Read Guarayu MATEO 17 Bible Online

MATEO 17 - Guarayu bible

MATEO 17

¹Ñepëi ova arɨ pare, Jesús vɨraso Pedro, Santiago, iyavei tɨvrɨ Juan reseve, yuvɨraso kokotɨ ɨvɨtrɨ ɨvate katu va'e rese.

²A'eve, avɨyeteramo tëi oñekuñarö Jesús repiaka gwemimbo'e rovai. Sova sendɨyai inungar arɨ, iyavei iturukwar oyekwa morochi iteanga, inungar tataendɨ.

³Avɨyeteramo tëi osepia yuvɨreko oyemboyekwase Moisés iyavei Elías, a'eve oñemoñeta Jesús rese yuvɨno'ä.

⁴Pedro aipo e'i Jesús upe: — Che Yar, ¡avɨyeai ete ko'ave yaiko! Ereipotase, ayapora mbosapɨ teyupami: ñepëi ndeu narä, ambuae Moisés upe, iyavei ambuae Elías upe narä.

⁵Pedro ñe'ë vɨte seve, ñepëi mba'e pɨ̇tü ou osesape iteanga opɨta i'arɨve tuprɨ yuvɨreko, ipare mba'e pɨ̇tü sui oyeendu ñe'ësa aipo e'i: “Ko che Ra'ɨrɨ che rembiaɨsu, che rembiporavo: peyapɨsaka katu iñe'ë rese.”

⁶Aipo rendu ramoseve, semimbo'e eta opa omboya vova ɨvɨ rese, osɨkɨyepave yuvɨreko ichui.

⁷A'ese Jesús oyemboya oso gwemimbo'e rese, opoko sese aipo e'i chupe: — Pepü'apa; pesɨkɨyei rene.

⁸Ipare oma'ese, ndosepia iri ete ambuae imo'ä yuvɨreko, a'ese Jesús gweraño i'äi.

⁹Ogweyɨse ɨvɨtrɨ sui yuvɨreko, a'ese Jesús aipo e'i mbosapɨ gwemimbo'e upe: — Ndapemombe'ui chietera ñepëi ava upe ko mba'e pesepia va'e, akoi ava ɨvate katu va'e Ra'ɨrɨ okwerayevɨse voi ete kuri.

¹⁰Evokoiyase semimbo'e eta oporandu Jesús upe aipo e'i yuvɨreko: — ¿Ma'erä ru aipo e'i Moisés porokwaita rese oporombo'e va'e Elías rane ite ni'ä oura yɨpɨndar kuri?

¹¹Ipare Jesús omboyevɨ chupe: — Supiete Elías rane yɨpɨndar oura, a'e rane ite opakatu mba'e omoigätura kuri.

¹²Che aipo a'e peü Elías ou ite ko'ave, a'e rumo ndoikwai ete, oyapo mba'e gwemimbotar tëi yuvɨreko sese. Egwë a'e aveira ni'ä, che ava ɨvate katu Ra'ɨrɨ che paraɨsura a'e ava povrɨve vichiko.

¹³Evokoiyase semimbo'e eta osendukwa ramo Jesús ñe'ë Juan Oporoapirämo va'e resendar yuvɨreko.

¹⁴Oyepotase ava re'ɨisave yuvɨraso, a'eve oyemboya ñepëi ava Jesús rese, oñenopɨ'ä sovai aipo e'i chupe:

¹⁵— Che Yar, ereiparaɨsuerekomi tëira che ra'ɨrɨ cheu viña, esepia a'e ipɨ'a mba'easɨ va'e, iyavei iparaɨsu iteanga, seta yupagwer ovɨapi tatave, ɨpɨve avei.

¹⁶Ko'ave aru tëi nde remimbo'e eta upe, a'e rumo nombogwera katui ete yuvɨreko.

¹⁷Jesús omboyevɨ chupe: — ¡Too, ndapeyeroya tuprɨ vɨtei ete vo Tüpä rese! ¿Mbovɨ rupi rutei vo aiko vɨtera pe pa'üve? ¿Mbovɨ yupagwer rupi vo amombe'u irira mba'e vichiko peü? Peru evokoi chi'ïvä'e cheu.

¹⁸Evokoiyase Jesús oñe'ëgäta karugwar upe ipare omose chi'ïvä'e sui, a'e ramoseve voi ete okwera tuprɨ.

¹⁹Ipare semimbo'e eta oporandu kokotɨmi Jesús upe yuvɨreko: — ¿Ma'erä pi'ä ore ndoroikatui karugwar renose ichui?

²⁰Jesús aipo e'i gwemimbo'e eta upe: — Esepia ndapeyeroya tuprɨi vɨtei ete Tüpä rese. Supiete perekose peporeroyasa chi'ïmi viña, inungar-ra ndoyavɨi chira mostaza rä'ɨi ta'ɨmi va'e, aipo peyera ko ɨvɨtrɨ uve: ‘Esɨrɨ ko'ave sui eso kokotɨ rupi ëi’, a'ese ɨvɨtrɨ osɨrɨño itera oso. Ichui ndipoi chietera mba'e yavai va'e peü.

²¹(Evokoi nungar karugwar imosësa yeruresa yekwakusa pɨpe yepi.)

²²Oyoya ogwata vɨteseve Galilea ɨvɨ rupi yuvɨreko, a'ese Jesús aipo e'i gwemimbo'e eta upe: — Che, ava ɨvate katu va'e Ra'ɨrɨ, imondoprɨra aiko ava povrɨve,

²³iyavei che yukara yuvɨreko; mbosapɨ arɨ pare rumo akwerayevɨra. Osenduse aipo i'ese ndovɨ'ai tëi yuvɨreko.

²⁴Oyepotase Jesús gwemimbo'e eta rese yuvɨraso tekwa Cafarnaúm ve, a'eve gwarepochi rerokwasar tüpäro upe narä yuvɨraso Pedro upe, ipare oporandu yuvɨreko chupe: — ¿Nde rerekwar nomondoi ete gwarepochi tüpäro upe narä?

²⁵— Omboepɨ ni'ä — e'i Pedro imboyevɨ chupe. Koiye oikese Pedro oɨ pɨpe oso, Jesús rane yɨpɨndar oñe'ë aipo e'i chupe: — ¿Marä e'i vo nde pɨ'a ñemoñeta, Simón? ¿Ava sui vo vɨrokwa gwarepochi mborerekwar ɨvate katu va'e ko ɨvɨ pɨpe yuvɨreko: omu sui pi'ä, anise ambuae ava yuvɨrekoi va'e sui tëi tie?

²⁶Pedro rumo omboyevɨ chupe: — Ambuae ava yuvɨrekoi va'e sui tëi. Jesús aipo e'i iri: — Egwë e'i etera, evokoiyase mborerekwar povrɨ pendar nomboepɨi chietera yuvɨreko.

²⁷Evokoiyase gwarepochi rerokwasar moñemoɨrö e'ɨ̇ agwä rumo, eresora ɨpa pɨpe, erepirapoira yɨpɨndar pira erenose va'e. A'e iyuru pɨpe ereyosɨra ñepëi gwarepochi, a'e ipɨpe osupitɨra imboepɨpa agwä cheu iyavei ndeu; eraso chupe emboepɨpa.