Read Guarayu MATEO 13 Bible Online

MATEO 13 - Guarayu bible

MATEO 13

¹A'e arɨ pɨpe Jesús osë oɨ sui oso, ogwapɨ ɨpa popɨve öi.

²A'eve ava oñemonu'ä atɨse yuvɨreko, Jesús o'a ɨarusu pɨpe ogwapɨ öi, evokoiyase ava opa opɨta ɨpa popɨ rupi yuvɨreko.

³Evokoiyase omboɨpɨ oñe'ë mba'e opakatu porombo'esa oime va'e rese. Aipo e'i ava re'ɨi upe: “Ñepëi ma'etɨ̇sar osë oma'etɨ̇.

⁴Iyavei oma'etɨ̇se, oitɨ mba'e rä'ɨi perɨ rupi ñepëi save, ipare yugweru re'ɨi vɨräi opaño yuvɨro'u.

⁵Ambuae save ovɨapi ita pa'ü rupi, a'eve ndipoi tuprɨ ɨvɨ; a'e mba'e rä'ɨi sorɨ poyava voi ete, esepia ɨvɨ ndipɨkukui ete a'eve;

⁶arɨ osëse ou, opaño ite osapɨ, iyavei ndasapoi ete o'ä, opaño ite ipiru.

⁷Ambuaeve avei mba'e rä'ɨi ovɨapi yu pa'üve, a'e yu rumo sorɨ poyava katu yuvɨreko ichui sese opaño oyopɨ.

⁸Ambuaeve rumo ovɨapi ɨvɨ avɨye va'e save, iyavei a'e seta i'a imonu'äsa; oime o'a vɨreko cién tuprɨ sa'ɨ̇i, ambuae sesenta, ambuae evokoiyase treinta.

⁹Vɨreko va'e oapɨsa tosendu tuprɨ ko ñe'ësa.”

¹⁰Semimbo'e eta oyemboya Jesús rese iyavei oporandu yuvɨreko chupe ma'erä vo eremboyoya-yoya mba'e rese nde porombo'esa ava upe yepi.

¹¹Jesús omboyevɨ gwemimbo'e eta upe: “Peü rumo Tüpä oikwa uka ite mba'e ndikwasai va'e omborerekwasa resendar; ambuae ava upe rumo ndoikwa ukai ete.

¹²Esepia akoi vɨreko va'e upe, imondosa katura, iyavei vɨreko katu itera mba'e; akoi ndovɨrekoi va'e mba'e, vɨreko va'e mba'e movɨrö a'e ichui serokwasa ñoitera.

¹³Sese aipo añe'ë peü, mba'e porombo'esa mboyoyasa rese; esepia a'e oma'e yuvɨreko, ndosepiai rumo mba'e; osendu tëi, a'e rumo ndayapɨsai iyavei ndosendukwai ete mba'e yuvɨreko.

¹⁴Egwë e'i, yavɨye rane itera ñe'ësa sesendar yuvɨreko Isaías remimombe'ugwer rupi: ‘Pesendu tëira ni'ä, ndapeikwai chira rumo, pesepia tëira ni'ä, ndaperesapɨsoi chietera rumo sese.

¹⁵Esepia ava pɨ'a ñemoñetasa ko tekwa pɨpendar naporäi ete, ndayapɨsai ete sendu potae'ɨ̇save ndoyemboesapɨsoi avei sepia potae'ɨ̇save, ndosepia potai mba'e yuvɨreko ndosendu potai avei ñe'ësa avɨye va'e, ndosendukwa potai mba'e ndoyevɨ potai avei yuvɨreko cheu, che nambogwerai va'erä avei.’ ”

¹⁶“Pe rumo perorɨvetera, esepia pereko peresa mba'e repia agwä iyavei peapɨsa mba'e rendu agwä.

¹⁷Supiete seta Tüpä ñe'ë mombe'usar iyavei ava seko katuprɨ va'e araka'endar osepia pota tëi mba'e pesepia va'e, ndosepiai ete rumo; iyavei osendu pota tëi ko pesendu va'e, ndosendui ete rumo yuvɨreko.”

¹⁸“Peyapɨsaka tuprɨ, ko yembo'esa mba'e mitɨ̇ resendar aipo e'i va'e:

¹⁹Osendu va'e Tüpä ñe'ëngagwer imborerekwasa resendar ipare rumo ndosendukwai yuvɨreko, a'e inungar mba'e rä'ɨi ovɨapi va'e perɨ rupi; ipare karugwar ou chupe vɨrokwa Tüpä ñe'ëngagwer ipɨ'a pɨpe sui.

²⁰Mba'e rä'ɨi ovɨapi va'e ita pa'ü rupi a'e inungar osendu va'e Tüpä ñe'ëngagwer iyavei oipɨsɨ ovɨ'aretesa pɨpe,

²¹esepia inungar ko ndovɨrekoi ete gwapo, ovɨräkwä agwä; egwë e'i avei evokoi nungar ava oimese mba'e-mba'e tëi Tüpä ñe'ëngagwer rese chupe, kurïtëimi seroya e'ɨ̇save oyepepɨ ichui.

²²Mba'e rä'ɨi ñotɨ̇mbrɨ yu pa'ü rupi, a'e inungar ava osendu va'e Tüpä ñe'ëngagwer, ko ɨvɨ pɨpendar mba'e eta rese ipɨ'a ñemoñeta gwasuai iyavei mba'e potaraisa pɨpe oyembopa uka oiko. Iyavei opakatu ko Tüpä ñe'ëngagwer omokanɨ, ichui sekokwer ndavɨye iri ete, inungar mba'e mitɨ̇ ndi'ai va'e.

²³Mba'e rä'ɨi ñotɨ̇mbrɨ ɨvɨ avɨye va'e save a'e inungar osendu va'e Tüpä ñe'ëngagwer iyavei osendukwa inungar akoi ko mba'e mitɨ̇ i'a iteanga va'e, inungar ñepëi-pëi sa'ɨ̇i sui osë cien i'a, sesenta i'a, anise treinta tuprɨ vɨreko va'e o'a.”

²⁴Jesús omombe'u iri ko ambuae mba'e rese yembo'esa oyoya va'e: “Tüpä mborerekwasa oyoya tuprɨ ava oɨvɨ pɨpe mba'e rä'ɨi oñotɨ̇ va'e rese;

²⁵opakatu yuvɨroke seve rumo, oyepota ñepëi yamotare'ɨ̇sar, oñotɨ̇ ka'a naporäi va'e trigo pa'ü rupi, ipare osoño ichui.

²⁶Akoi trigo okwakwase iyavei i'a pota agwä, a'ese oyekwa ka'a naporäi va'e ipa'üve.

²⁷Evokoiyase oporavɨkɨ va'e yuvɨraso omombe'u iyar upe: ‘Ore rerekwar, akoi mba'e rä'ɨi ereñotɨ̇ va'e nde ɨvɨ pɨpe a'e avɨye va'e ite, ¿kesui ru ka'a sorɨ naporäi va'e ipa'üve?’

²⁸Mba'e yar rumo aipo e'i chupe: ‘Oime revo che amotare'ɨ̇sar ko oyapo va'e.’ Oporavɨkɨ va'e rumo oporandu yuvɨreko chupe: ‘¿Ereipota vo oroso va'erä ka'a naporäi va'e rapo'opa ichui?’

²⁹A'e rumo aipo e'i chupe: ‘Ani, avɨyeteramo ka'a naporäi va'e rupive pesapo'o tiëtera trigo.

³⁰Avɨye katu peseya tokwakwaño oyoya tuprɨ yavɨyese voi mba'e mitɨ̇; a'ese che ayokwaira oporavɨkɨ va'e ka'a naporäi va'e rane rerokwa agwä imboapu'a uka ipare oñapɨ̇chira sapɨpa, ichui oyapokatura trigo rä'ɨi che mba'e apokatusave yuvɨreko.’ ”

³¹Jesús omombe'u avei ko ambuae yembo'esa oyoya va'e: “Tüpä mborerekwasa ɨva pendar oyoya tuprɨ mostaza rä'ɨi rese inungar ava oñotɨ̇ va'e oɨvɨ pɨpe.

³²Supiete, ko mostaza rä'ɨi ta'ɨmi opakatu ambuae mba'e rä'ɨi sui; ipare rumo okwakwase, tuvicha katu ambuae mba'e mitɨ̇ sui, iyavei a'e oyeapo inungar ɨvɨra, tuvicha katu va'e ite ambuae mitɨ̇ sui, oyemboaitɨ avei säkä rese vɨräi re'ɨi yuvɨreko.”

³³Omombe'u avei ambuae ko porombo'esa: “Tüpä mborerekwasa inungar mboyape mboapeposa ñepëi kuña omboyese'ase mbosapɨ sa'ämbrɨ trigo ku'i rese opakatu imboapepo agwä yepi.”

³⁴Jesús omombe'u opakatu ko ava upe oporombo'esa, omboyoya-yoya va'e ambuae mba'e rese.

³⁵Ko rumo yavɨye ite imombe'uprɨ Tüpä ñe'ë mombe'usar rembikwachia araka'endar: “Añe'ëra iyavei amboyoyara porombo'esa ambuae mba'e rese; amombe'u aveira mba'e nipore'ɨ̇i va'e ɨvɨ Tüpä rembiapo suive tuprɨ.”

³⁶Evokoiyase Jesús omboyevɨpa ava imondo ipare oike oɨ pɨpe oso, a'eve semimbo'e eta oyemboya sese ipare oporandu yuvɨreko chupe omombe'u va'erä ko porombo'esa ka'a naporäi va'e resendar.

³⁷Jesús rumo omboyevɨ chupe: “Akoi oñotɨ̇ va'e mba'e rä'ɨi avɨye va'e, a'e sekoi ava ɨvate katu va'e Ra'ɨrɨ,

³⁸iyavei mba'e mitɨ̇ rupa a'e ava ko ɨvɨ pɨpendar. Mba'e rä'ɨi avɨye va'e, a'e ava Tüpä povrɨ pendar, iyavei ka'a naporäi va'e, a'e ava karugwar suindar yuvɨrekoi va'e,

³⁹iyavei yamotare'ɨ̇sar oñotɨ̇ ko ka'a naporäi va'e, a'e karugwar ite. Mba'e mitɨ̇ monu'äprɨ a'e inungar opa va'erä arɨ kañɨ koiye, iyavei akoi omonu'ä va'e mba'e mitɨ̇, a'e yuvɨrekoi mbigwai ɨva pendar.

⁴⁰Inungar akoi ka'a naporäi va'e imonu'äsa ipare imondosa tatave sapɨ agwä, egwë e'i aveira arɨ kañɨ pɨpe koiye.

⁴¹Ava ɨvate katu va'e Ra'ɨrɨ omboura gwembigwai ɨva pendar opakatu ava reka omboangaipa uka va'e ambuae eta, iyavei mba'e-mba'e tëi aposar.

⁴²Omondopara karugwar ratave ndopai va'esave, a'eve oyase'o tëira iyavei oñeäi mbotere-tere tëira yuvɨreko.

⁴³Evokoiyase seko tuprɨ va'e inungar arɨ osesape egwë e'i tuprɨ itera Oyesupa mborerekwasave yuvɨreko.Vɨreko va'e oapɨsa tosendukwa tuprɨ.”

⁴⁴“Ko Tüpä mborerekwasa ɨva pendar oyoya tuprɨ mba'e sepɨrusuai va'e ñomiprɨ ɨvɨ pɨpendar rese. Ñepëi ava rumo oyosɨ mba'e sepɨrusuai va'e, ipare oñomi iri a'eve tuprɨ aveino; ovɨ'aretesa pɨpe, oso ipare omondopa opakatu mba'e vɨreko va'e, ichui opa a'e ɨvɨ vɨrokwa.”

⁴⁵“Egwë e'i tuprɨ avei Tüpä mborerekwasa inungar ava mba'e rerokwasar oseka va'e ita sepɨrusuai va'e yepi;

⁴⁶oyosɨse rumo sepɨrusu katu va'e, vɨraso imondopa opakatu mba'e vɨreko va'e ipare oso ambuae rerokwa.”

⁴⁷“Tüpä mborerekwasa inungar pira mbo'asa, imondosa paragwasu pɨpe, ipare omonu'ä opakatu-katu tëi pira.

⁴⁸Akoi pira mbo'asa savapɨpose, pira mbo'asar rumo vɨnose ɨvɨ ätasave yuvɨreko, a'eve ogwapɨ yuvɨnoi pira poravo; oyapokatu avɨye va'e ɨruova pɨpe iyavei omombopa naporäi va'e yuvɨreko.

⁴⁹Egwë e'i aveira arɨ kañɨ pɨpe koiye: a'ese mbigwai ɨva pendar yuvɨnosëra opakatu ava ndasekoporäi va'e mboyepepɨ agwä ava seko katuprɨ va'e sui.

⁵⁰Iyavei imondosara ava ndasekoporäi va'e karugwar ratave ndopai va'esave. A'eve oimerä yase'osa iyavei sɨkeyesa mba'e-mba'e tëi sui.”

⁵¹Jesús oporandu: — ¿Pesendukwa vo pe opakatu ko mba'e? — Orosendukwa ite — e'i imboyevɨ yuvɨreko chupe.

⁵²Evokoiyase Jesús aipo e'i: — Akoi ñepëi oporombo'e va'e porokwaita ɨva pendar rese, oyembo'e va'e avei Tüpä mborerekwasa rese, a'e inungar ava oɨ yar, iyavei mba'e vɨreko va'e yapokatuprɨ oikwa ite senose mba'e ipɨasu va'e mba'e kwakwa aveino.

⁵³Jesús omombe'u pare ko yembo'esa, ipare oso ichui

⁵⁴oyepota gwekwave oso, a'eve omboɨpɨ oporombo'e ava oɨ judío ñemonu'äsave. A'e pendar ava rumo oyepɨ'amondɨi tëi aipo e'i yuvɨreko: — ¿Ke pi'ä ko oyembo'e iteanga omba'ekwa agwä? ¿Marä e'i pi'ä ko mba'e poromondɨisa apo?

⁵⁵¿Nda'ei vo akoi ko mba'e aposar ɨvɨra rese oporavɨkɨ va'e iyavei nda'ei vo María ichɨ? ¿Nda'ei vo ko Santiago, José, Simón iyavei Judas rɨvrɨ,

⁵⁶iyavei ndoyuvɨrekovei vo seindɨreta yande pa'ü rupi? ¿Kesui vo evokoiyase ou imba'ekwa agwä?

⁵⁷Iyavei ndovɨroya potai ete yuvɨreko. Jesús rumo aipo e'i ava re'ɨi upe: — Opakatu tekwa rupi imboeteisa Tüpä ñe'ë mombe'usar, sekwa pɨpe iyavei sëtä pɨpe nomboetei ete yuvɨreko.

⁵⁸Iyavei ndoyapo atɨi ete poromondɨisa a'eve esepia ava a'e pendar ndovɨroyai Jesús yuvɨreko.