Read Guarayu MATEO 14 Bible Online

MATEO 14 - Guarayu bible

MATEO 14

¹A'e arɨ rupi Herodes, mborerekwar gwasu chinise Galilea ve, oyandu Jesús reräkwä,

²iyavei aipo e'i ava opɨtɨ̇vɨïsar upe: “Evokoi Juan Oporoapirämo va'e, a'e okwerayevɨ. Sese vɨreko pirätäsa poromondɨisa apo agwä.”

³Esepia Herodes yɨpɨndar oipɨsɨ sokenda uka agwä Juan. Herodías rekokwer sui tëi, a'e tɨvrɨ Filipo rembireko,

⁴esepia Juan aipo e'i Herodes upe: “Ndiyai ete ererekora nde rembireko nungar.”

⁵A'ese Herodes, oyuka pota voi ete Juan viña, osɨkɨyeño rumo ava eta sui, esepia opakatu vɨroya Juan yuvɨreko Tüpä ñe'ë mombe'usar sekoise.

⁶Herodes aragwer mboeteisa pɨpe, kuñatäi Herodías membrɨ osë opɨvoi ava re'ɨi icho'oprɨ rembiepiave. Herodes upe evokoiyase avɨyeai ete

⁷sese oyemoigätu ñepëi reseve omondo va'erä oporanduse mba'e vɨreko va'e rese chupe.

⁸Evokoiyase a'e kuñatäi oyeupe osɨ remimombe'u rupi, aipo e'i Herodes upe: — Embou Juan Oporoapirämo va'e akä tembi'u rɨru pɨpe cheu.

⁹Aipo ñe'ësa nombovɨ'ai ete mborerekwar ɨvate katu va'e Herodes; a'e rumo aipo e'i ete opakatu icho'oprɨ rovake, sese gweru uka omondo va'erä chupe.

¹⁰A'ese, oporokwai Juan akä asɨa agwä sokendasave;

¹¹ipare rumo vɨraso ñepëi tembi'u rɨru pɨpe ichui omondo kuñatäi upe yuvɨreko, a'e kuñatäi evokoiyase omondo osɨ upe.

¹²A'ese Juan remimbo'e oyepota yugweru, vɨraso setekwer ñotɨ̇ agwä yuvɨreko; ipare yuvɨraso Jesús upe imombe'u.

¹³Jesús oyanduse rumo, oso a'e ae ichui, ɨarusu pɨpe ava pore'ɨ̇save. A'e ramoseve ava oyandu yuvɨreko yuvɨnosepa voi gwekwa sui, ɨvɨ rupi yuvɨraso supitɨ agwä sekosave yuvɨreko.

¹⁴Ogweyɨse Jesús ɨarusu pɨpe sui, osepia ava re'ɨi; a'ese oiparaɨsuereko ava eta sese opa ombogwera imba'easɨ va'e serasoprɨ yuvɨreko chupe.

¹⁵Vɨrovɨse rumo pɨ̇tü oso, semimbo'e eta oyemboya yuvɨraso sese aipo e'i yuvɨreko chupe: — Esepia ka'aru ite kurïtëi, iyavei ndipoi ete mba'e oime va'e ko rupi. Emboyevɨ ava imondo, toyuvɨraso tekwa-tekwami rupi a'e ichui tovɨrokwa mba'e gwemi'urä yuvɨreko.

¹⁶Jesús omboyevɨ gwemimbo'e upe: — Ani ndiyai ete yuvɨraso; iyakatu pemondo pe mba'e semi'urä.

¹⁷A'e evokoiyase omboyevɨ yuvɨreko chupe: — Poyandepomi tëi rumo mboyape orovɨreko iyavei ñuvɨrïomi tëi pira no.

¹⁸Jesús aipo e'i chupe: — Peru aipo ko'ave cheu.

¹⁹Evokoiyase aipo e'i ava re'ɨi upe pegwapɨpa kapi'i arɨ rupi. Ipare oipɨsɨ poyandepo va'e mboyape ñuvɨrïomi va'e pira ichui oma'ese ɨva rese, aipo e'i avɨye ndeu che Ru ichui omombɨte-mbɨte mboyape, imondo gwemimbo'e upe a'e evokoiyase omboya'o-ya'o ava eta upe semi'urä yuvɨreko.

²⁰Opakatu ite okaru i'ɨ̇taröpa tëi yuvɨreko; ipare opa omonu'ä sumbɨre-mbɨre va'e, ipɨpe opa omboapɨpo opayandepo yovaive ñuvɨrïo ɨruova tuprɨ yuvɨreko.

²¹Okaru va'e retakwer rumo cinco mil kuimba'e tuprɨ, kuña ndipapasai ete chi'ïvä'e aveino.

²²Ko ipare rumo, Jesús pe'a pe rane ɨarusu pɨpe e'i gwemimbo'e eta upe, osasa va'erä ɨpa yuvɨreko iyavei oyepota va'erä sovai yuvɨraso senondeve a'e evokoiyase avɨye e'i vɨte ava upe öi.

²³Ava mboyepepɨpa pare rumo, Jesús oyeupi oso a'e ae ɨvɨtrɨ rese, oyerure agwä. Oyepotase pɨ̇tü ou, a'eve vɨteño ite a'e sekoi,

²⁴evokoiyase ɨarusu oso pukuse ite ɨpa popɨ sui. Ɨvɨtu ipirätä va'e osovaïchi yuvɨreko, sese o'ɨtu va'e nambegwe-mbegwei okwa sese.

²⁵Ko'ë potase, Jesús ogwata oso ɨ arɨ rupi gwemimbo'e kotɨ.

²⁶Semimbo'e osepiase ɨ arɨ rupi igwatase, oyembosɨkɨye tëi säse puku-puku osɨkɨyepave aipo e'i yuvɨreko: — ¡Ägwer tëimo evokoi!

²⁷Jesús rumo oñe'ë, aipo e'i chupe: — ¡Peyemovɨräkwäño! ¡Che tëi: pesɨkɨyei rene!

²⁸Evokoiyase Pedro omboyevɨ chupe: — Che Yar, nde ite ereikose, tagwata katu ɨ arɨ rupi vicho nde pɨri.

²⁹— Erio ru — e'i Jesús chupe. Evokoiyase Pedro ogweyɨ ɨarusu pɨpe sui omboɨpɨ ogwata ɨ arɨ rupi oso Jesús kotɨ.

³⁰Ɨvɨtu pirätä va'e repiase rumo, osɨkɨye ichui; ipare rumo oso senise ɨpɨve säse puku-puku aipo e'i: — ¡Che Yar che pɨsɨrömi tëi eve!

³¹Egwë e'i ramoseve, Jesús oipɨsɨ ipo rese, aipo e'i chupe: — ¡Chi'ï tëi ereyeroya che rese! ¿Ma'erä vo ndereyeroyai che rese?

³²Yuvɨro'ase rumo ɨarusu pɨpe, opɨtu'u voi ɨvɨtu.

³³Evokoiyase yuvɨrekoi va'e ɨarusu pɨpe opa oñenopɨ'ä Jesús sovai, aipo e'i yuvɨreko chupe: — ¡Supiete katu nde ereiko Tüpä Ra'ɨrɨ!

³⁴Osasase ɨpa oyepota Genesaret ɨvɨ rese yuvɨraso.

³⁵Ava a'e pendar oikwa voi ete Jesús, iyavei ñe'ësa sesendar oikwa opakatu tekwami rupi omombe'u-mbe'u ava upe yuvɨreko. Vɨraso avei imba'easɨ va'e yuvɨreko chupe,

³⁶iyavei oporandu Jesús upe, opoko va'erä iturukwar popɨ rese yuvɨreko; opakatu opoko va'e iturukwar popɨ rese, a'e opa ite okwera yuvɨreko.