʉhʉ Cohamacʉ mʉsare yʉ dutichʉ noano yʉhtiga mʉsa yʉhʉre.Panopʉ macaina Israe masa yʉ yahupachʉta ño payo duaeraa, yʉhʉre yʉhti duaerare.Ã jina tina yoaro sehe yoaena tjiga mʉsa, niri jire Cohamacʉ”, ni joaa tiri jire panopʉre.

¹⁶Ã yoa Cohamacʉ to yahurire tʉhomarina jipahta tina tirore yʉhtierari jire. Tina jipihtina Egiptopʉ jiina Moise to na wiorina jipahta tirore ne yʉhtierari jire.

¹⁷Ã jia ã ñano yoarucua, cuarenta cʉhmari waro Cohamacʉre suachʉ yoa mʉjaa tiri jire. Ti ã yoari buhiri masa marienopʉ yariari jire tina.

¹⁸Tirore ti ã yʉhti duaerachʉ ñʉno õ sehe cua pisaro mehne niri jire tiro: “Tina yʉhʉ mehne macaina ne jisi. Ã jia wapʉ tiro marieno ne jisi tina”, niri jire tiro.

¹⁹To ã nichʉ tʉhona ahri sehere masinahca mari: Tina Cohamacʉre ti wacũ tuaerari buhiri tiro mehne macaina ji masierari jire. Ã jia tiro mehne noano so masierari jire.