Read Guarayu MATEO 11 Bible Online

MATEO 11 - Guarayu bible

MATEO 11

¹Opase Jesús ombo'e tuprɨ opayandepo yovaive ñuvɨrïo gwemimbo'e, a'ese oso ichui, oporombo'e Tüpä ñe'ëngagwer rese tekwa yakatu rupi.

²Juan, a'ese chini vokendasave, oyandu mba'e Cristo rembiapokwer öi. Evokoiyase aipo omondo vupindar

³mba'e rese porandu agwä nde ite vo aipo särömbrɨ ereiko, anise oime tie ambuae särö pɨrä e'i yuvɨreko chupe.

⁴Jesús omboyevɨ chupe: “Peso pemombe'upa Juan upe pesepia va'e iyavei mba'e pesendu va'e.

⁵Pemombe'u chupe ndasesapɨsoi va'e osareko tuprɨ yuvɨreko, ipäri-päri va'e ogwata tuprɨ, iyavei mba'erasɨ vai rerekosar okwerapa tuprɨ, ndayapɨsai va'e avei yapɨsapa, omano va'e opa okwerayevɨ yuvɨreko iyavei ava iparaɨsu va'e upe imombe'usa pɨsɨrösa resendar ñe'ësa peyera chupe.

⁶¡Ovɨ'aretera akoi ava oyeroyaño va'e che rese!”

⁷Opase yuvɨraso ichui, Jesús omboɨpɨ oñe'ë ava upe Juan rekokwer rese, aipo e'i chupe: “¿Mba'evo pesepia ɨvɨ ava pore'ɨ̇sa rupi pesose? ¿Inungar ɨvɨtu ombovava-vava kapi'iata imö'a?

⁸Anise, ¿mba'e vo evokoiyase pesepia? ¿Ñepëi kuimba'e iturukwar porañeteai va'e pi'ä? Pe rumo peikwa ite oyemonde tuprɨai va'e yuvɨrekoi mborerekwar ɨvate katu va'e rëtäve.

⁹Evokoiyase, ¿Mba'e repia itevo peso? ¿Ñepëi Tüpä ñe'ë mombe'usar repia pi'ä? Supiete, evokoi ɨvate katu va'e ite Tüpä ñe'ë mombe'usar sui.

¹⁰Juan resendar Ikwachiaprɨ araka'endar pɨpe aipo e'i: ‘Che amondora nde renondeve che ñe'ë mombe'usar, nde raperä moigätu agwä.’

¹¹Supiete, opakatu yuvɨrekoi va'e kuimba'e eta, ndipoi ete ñepëi ava seko ɨvate katu va'e Juan Oporoapirämo va'e sui. Yepe a'e ɨvate katu va'e viña, Tüpä mborerekwasave rumo a'e seko mbegwemi va'e ɨvate katura ichui.

¹²Juan Oporoapirämo va'e ousa suive tuprɨ Tüpä povrɨ pendar oiporara mba'e-mba'e tëi yuvɨreko, osä'a-sä'a ava opirätäsa pɨpe imokañɨ agwä.

¹³Opakatu Tüpä ñe'ë mombe'usareta rembikwachia pɨpe, omombe'u Tüpä mborerekwasa yuvɨreko, iyavei Moisés porokwaita ikwachiaprɨ pɨpe avei imombe'usa Juan yusa rupive ite;

¹⁴peipotase che reroyara peye, Juan rumo a'e Elías Tüpä ñe'ë mombe'usar. A'e imombe'uprɨ ou va'erä kuri.

¹⁵Vɨreko va'e oapɨsa, tosendu tuprɨ.

¹⁶¿Mba'e rese pi'ä amboyoyara ava rekokwer kurïtëindar? Esepia oyoya tuprɨ chi'ïvä'e rese ogwapɨ igwayɨ tëi va'e okar gwasuve iyavei säse puku-puku omborɨpar upe yuvɨreko:

¹⁷‘Oromoñe'ë tëi mimbɨ, pe rumo ndapepɨvoi ete iyavei orosapukai tëi mba'e porasei vɨ'are'ɨ̇sa resendar, ichui ndapeyase'oi ete.’

¹⁸Esepia Juan Oporoapirämo va'e ou, a'e ndokarui ndoɨ'ui va'e avei, aipo peye avei chupe vɨreko karugwar oyese.

¹⁹Ipare koiye katu rumo ou ava ɨvate katu va'e Ra'ɨrɨ, okaru iyavei oɨ'u avei, ipare aipo peye, ko ikaru gwasuai va'e sekoi iɨ'u gwasuai va'e avei, ava angaipa viyar mborɨpar tëi gwarepochi rerokwasar mborɨpar tëi peye avei cheu. Tüpä mba'ekwasa rumo, a'e ikwasara sembiapokwer rese.”

²⁰Evokoiyase Jesús omboɨpɨ oñe'ë pirätä opakatu tekwa pendar upe a'eve oyapo atɨ katu mba'e poromondɨisa viña, esepia ni'ä ndosekuñaröi ete gwekokwer Tüpä upe narä yuvɨreko. Sese Jesús aipo e'i chupe:

²¹“¡Peparaɨsu ava tekwa Corazín pendar! ¡Pe avei peparaɨsu, tekwa Betsaida pendar! Esepia ni'ä Tiro Sidón ve yaposara poromondɨisa viña a'e rumo yaposa ite pe pa'üve, araka'eve ite rumo oyevɨpara Tüpä upe yuvɨreko viña, opa aveira omonde turukwar yanavusu va'e iyavei tanimbu omondo oyese yuvɨreko viña.

²²Pe rumo peipɨsɨra ɨvate katu va'e Tüpä ñemoɨrösa ava Tiro Sidón pendar sui arɨ kañɨ pɨpe koiye.

²³Nde avei, tekwa Cafarnaúm, ¿pe pemoäro ko ɨvave oso va'erä viña? ¡Pe rumo pe mondosara ɨvɨkwar ipɨkuku katu va'e pɨpe! Esepia ni'ä ko tekwa Sodoma ve yaposara poromondɨisa va'e viña a'e yaposa ite peü, a'e tekwa kurïtëi oime vɨte itera viña.

²⁴Supiete aipo a'e peü, arɨ kañɨ pɨpe peipɨsɨra ñemoɨrösa ɨvate katu va'e ɨvɨ Sodoma ɨgwar sui kuri.”

²⁵A'e arɨ pɨpe, Jesús aipo e'i: “Che Ru, avɨye ndeu che Yar ɨva pendar, iyavei ɨvɨ pɨpendar ereiko, esepia nde eremboyekwa ite ko ñe'ësa ava seko mbegwemi va'e upe ereñomi ava imba'ekwa katu va'e sui.

²⁶Supiete che Ru, esepia evokoi rupi ete mba'e ereipota.”

²⁷“Che Ru opakatu mba'e ombou cheu. Iyavei ndipoi ete ava Chekwa tuprɨ va'e yuvɨreko, che Ru gweraño ite rumo Chekwa; ndipoi avei che Ru oikwa tuprɨ va'e yuvɨreko no, che gweraño ite aikwa iyavei akoi ambuae ava upe aikwa uka potase oikwa itera yuvɨreko.

²⁸Peyu cheu opakatu ikwerai va'e oporavɨkɨsa rese, iyavei che amondora pɨtu'usa peü.

²⁹Peroya mborokwaita amondo va'e peü, iyavei peyembo'e katu che rekokwer sui, esepia ni'ä areko ite poroarösa vichiko iyavei che rekokwer yemominisa pɨpe; a'ese ramo ite peyosɨra pɨtu'usa avɨye va'e.

³⁰Akoi amondo va'e peü a'e ndayavai ete imboavɨye agwä, iyavei mborokwaita amondo va'e peü a'e ndiposɨi ete seraso pɨrä.”