Read Guarayu MATEO 1 Bible Online

MATEO 1 - Guarayu bible

MATEO 1

¹Ko yɨpɨndar Jesucristo renondeve yuvɨrekoi va'e araka'e Abraham suindar, mborerekwar David suindar avei:

²Abraham ra'ɨrɨ Isaac, Isaac ra'ɨrɨ evokoiyase Jacob ipare Jacob ra'ɨrɨ a'e Judá ambuae tɨke'ɨrɨ tɨvɨreta reseve.

³Judá ra'ɨrɨ Fares iyavei Zérah, a'e ichɨ rer Tamar. Fares ra'ɨrɨ Esróm, Esróm ra'ɨrɨ evokoiyase Aram.

⁴Aram ra'ɨrɨ Aminadab, Aminadab ra'ɨrɨ Nahasón, Nahasón ra'ɨrɨ evokoiyase Salmón.

⁵Salmón ra'ɨrɨ Booz, a'e ichɨ rer Rahab. Booz ra'ɨrɨ Obed, a'e ichɨ rer Rut. Obed ra'ɨrɨ Jesé,

⁶Jesé ra'ɨrɨ mborerekwar gwasu David. Mborerekwar Gwasu David ra'ɨrɨ evokoiyase Salomón, Urías rembirekokwer pɨpe oyesu va'e.

⁷Salomón ra'ɨrɨ Roboam, Roboam ra'ɨrɨ Abías iyavei Abías ra'ɨrɨ Asá.

⁸Asá ra'ɨrɨ Josafat, Josafat ra'ɨrɨ Joram iyavei Joram ra'ɨrɨ Ozías.

⁹Ozías ra'ɨrɨ Jotam, Jotam ra'ɨrɨ Acaz iyavei Acaz ra'ɨrɨ Ezequías.

¹⁰Ezequías ra'ɨrɨ Manasés, Manasés ra'ɨrɨ Amón a'e Amón ra'ɨrɨ Josías.

¹¹Josías ra'ɨrɨ Jeconías tɨvɨreta reseve, a'ese Israel pendar serasosa mbigwaigwä araka'e Babilonia ve.

¹²Mbigwai yuvɨrekoire, Jeconías omboyesu Salatiel, Salatiel ra'ɨrɨ Zorobabel.

¹³Zorobabel ra'ɨrɨ Abihud, Abihud ra'ɨrɨ Eliaquim iyavei Eliaquim ra'ɨrɨ Azor.

¹⁴Azor ra'ɨrɨ Sadoc, Sadoc ra'ɨrɨ Aquim a'e Aquim ra'ɨrɨ Eliud.

¹⁵Eliud ra'ɨrɨ Eleazar, Eleazar ra'ɨrɨ Matán evokoiyase Matán ra'ɨrɨ Jacob.

¹⁶Jacob ra'ɨrɨ José, María mer, María evokoiyase Jesús sɨ sekoi, a'e Poropɨsɨrösar ya'e va'e chupe.

¹⁷Evokoiyase Abraham sui oime opayandepo yovaive irugätu tuprɨ yesusa oyepota va'e David yesusa rupi. Opayandepo yovaive irugätu avei David suindar oyepota ava mbigwai Israel pendar sereko agwer Babilonia ve, iyavei ambuae opayandepo yovaive irugätu oyepota oso Poropɨsɨrösar yesu agwer rupi.

¹⁸Na e'i Jesucristo yesu araka'e: María ichɨ, omenda pota va'e José rese; oyese yuvɨrekoi e'ɨ̇ vɨteseve rumo, Espíritu Maräne'ɨ̇ pirätäsa pɨpe imembɨ.

¹⁹José, a'e imer ava seko katuprɨ va'e, iyavei ndoipotai omombe'u va'erä opakatu ava upe María rekokwer, sese opoipotaño ichui toikwa eme yuvɨreko oyapave.

²⁰A'e ipɨ'a ñemoñeta opoi va'erä ichui, avɨyeteramo tëi rumo ñepëi yande Yar rembigwai ɨva pendar oyemboyekwa ikerve aipo e'i chupe: “José, David suindar, eresɨkɨyei rene María rese nde menda agwä, esepia Espíritu Maräne'ɨ̇ sui ou imembɨrä.

²¹María vɨrekose omembrɨ, pemondora serergwä Jesús. Esepia a'e oipɨsɨröra omu eta rekwa yangaipa sui.”

²²Ko rupi opa yavɨye yande Yar remimombe'ugwer aipo e'i va'ekwer iñe'ë mombe'usar araka'e:

²³“Kuña ndaseko maräi va'e imembɨra oiko iyavei vɨrekora omembrɨ, a'e omondora serergwä Emanuel.” (“Tüpä yande rese sekoi” oyapave aipo e'i).

²⁴Oma'ese rumo José oke agwer sui, yande Yar rembigwai ɨva pendar oyeupe ñe'ë agwer omboyeroya ite, ipare omenda María rese.

²⁵Ndoyapo vɨtei ete rumo mba'e oyese yuvɨreko, yɨpɨndar imembɨra rane ite, a'ese José omondo Jesús serergwä.