Read Guarayu MATEO 10 Bible Online

MATEO 10 - Guarayu bible

MATEO 10

¹Jesús oñe'ë opayandepo yovaive ñuvɨrïo gwemimbo'e eta upe, omondo gweko pirätäsa karugwar ava sui imboyepepɨ agwä iyavei iporombogwera agwä opakatu-katu tëi mba'erasɨsa sui.

²Ko serer yuvɨrekoi va'e opayandepo yovaive ñuvɨrïo tuprɨ Jesús ñe'ë mombe'usar: yɨpɨndar serer Simón, iyavei Pedro, a'e tɨvrɨ Andrés; ambuae Santiago, tɨvrɨ avei Juan, a'e Zebedeo ra'ɨrɨ;

³Felipe, Bartolomé, Tomás; iyavei Mateo, gwarepochi monu'äsarer; ambuae Santiago, Alfeo ra'ɨrɨ; ambuae Tadeo;

⁴iyavei Simón, gwekwa rese sekate'ɨ̇ va'e pa'ü pendarer; ipa va'e Judas Iscariote, a'e Jesús omondo va'e yamotare'ɨ̇mbar upe.

⁵Jesús oyokwai opayandepo yovaive ñuvɨrïo gwemimbo'e eta imondo aipo e'i chupe: “Ndapesoi chira ndiporeroyai va'e ɨvɨ rupi ndapeikei chira tekwa Samaria pɨpe;

⁶peso tapeseka katu ava ovesa nungar okañɨ va'e tekwa Israel pendar yuvɨreko.

⁷Peso pemombe'u avei Tüpä mborerekwasa köimi sekoi peyera.

⁸Iyavei pembogwera imba'easɨ va'e, pembogwerayevɨ avei omano va'e, pembogwera mba'erasɨ vai rerekosar iyavei pemboyepepɨ karugwar ava sui. Pe rumo peipɨsɨ pirätäsa ndasepɨi va'e; sese peyapoño evokoi mba'e gwarepochi pɨsɨe'ɨ̇sa pɨpe.”

⁹“Perasoi rene oro gwarepochi ani chiaveira cobre

¹⁰tembi'u avei perɨ rupi narä. Perasoi rene pe turukwar ndugwerä pe pɨtaki iyavei pe pokoka, esepia oporavɨkɨ va'e rumo vɨreko ite mba'e o'u va'erä.

¹¹Peyepotase ambuae tekwave anise tekwamive peso, peseka ranera ava avɨye va'e sëtäve pepɨtara ichui ramo ite peserä peso.

¹²Peike ramoseve oɨ pɨpe, peyapo ranera avɨrave oɨpɨpendar yuvɨrekoi va'e upe.

¹³Ava oɨ pɨpendar oipotase yuvɨreko, oipɨsɨra mba'e avɨye va'e. Akoi ndapepɨsɨ potaise; pe evokoiyase ndapemokañɨ chietera mba'e avɨye va'e.

¹⁴Ndapepɨsɨ potaise yuvɨreko iyavei ndosendu potaise peñe'ë, pesëño a'e oɨ pɨpe sui anise tekwa pɨpe sui avei, ipare peipɨpetera pepɨ ɨvɨ rätächigwer sui.

¹⁵Supiete arɨ kañɨ oyepotase ko tekwa upe, ɨvate katura Tüpä ñemoɨrösa ava Sodoma, Gomorra ɨgwar upendar sui kuri.”

¹⁶“¡Pesendu tuprɨ che ñe'ë! Che opomondo ovesa nungar ava mba'e mɨmba oñaröai va'e nungar pa'üve. Peikora inungar mboi sesaeteai va'e, iyavei inungar apɨkasu sekoi tuprɨ va'e.

¹⁷Iyavei peikwa katura peamotare'ɨ̇mbar sui, esepia mborerekwar rovai pe rerasora, ipare pe nuparä judío ñemo'üsave yuvɨreko

¹⁸ichui pe reraso aveira mborerekwareta ɨvate katu va'e rovai yuvɨreko che rekokwer sui tëi; egwë peyera peñe'ë che rekokwer rese chupe ava nimba'e reroyai va'e upe avei.

¹⁹Akoi pe rerasose mborerekwar upe yuvɨreko, mba'e pi'ä amombe'ura chupe ndapeyei chira, akoi peñe'ë potase rumo, Tüpä omondora peñe'ë agwä peü.

²⁰Esepia nda'ei chira peyesui tëi peñe'ë, pe Ru Tüpä Espíritu pemoñe'ë ukara.”

²¹“Ava omondora vɨvrɨ oamotare'ɨ̇sar upe yuka agwä, egwë e'i aveira ava gwa'ɨrɨ upe; ta'ɨrɨ avei oyamotare'ɨ̇ra oyesupa yuka uka agwä yuvɨreko che rekokwer rese.

²²Opakatu ava ndape ambotai chira che rekokwer sui tëi yuvɨreko; akoi oyemovɨräkwä va'eño tuprɨ ite arɨ ipa va'e rupi, a'e ipɨsɨröprɨ yuvɨrekoira kuri.

²³Akoi pe mañeko tëise ñepëi tekwave yuvɨreko, a'ese peyepepɨñorä ambuaeve ichui; supiete ava ɨvate katu va'e Ra'ɨrɨ che ayura perenondeve ndapemboavɨye vɨteiseve pe gwatasa tekwa Israel rupi.

²⁴Ndipoi chietera ñepëi ava oyembo'e va'e ɨvate katu ombo'esar sui, iyavei mbigwai nda'ei chira ɨvate katu gwerekwar sui.

²⁵Iyavei semimbo'e avɨye ite e'iñorä ombo'esar osekoupitɨse, iyavei mbigwai gwerekwar nungar tuprɨ aveira. Akoi oɨ yar upe karugwar rerekwar Beelzebú e'ise, ¿marä e'ira pi'ä sëtä pɨpendar upe yuvɨreko?”

²⁶“Ndapesɨkɨyei chira, ava pe amotare'ɨ̇mbar sui. Esepia ndipoi chietera mba'e ñomiprɨ ndikwasai va'erä kuri, opakatu mba'e ñomiprɨ ikwasapaño itera.

²⁷Akoi che amombe'u va'e pɨ̇tümimbisave peü, pe rumo pemombe'ura arɨ pɨpe ite; iyavei akoi peüñomi amombe'u va'e, perosapukai pe rëtä arɨve imombe'u opakatu upe.

²⁸Ndapesɨkɨyei chira ava peyuka potasar sui esepia ndoikatui chira ava ä mokañɨ agwä yuvɨreko; pesɨkɨye katura rumo Tüpä sui esepia a'e oikatu yande retekwer yande ä reseve imokañɨ agwä tata gwasu pɨpe.

²⁹¿Ndayamondoi chira ñuvɨrïo vɨräimi repɨrä ñepëi gwarepochi? Pe Ru Tüpä ndoipotaise rumo, ndovɨapi chietera ñepëi vɨräimi.

³⁰A'e ñoite oikwa opakatu peakä resendar ñepëi-pëi pe'a retakwer.

³¹Sese pesɨkɨyei rene: pe rumo perepɨ katu vɨräi re'ɨi sui.”

³²“Akoi ava chekwa uka va'e opakatu ava rovake, che avei evokoiyase ko ava che rupindar sekoi a'era che Ru ɨva pendar upe;

³³akoi ava ndachekwa ukai va'e opakatu ava rovake, che avei evokoiyase nda'ei ko che rupindar sekoi a'era che Ru ɨva pendar upe.”

³⁴“Mba'e tuprɨai revo gweru ko ɨvɨ pɨpe ndapeyei chira cheu; ndarui mba'e avɨye tuprɨ va'e, aru rumo vavasa tëi.

³⁵Che ayu ko ɨvɨ pɨpe ava ra'ɨrɨ oyesupa amotare'ɨ̇ agwä tëi, iyavei kuñatäi oyamotare'ɨ̇ra osɨ, kuña vovayar oyamotare'ɨ̇ aveira;

³⁶peamotare'ɨ̇mbar yuvɨrekoira pemu ae pe rëtä rupi.

³⁷Iyavei akoi oyesupa tëi osaɨsu katu va'e che sui, a'e ndiyai ete sekoi va'erä che rupi; inungar avei osaɨsu katu va'e gwa'ɨrɨ anise gwayrɨ che sui, a'e avei ndiyai ete sekoi va'erä che rupi;

³⁸akoi ndovosɨi va'e okurusu rese che reka agwä, a'e ndiyai ete sekoi va'erä che rupi.

³⁹Akoi ava oipɨsɨrö pota va'e gwekokwer tëi, a'e okañɨ tëira, akoi omokañɨ va'e rumo gwekokwer che rekokwer rese, a'e oñepɨsɨröra.”

⁴⁰“Akoi pe pɨsɨ tuprɨ va'e yuvɨreko, a'e che pɨsɨ tuprɨ avei; akoi che pɨsɨ va'e, oipɨsɨ avei che mbousar.

⁴¹Akoi oipɨsɨ tuprɨ va'e ñepëi Tüpä ñe'ë mombe'usar sekosa rese tëi, a'e oipɨsɨ aveira porerekosa inungar tuprɨ avei Tüpä ñe'ë mombe'usar; iyavei akoi ava oipɨsɨ tuprɨ va'e ava seko katuprɨsa rese tëi, a'e oipɨsɨ aveira porerekosa inungar tuprɨ avei.

⁴²Akoi omondo va'e chi'ïmi ɨ so'ɨ̇sa va'e ɨgwa pɨpe ñepëi seko mbegwemi katu va'e toɨ'u che reroyasar seko rese, a'e oipɨsɨ aveira porerekosa.”