Read Guarayu MATEO 15 Bible Online

MATEO 15 - Guarayu bible

MATEO 15

¹Oyemboya Jesús rese movɨrö fariseo iyavei Moisés porokwaita rese oporombo'e va'e oyepota yugweru tekwa gwasu Jerusalén sui, ichui oporandu yuvɨreko chupe:

²— ¿Ma'erä vo nde remimbo'e ndogwatai yande ramoi araka'endar arakwasa rupi yuvɨreko? ¿Ma'erä vo porokwaita mboavɨye e'ɨ̇sa pɨpe ndoyepoi okaru agwä renonde yuvɨreko yepi?

³Jesús oporandu chupe: — ¿Ma'erä vo evokoiyase ndapemboyeroyai Tüpä porokwaita, pegwata va'erä araka'endar arakwasa rupi tëi?

⁴Esepia Tüpä aipo e'i: ‘Pemboyeroyara peyesupa iyavei pe sɨ’, iyavei ‘Iñe'ë marä va'e oyesupa iyavei osɨ upe, a'e osora manosave.’

⁵Pe rumo aipo peye akoi ñepëi ava aipo e'i va'e oyesupa osɨ upe avei: ‘Ndiyai chira mba'e mondo agwä peü, esepia opakatu mba'e areko va'e amondora Tüpä upe narä’;

⁶akoi aipo e'i va'e, ndiyai ete oipɨtɨ̇vɨï va'erä oyesupa anise osɨ. Egwë peyese pemokañɨ Tüpä porokwaita peyesui peremimbotar rupi tëi peiko va'erä.

⁷¡Pe inungar ava oñe'ë ñotëi va'e tekokwer rese yuvɨreko yepi! Supi tuprɨ ite Tüpä ñe'ë mombe'usar Isaías omombe'u pe rekokwer, aipo e'i:

⁸‘Ko tekwa pendar ava oyuru pɨpe tëi che mboetei yuvɨreko, ipɨ'a ñemoñetasa rumo amombrɨ ite che sui.

⁹Oyerure tuprɨ tëi yuvɨreko cheu; esepia iporombo'esa ava porokwaita suindar tëi.’

¹⁰Ipare Jesús oñe'ë ava upe aipo e'i: — Peyapɨsaka iyavei pesendukwa tuprɨ:

¹¹Mba'e oike va'e ava yuru rupi a'e nomboagaipai ete. Akoi mba'e osë va'e ava yuru pɨpe sui, a'e rumo omboangaipa.

¹²Evokoiyase semimbo'e eta oyemboya Jesús rese, aipo e'i oporandu yuvɨreko chupe: — ¿Ereikwa vo akoi fariseo eta oñemoɨrö nde ñe'ë renduse yuvɨreko?

¹³A'e rumo omboyevɨ gwemimbo'e eta upe: — Opakatu mba'e mitɨ̇ nda'ei va'e che Ru ɨva pendar remitɨ̇, a'e opara sapo'osa kuri.

¹⁴Egwë te'iño yuvɨreko, esepia evokoi ndasesapɨsoi va'e vɨrogwata ambuae ava ndasesapɨsoi va'e. Iyavei ñepëi ndasesapɨsoi va'e vɨrogwatase ambuae, ñuvɨrïo voi ovɨapira ɨvɨkwar pɨpe yuvɨraso.

¹⁵Pedro evokoiyase aipo e'i Jesús upe: — Emombe'u iri katu mba'e eremombe'u va'ekwer oreu.

¹⁶Jesús omboyevɨ chupe: — ¿Ndapesendukwa tuprɨ vɨtei ete vo ko ñe'ësa?

¹⁷¿Ndapeikwai vo opakatu mba'e akoi ava yuru rupi oike va'e oso yavɨterve, ipare osë setekwer sui?

¹⁸Ava pɨ'a ñemoñetasa sui osë va'e rumo iyuru rupi; a'e ava omboangaipa yepi.

¹⁹Esepia ava avɨter sui osë pɨ'a ñemoñeta raisa, porapichisa, mendasa sui yemboagwasasa, nomendai va'e yemboagwasa tëisa, mondasa, temirä iyavei ava rese ñemoñeta tëisa.

²⁰Ko nungar mba'e yapoprɨ a'e ava omboangaipa uka yepi; karusa renonde yepoi e'ɨ̇se a'e ava nomboangaipai ete sereko.

²¹Jesús osë ichui oso ɨvɨ Tiro iyavei Sidón rupi.

²²Iyavei ñepëi kuña cananea, a'e ɨvɨ rese sekoi va'e oyemboya oso sese, säse puku-puku aipo e'i: — ¡Che Yar David suindar, che paraɨsuerekomi tëi eve! ¡Che membrɨ vɨreko karugwar oyese a'e omombaraɨsu iteanga sereko!

²³Jesús rumo nomboyevɨi ete iñe'ë chupe. Evokoiyase semimbo'e eta oyemboya yuvɨraso sese aipo e'i yuvɨreko chupe: — Eyepepɨ avesui ere evokoi kuña upe, esepia ni'ä säse puku-puku ou yande rakɨkwei.

²⁴Jesús aipo e'i: — Tüpä che mbou Israel rekwa pendar upeño, esepia a'e ava inungar ovesa okañɨ tëi va'e yuvɨreko.

²⁵A'e kuña rumo oñenopɨ'ä sovai, aipo e'i chupe: — ¡Che Yar, che pɨtɨ̇vɨïmi eve!

²⁶Jesús omboyevɨ chupe: — Naporäi rumo yarokwa mboyape ava ra'ɨrɨ sui iyavei yamondo va'erä kave to'u.

²⁷A'e kuña aipo e'i chupe: — Supiete che Yar; kave avei rumo o'uño ite mboyape ra'ɨkwer ovɨapi va'e oyar karusa renda sui yepi.

²⁸Evokoiyase Jesús aipo e'i chupe: — ¡Kuña, erereko ite tuvicha va'e nde yeroyasa Tüpä rese! Avɨye tayaposa mba'e nde remimbotar rupi. Iyavei aipo i'e ramoseve, okwera voi ete imembrɨ.

²⁹Jesús osë ichui oso ɨpa ɨvɨi Galilea ve; ipare oyeupi ɨvɨtrɨ rese a'eve ogwapɨ öi.

³⁰Ava re'ɨi ete oñemonu'ä yugweru a'e sekosave. A'eve vɨraso yuvɨreko chupe ipäri-päri va'e, ndasesapɨsoi va'e, ndipɨndugwei va'e, niñe'ëgätui va'e, iyavei ambuae seta imba'easɨ va'e no, omondo Jesús rovai yuvɨreko, ipare opa ombogwera.

³¹Ava re'ɨi oyepɨ'amondɨi sepiase yuvɨreko ava niñe'ëgätui va'e opa iñe'ëgätu, ipäri-päri va'e okwera tuprɨ, ndogwatai va'e ogwatapa avei ndasesapɨsoi va'e osareko. Ipare omboɨpɨ Israel Tüpä mboetei yuvɨreko.

³²Jesús oñe'ë gwemimbo'e eta upe, aipo e'i chupe: — Iparaɨsu katu ko ava yuvɨreko cheu, esepia mbosapɨ arɨ yuvɨrekoi yande pɨri iyavei ndipoi ete mba'e semi'urä. Ndiyai sëtäve sɨe pore'ɨ̇ reseve amondo, avɨyeteramo ovɨrovɨapi-api tiëtera tɨepore'ɨ̇ perɨ rupi yuvɨreko.

³³Evokoiyase semimbo'e eta aipo e'i yuvɨreko chupe: — Evokoiyase ¿marä oro'era pi'ä tembi'u reka ava re'ɨi upe narä, ko'ave ava pore'ɨ̇sa rupi viña?

³⁴Jesús oporandu gwemimbo'e upe: — ¿Mbovɨvo mboyape pereko? — Orovɨreko ñuvɨrïo ova mboyape, iyavei movɨrö tëi pirami — aipo e'i imombe'u yuvɨreko chupe.

³⁵Evokoiyase opa omondo ava re'ɨi ombogwapɨ uka ɨvɨ arɨve,

³⁶a'ese oipɨsɨ opove ñuvɨrïo ova mboyape pirami reseve, ipare avɨye ndeu e'i Vu upe, ichui omboya'o-ya'o gwemimbo'e eta upe imondo, a'e evokoiyase omondopa ava re'ɨi upe yuvɨreko.

³⁷Evokoiyase opakatu ava okaru va'e i'ɨ̇taröpa ite, ipare omboapɨpo ñuvɨrïo ova ɨruova sumbɨre-mbɨre va'e yuvɨreko.

³⁸Okaru va'e retakwer yuvɨreko a'e cuatro mil kuimba'e, kuña, chi'ïvä'e retakwer rumo ndikwasai.

³⁹Ipare Jesús avɨye e'i ava mondopa, a'ese o'a ɨarusu pɨpe oso ɨvɨ Magadán rupi.