Read Guarayu MATEO 12 Bible Online

MATEO 12 - Guarayu bible

MATEO 12

¹Mbɨtu'usa arɨ pɨpe Jesús yuvɨraso gwemimbo'e rese, ogwata mba'e mitɨ̇ pa'ü rupi. A'ese semimbo'e ndasɨepoi ete yuvɨreko. Evokoiyase trigo rä'ɨi oipo'o-po'o ñoite gwemi'urä yuvɨreko.

²Fariseo eta osepiase, aipo e'i Jesús upe yuvɨreko: — Esepia nde remimbo'e eta, oyapoño ite mba'e mbɨtu'usa arɨ pɨpe yuvɨreko.

³A'e rumo omboyevɨ chupe: — ¿Ndapeyerokɨi vo ikwachiaprɨ araka'endar rese mborerekwar gwasu David rembiapokwer ondugwer reseve vɨepore'ɨ̇se yuvɨreko?

⁴Yuvɨroike tüpäro pɨpe mboyape imboeteiprɨ Tüpä upendar u agwä ondugwer reseve, a'e ndipotasai i'u agwä chupe indugwer upe avei viña, pa'i upeño ite ipotasa i'u agwä yepi.

⁵¿Ndapeyerokɨi vo Moisés porokwaita resendar pɨpe esepia ni'ä pa'i tüpäro rese añekosar ndopɨtu'ui ete mbɨtu'usa arɨ pɨpe nda'ei rumo oyemboangaipa ipɨpe yuvɨreko?

⁶Supiete aipo a'e peü kurïtëi oime ko'ave ɨvate katu va'e tüpäro sui.

⁷Pe evokoiyase ndapesendukwai ete ko ñe'ësa: ‘Che aipota perekokwer sekoira mba'e tuprɨ pɨpe, iyavei anichira peropove'ë porerekosa mba'e yukaprɨ tëi cheu.’ Pesendukwase rumo ko ñe'ësa viña, ndape mbo'a ukai chira mba'e aposare'ɨ̇ mba'e sembiapo e'ɨ̇ pɨpe viña.

⁸Esepia, ava ɨvate katu va'e Ra'ɨrɨ ñoite vɨreko omborerekwasa mbɨtu'usa arɨ rese.

⁹Jesús oso ichui, ipare oike judío oɨ ñemonu'äsave.

¹⁰A'eve oime mbɨa ñepëi ipo ko kotɨgwer novɨi va'e; esepia ni'ä oseka tëi Jesús mbo'a uka agwä mba'e naporäi va'e pɨpe yuvɨreko, aipo e'i oporandu chupe: — ¿Iya pi'ä mbɨtu'usa arɨ pɨpe imba'easɨ va'e imbogwerasa yepi?

¹¹Jesús rumo omboyevɨ chupe: — ¿Uma pi'ä pe pa'ü pendar, vɨrekose gweimba ovesa ipare ovɨapise ɨvɨkwar mbɨtu'usa arɨ pɨpe ndosoi chira pi'ä senose viña?

¹²Esepia ni'ä ¡ava rekokwer avɨye katu ite ovesa sui! Evokoiyase, iyakatu ñoite yayapo va'erä mba'e avɨye va'e mbɨtu'usa arɨ pɨpe yepi.

¹³Evokoiyase aipo e'i imba'easɨ va'e upe: — Eicho'o nde yɨva. Evokoiyase oicho'ose oyɨva, okwera tuprɨ voi inungar ambuae iyɨva.

¹⁴Evokoiyase fariseo eta opase yuvɨnosë yuvɨraso, oyemoigätupa voi ete Jesús yuka agwä yuvɨreko.

¹⁵Jesús rumo, oikwase ipɨ'a ñemoñetasa, a'ese öseño oso ichui, ava evokoiyase seta iteanga yuvɨraso supi. Iyavei Jesús ombogwera opakatu ava imba'easɨ va'e,

¹⁶iyavei che mombe'ui rene ava upe peye e'i.

¹⁷Egwë e'i yavɨyepa Tüpä ñe'ë mombe'usar Isaías remimombe'ugwer, araka'endar aipo e'i va'e:

¹⁸“Ko che mboyeroyasar sekoi che rembiporavo, che rembiaɨsu, sese ayembovɨ'a eteprɨ. Amondora chereko pirätäsa Espíritu chupe, a'e omombe'u aveira mba'e i'ɨ̇vi va'e opakatu ava ɨvɨ pɨpendar upe.

¹⁹Noiñe'ë poepɨ-epɨi chira ava, nasäse-säsei tëi chira; iyavei ndosendui chietera ava iñe'ë okar rupi yuvɨreko.

²⁰Nomopëi chietera patavɨi öpe va'ekwer nombogwei chietera tata sätachïmi va'e öi, egwë e'i rane itera mba'e moigätupa tuprɨ oiko.

²¹Iyavei opakatu ɨvɨ rupindar oyeroyara yuvɨreko sese.”

²²Vɨraso Jesús upe ñepëi ava ndasesapɨsoi va'e iyavei niñe'ë gätui va'e, a'e karugwar vɨreko va'e oyese, ipare rumo Jesús ombogwera sesa maräsa sui omoñe'ë gätu aveino.

²³Opakatu ava oyepɨ'a mondɨisave aipo e'i tëi yuvɨreko: “¿Ko revo aipo David Ra'ɨrɨ sekoi?”

²⁴Osenduse rumo ko, fariseo eta aipo e'i yuvɨreko: “Ko mbɨa karugwar rerekwar Beelzebú, pirätäsa pɨpe tëi omboyepepɨ karugwar ava sui.”

²⁵Jesús rumo, oikwaño voi ete ipɨ'a ñemoñetasa, sese aipo e'i chupe: “Opakatu tekwa gwasu oyemboya'opase yuvɨreko yeamotare'ɨ̇sa pɨpe, a'e opara oñemokañɨ tëi yuvɨreko; iyavei ñepëi tekwa pɨpe ava oyemboya'o va'e oñeämotare'ɨ̇sa pɨpe, a'e ndoyuvɨreko tuprɨi chietera.

²⁶Egwë e'i avei, ko Karugwar vɨnose avei Karugwar oyesui, oyeupeae rumo oyemboya'o oiko; ¿marä e'ira evokoiyase opirätäsa movɨräkwä rereko?

²⁷Pe rumo aipo peye cheu a'e omboyepepɨ karugwar Beelzebú pirätäsa pɨpe sui tëi; egwë e'ise viña ¿ava vo omondo pirätäsa pe remimbo'e eta upe omboyepepɨ va'erä karugwar? Sese a'e avei, pe remimbo'e omboyekwa mba'e pe rembiavɨ yuvɨreko peü.

²⁸Esepia che amboyepepɨse karugwar Tüpä Espíritu pirätäsa pɨpe, a'e omboyekwa ite Tüpä mborerekwasa ɨva pendar oyepota va'e peü narä.”

²⁹“¿Marä e'ira vo aipo ava oike ipirätä iteanga va'e rëtäve oñomi va'erä mba'e ichui viña, yɨpɨndar rumo oñapɨ̇chi-pɨ̇chi rane itera? A'ese ramo ite oikatura mba'e ñomipa ichui.

³⁰Akoi ava ndasekoi va'e che rupi, a'e che amotare'ɨ̇mbar tëi sekoi; akoi ava nomonu'äi va'e che rupi, a'e omosäi tëi ava yuvɨreko che sui.

³¹Sese aipo a'e peü Tüpä iñeröira ava upe opakatu yangaipa rese opakatu ava iñe'ë marä-marä tëi va'e upe avei, niñeröi chietera rumo iñe'ë-ñe'ë tëi va'e Espíritu Maräne'ɨ̇ upe.

³²Tüpä iñeröira akoi oñe'ërai va'e ava ɨvate katu va'e Ra'ɨrɨ upe; niñeröi chietera rumo akoi oñe'ërai va'e Espíritu Maräne'ɨ̇ rese, ko ɨvɨ pɨpe iyavei koiye katu no.”

³³“Ɨvɨra avɨyese, i'a avei avɨyera; ɨvɨra naporäise, i'a avei naporäi chira; sese ɨvɨra ikwasa i'a tuprɨsa rese.

³⁴¡Pe mboi nungar tëi peiko! ¿Marä peyeravo mba'e avɨye va'e mombe'u, pe tuprɨ avei ni'ä ndaperekoporäi va'e? Esepia pe pɨ'a pɨpe sui tëi, osë peñe'ë agwä.

³⁵Ava avɨye va'e omombe'u mba'e avɨye va'e avei, ava naporäi va'e omombe'u mba'e naporäi va'e avei, esepia mba'e naporäi va'e sese ite sekoi.

³⁶Iyavei che aipo a'e peü arɨ kañɨ pɨpe opakatu opara omombe'u oñe'ë-ñe'ë tëisa yuvɨreko kuri.

³⁷Esepia peñe'ë pɨpe sui porandusara mba'e rese peü, iyavei pemombe'use mba'e pereko paraɨsusa pɨpe anise ite peipɨsɨra ñemoɨrösa ndopai va'e.”

³⁸Evokoiyase fariseo iyavei Moisés porokwaita rese oporombo'e va'e aipo e'i yuvɨreko Jesús upe: — Porombo'esar, ore orosepia pota ite mba'e nde rembiapo poromondɨisa resendar.

³⁹Jesús rumo omboyevɨ chupe: — Pe ava ndasekoporäi va'e ndiporeroyai va'e avei peporandu poromondɨisa tekokwer kwa agwä rese; che rumo namboyekwai chira ambuae poromondɨisa; Tüpä ñe'ë mombe'usar Jonás rekokwer gweraño amboyekwara peü.

⁴⁰Esepia inungar Jonás mbosapɨ arɨ iyavei mbosapɨ pɨ̇tü pira gwasu avɨterve sekoi, egwë e'i aveira ava ɨvate katu va'e Ra'ɨrɨ mbosapɨ arɨ iyavei mbosapɨ pɨ̇tü tuira ɨvɨvrɨve.

⁴¹Evokoiyase arɨ kañɨ pɨpe tekwa Nínive ɨgwar oñarapü'ara, oimese porandusa yuvɨreko ko ava kurïtëindar upe, iyavei a'e pemondora mba'e tëi pɨpe; esepia ni'ä Nínive ɨgwar oyevɨpa Tüpä upe osenduse Jonás ñe'ë yuvɨreko, iyavei kurïtëi oime va'e ko'ave, a'e Jonás sui ɨvate katu va'e sekoi.

⁴²Iyavei kuña mborerekwar ɨvate katu va'e Iro'ɨ kotɨ sui oñarapü'ara arɨ kañɨ pɨpe kuri, porandusase ava kurïtëindar upe, iyavei a'e omondora mba'e tëi pɨpe; esepia a'e ou amombrɨ ɨvɨ sui osendu va'erä Salomón mba'e kwasa, iyavei oime ko'ave ɨvate katu va'e Salomón sui.

⁴³“Iyavei karugwar osëse ava sui, ogwata tëi ɨvɨ ipiru va'e rupi oseka tëi opɨtu'u agwä; ipare rumo ndoyosɨise, ipɨ'a ñemoñeta aipo e'i:

⁴⁴‘Ayevɨ irira chereko agwerve vicho.’ A'eve oyevɨse oso, osepia iri mbɨa sekokwer inungar oɨ ndiporusai va'e, sa'uvaprɨ tuprɨai öi.

⁴⁵Evokoiyase oso ñuvɨrïo ova karugwar naporäi katu va'e monu'ä oyesui, iyavei opakatu tuprɨ yuvɨroike ava avɨterve, a'e opɨta mba'e tëi katu yɨpɨndar va'e sui. Egwë e'i tuprɨ aveira yuvɨreko ava kurïtëindar ndiporeroyai va'e.”

⁴⁶Jesús oñe'ë vɨteseve ava upe, a'ese ichɨ tɨvɨreta reseve okarve yuvɨno'ä. A'e oñe'ë pota yuvɨreko chupe,

⁴⁷a'ese oime ñepëi omombe'u va'e Jesús upe: — Nde sɨ, iyavei nde rɨvrɨ eta reseve ko okarve yuvɨno'ä, iyavei oñe'ë pota yuvɨreko ndeu.

⁴⁸A'e rumo omboyevɨ omombe'u va'e upe: — ¿Ava pi'ä che sɨ, iyavei ava pi'ä aipo che rɨvrɨ?

⁴⁹Evokoiyase, omboyekwa opo pɨpe gwemimbo'e eta upe aipo e'i: — Ko che sɨ eta, iyavei ko che rɨvrɨ eta.

⁵⁰Esepia akoi che Ru ɨva pendar remimbotar oyapo va'e, a'e che rɨvrɨ, che reindrɨ iyavei che sɨ yuvɨrekoi.