Read Guarayu MATEO 16 Bible Online

MATEO 16 - Guarayu bible

MATEO 16

¹Fariseo eta iyavei saduceo eta yuvɨraso Jesús repia, seko'ä agwä viña, oporandu poromondɨisa oyapo va'erä rese yuvɨreko chupe ikwa agwä emopore'ɨ̇ Tüpä suindar nde rekosa pɨpe e'i yuvɨreko.

²Jesús rumo omboyevɨ chupe: “Supiete amove ka'aruaipo peye: ‘Arɨ tuprɨai etera, esepia ɨva pirä iteanga’;

³iyavei añi'ïvëi aipo peye: ‘Ko pɨpe arɨ naporäi chira, esepia ɨva rese pirä iteanga pɨ̇tü-pɨ̇tü avei.’ Pe ni'ä peikwa ite mba'e ɨva resendar oyekwa va'e mombe'u, ¿marä vo evokoiyase ndapeikwai poromondɨisa kurïtëindar mombe'u?

⁴Ko ava ndasekoporäi ndipɨ'a ñemoñetai va'e oporandu poromondɨisa rese yuvɨreko; nimboyekwasai chietera chupe inungar poromondɨisa oso va'e Jonás upe.” Ichui oseyapaño ava oso.

⁵Evokoiyase semimbo'e eta opase osasa ɨpa rovai yuvɨraso, sesarai rumo mboyape rerasosa sui yuvɨreko.

⁶Evokoiyase Jesús aipo e'i: — Peikwa katu fariseo sui saduceo mboyape mboapeposa sui aveino.

⁷Semimbo'e eta aipo e'i tëi oyeupe yuvɨreko: — ¡Ndayarui ete rumo mboyape!

⁸Jesús rumo oikwa ite ipɨ'a ñemoñetasa, aipo e'i chupe: — ¿Ma'erä evokoiyase ndorovɨrekoi mboyape peye? ¡Ndapeyeroya tuprɨ vɨtei ete Tüpä rese!

⁹¿Ndapesendukwa vɨtei ete vo akoi poyandepo mboyape mboya'o-ya'o agwer rese cinco mil kuimba'e upe amondo va'e rese, iyavei mbovɨ ɨruova vo pemboapɨpo sumbɨrer pemonu'ä pare?

¹⁰¿Ndapeyemoma'endu'a vɨtei avei vo amboya'o va'e ñuvɨrïo ova mboyape ava cuatro mil va'e upe, iyavei mbovɨ ɨruova pemboapɨpo sumbɨrer pemonu'ä pare?

¹¹¿Marä peye rutei pe aipo sendukwa e'ɨ̇ nda'eimo mboyape rese ite añe'ë? Peikwa katu fariseo iyavei saduceo mboyape mboapeposa sui.

¹²A'ese ramo oikwa yuvɨreko, Jesús noñe'ëi mboyape mboapeposa rese, a'e rumo oñe'ë fariseo iyavei saduceo eta porombo'esa rese tëi.

¹³Jesús oyepotase oso tekwa Cesarea Filipo ɨvɨ rese, a'eve oporandu gwemimbo'e eta upe: — ¿Marä e'i vo ava oñe'ë yuvɨreko che rese, ava ɨvate katu va'e Ra'ɨrɨ che rekose?

¹⁴A'e omboyevɨ yuvɨreko chupe: — Oime aipo e'i Juan Oporoapirämo va'e; ambuae eta aipo e'i Elías, ipare ambuae eta aipo e'i Jeremías anise ambuae ava Tüpä ñe'ë mombe'usar e'i yuvɨreko ndeu.

¹⁵— Pe aveino, ¿ava ko sekoi peye ru cheu? — e'i oporandu gwemimbo'e upe.

¹⁶Simón Pedro omboyevɨ chupe: — Nde ereiko Poropɨsɨrösar, Tüpä Ra'ɨrɨ oikove va'e ite.

¹⁷Evokoiyase Jesús aipo e'i chupe: — Nde sovasaprɨ ereiko, Simón, Jonás ra'ɨrɨ, esepia nda'ei ava tëi omboyekwa ko mba'e ndeu, che Ru ɨva pendar teiete omboyekwa ndeu.

¹⁸Iyavei che aipo a'e nde ereiko Pedro, ipare ko ita arɨve amopü'ara che tüpärogwä; iyavei ñepëi yepe manosa ndosekoreroyɨi chietera opirätäsa pɨpe.

¹⁹Che amondora Tüpä mborerekwasa ɨva pendar mboisa ndeu; akoi nde ereñapɨ̇chi va'e ko ɨvɨ pɨpe, egwë e'i aveira ñapɨ̇chisara opɨta ɨvave, iyavei akoi nde ereyora va'e ko ɨvɨ pɨpe, egwë e'i aveira oyerara opɨta ɨvave.

²⁰Ipare Jesús oyokwai gwemimbo'e eta imombe'u e'ɨ̇ agwä Poropɨsɨrösar sekosa rese ambuae ava upe yuvɨreko.

²¹Evokoiyase ichuive tuprɨ Jesús omboɨpɨ imombe'u gwemimbo'e eta upe, a'e oso va'erä tekwa Jerusalén ve, a'e judío rerekwar, pa'i eta rerekwar ɨvate katu va'e iyavei Moisés porokwaita rese oporombo'e va'e, a'e che mombaraɨsu ukara. Iyavei aipo e'i che yukara yuvɨreko no, ipare imombosapɨsa arɨ pɨpe rumo akwerayevɨra.

²²Evokoiyase Pedro vɨraso kokotɨ omboɨpɨ oñe'ëgäta agwä chupe, aipo e'i: — ¡Tüpä ndoipotai ete evokoi nungar nde reko agwä, che Yar! ¡Ko nungar ndipoi chietera mba'e ndeu!

²³Jesús oyemboyere sese aipo e'i Pedro upe: — ¡Esɨrɨ che sui, Karugwar, nde che reitɨ pota eve mba'e tëi pɨpe! Nderesepiai mba'e avɨye va'e inungar Tüpä osepia va'e, ava osepia va'e nungar tëi nde eresepia.

²⁴Ipare Jesús aipo e'i gwemimbo'e eta upe: — Akoi ogwata pota va'e che rupi, tasesarai mba'e gwemimbotar aposa sui, tovosɨi rane okurusu rese ipare togwata che rupi.

²⁵Esepia akoi ava oipɨsɨrö pota va'e gwekokwer, a'e omokañɨ tëira; akoi omokañɨ va'e gwekokwer che sui tëi, a'e oñepɨsɨrö itera.

²⁶¿Ma'erä anga'u vo ava upe avɨyeai oipɨsɨ va'erä opakatu mba'e ko ɨvɨ pɨpendar, a'e rumo omokañɨ tëira gwekokwer yuvɨreko? ¿Mbovɨ pi'ä omondora ava gwekokwer repɨrä?

²⁷Esepia che ava ɨvate katu va'e Ra'ɨrɨ ayura che Ru pirätäsa porañetesa pɨpe iyavei sembigwai ɨva pendar reseve kuri, evokoiyase aikwara ñepëi-pëi ava upe sembiapokwer rupi chupe.

²⁸Supiete yuvɨrekove va'e nomano vɨtei chietera, a'e che repia rane itera, ayevɨse che mborerekwasa pɨpe yuvɨreko kuri.