Read Guarayu MATEO 18 Bible Online

MATEO 18 - Guarayu bible

MATEO 18

¹A'e arɨ pɨpeve semimbo'e eta oyemboya yuvɨraso Jesús rese oporandu yuvɨreko chupe: — ¿Uma pi'ä seko ɨvate katu va'e Tüpä mborerekwasave?

²Evokoiyase Jesús oñe'ë ñepëi chi'ïvä'emi upe, a'ese omondo mbɨterve ipa'üve imo'ä,

³ipare aipo e'i chupe: — Supiete, akoi ndapeñekuñaröise iyavei ndapeikoise chi'ïvä'emi nungar, a'ese ndapeikei chira Tüpä mborerekwasa pɨpe.

⁴Seko ɨvate katu va'e Tüpä mborerekwasave a'e oñemominimi va'e oyevɨra inungar ko chi'ïvä'emi sekoi.

⁵Iyavei oipɨsɨ va'e ñepëi chi'ïvä'emi che rer pɨpe yuvɨreko, a'e che pɨsɨ ite.

⁶“Akoi omboangaipa uka va'e ko chi'ïvä'emi che reroyasar, iyakatu ite imombosara paragwasu pɨpe ñapɨ̇chisara ita gwasu mba'e mboku'isa iyesɨ'o rese.

⁷¡Iparaɨsu ko ɨvɨ pɨpendar che reroyasar omboangaipa uka va'e yuvɨreko! Oime rane itera, ¡paraɨsusa ava moangaipa uka tëisar upe kuri!

⁸Egwë e'ise, ndepo, anise ndepɨ avei nde mboangaipa ukase, eyasɨapa, emombo amombrɨ ndeyesui; avɨye katu ereikera tekove apɨre'ɨ̇save ñepëi ndepo, anise ñepëi ndepɨ rese, iyavei anichira ñuvɨrïo ndepo ñuvɨrïo ndepɨ rese, esepia ereikera tata gwasu apɨre'ɨ̇save.

⁹Iyavei nde resa nde mboangaipa ukase, enose emombo amombrɨ ndeyesui; avɨye katu ereikera ñepëi nde resa rese tekove apɨre'ɨ̇save, iyavei anichira ñuvɨrïo nde resa rese imomboprɨ tëi ereikora tata gwasu apɨre'ɨ̇save.”

¹⁰“Peroɨröi rene katu ñepëi chi'ïvä'emi. Supiete aipo a'e ɨvave mbigwai ɨva pendar osepiaño ite che Ru pirätäsa yuvɨreko yepi.

¹¹Che ni'ä, ava ɨvate katu va'e Ra'ɨrɨ, ayu ava okañɨ tëi va'e pɨsɨrö agwä.

¹²¿Marä e'i pe pɨ'ave? Vɨreko va'e ñepëi mbɨa cien tuprɨ ovesa, ipare rumo okañɨse ñepëi ichui, ¿ndoseyai chira pi'ä ambuae noventa y nueve ka'a pɨpe, oso iri va'erä ovesa okañɨ va'e reka?

¹³Ipare oyosɨse rumo, supiete ovɨ'arete katu itera evokoi ovesa rese ambuae noventa y nueve nokañɨi va'e sui.

¹⁴Egwë e'i aveira, pe Ru ɨvave sekoi va'e ndoipotai ete pe kañɨ tëi agwä inungar ko chi'ïvä'emi.”

¹⁵“Akoi nde rɨvrɨ oyapose mba'e tëi ndeu, eñe'ë sese nde ae ipare eikwa uka mba'e sembiapokwer chupe. Vɨroyase a'e nde ñe'ë, a'ese nde ereyapo ite mba'e avɨye va'e nde rɨvrɨ upe.

¹⁶Akoi ndoyapoise nderemimbotar ndeu, eñe'ë ñepëi upe anise ambuae ñuvɨrïo ava upe avei, opakatu mba'e tëi sembiapo tosendu ñuvɨrïo anise mbosapɨ ipɨtɨ̇vɨïsar yuvɨreko.

¹⁷Akoi ndovɨroyaise ite rumo ambuae iñe'ë, emombe'u opakatu tekwa pendar upe; iyavei ndovɨroyaise ite a'e tekwa pendar, evokoiyase pepoiño itera ichui esepia ndiporeroyai va'e nungar ite sekoi inungar ava gwarepochi rerokwasar Roma pendar upe narä.”

¹⁸“Supiete akoi nde ereñapɨ̇chi va'e ko ɨvɨ pɨpe, egwë e'i aveira ñapɨ̇chisara opɨta ɨvave, iyavei akoi nde ereyora va'e ko ɨvɨ pɨpe, egwë e'i aveira oyerara opɨta ɨvave.

¹⁹Ko amombe'u pota peü: Ñuvɨrïo pe pa'ü pendar oyoya tuprɨse ipɨ'a ñemoñetasa ko ɨvɨ pɨpe oporandu agwä mba'e rese yeruresa pɨpe, che Ru ɨva pendar evokoiyase omondora peü.

²⁰Esepia oimese ñuvɨrïo, anise mbosapɨ oñemonu'äse che rer pɨpe yuvɨreko, a'eve che aiko ipa'üve.”

²¹Evokoiyase Pedro oso oporandu Jesús upe: — Che Yar, ¿mbovɨ yupagwer rupi vo che ñeröira che rɨvrɨ upe, oyapose mba'e naporäi va'e cheu? ¿Ñuvɨrïo ova rupivera pi'ä?

²²Jesús omboyevɨ chupe: — Ani nda'ei ñuvɨrïo ova yupagwer, setenta yupagwer rupi ñuvɨrïo ova.

²³“Evokoiyase, egwë e'i avei Tüpä mborerekwasa rese inungar mborerekwar ɨvate katu va'e omoigätu pota va'e gwembigwai poravɨkɨ agwer.

²⁴Evokoiyase omboɨpɨ imoigätu agwä, a'ese tuprɨ ipɨtɨ̇vɨïsar gweru gwarepochi vɨnose katu va'e yuvɨreko chupe.

²⁵A'e ipɨtɨ̇vɨïsar rumo ndovɨrekoi ete imboepɨ agwä, a'ese mborerekwar ɨvate katu va'e aipo e'i pemondo evokoi inungar mbigwai tëi, oyoya tuprɨ sembireko rese, ta'ɨreta avei opakatu mba'e vɨreko va'e reseve, a'ese sepɨpara gwarepochi vɨnose va'e.

²⁶A'ese ipɨtɨ̇vɨïsar oñenopɨ'ä mborerekwar ɨvate katu va'e rovai, aipo e'i chupe: ‘Che rerekwar eñemosañomi tëi katu cheu opara ni'ä amboepɨ ndeu.’

²⁷Ipare mborerekwar ɨvate katu va'e oiparaɨsuereko; egwë e'i iñeröi chupe iyavei omondo mba'e tuprɨ pɨpe.”

²⁸“Osëse oso ichui, a'ese ipɨtɨ̇vɨïsar osepia ñepëi omboetasagwer vɨnose va'e gwarepochi movɨrö tëi va'e gwerekwar sui. A'e oipɨsɨ iyesɨ'o rese ipare seni oyuka, aipo e'i chupe: ‘¡Emboepɨpa gwarepochi erenose va'ekwer che sui!’

²⁹A'e imboetasagwer, oñenopɨ'ä sovai oso, aipo tëi chupe: ‘Eñemosañomi tëi cheu opara ni'ä opakatu amboepɨ ndeu.’

³⁰Ambuae rumo ndoipotai, evokoiyase omoinge ukaño poroekendasave opa rane itera omboepɨ gwarepochi vɨnose va'e ichui.

³¹Ko tasɨ iteanga ambuae ipɨtɨ̇vɨïsar pɨ'a pɨpe, a'ese yuvɨraso imombe'u mborerekwar ɨvate katu va'e upe opakatu mba'e sembiapokwer yuvɨreko.

³²Evokoiyase mborerekwar ɨvate katu va'e omondo oñe'ë seka, aipo e'i chupe: ‘¡Mba'e tëiete nde rembiapo! Che ñeröi opakatu mba'e rese ndeu esepia ereyemombaraɨsu katumi ereporandu cheu.

³³Egwë ere aveira nde viña ereiparaɨsuerekora nde mboetasagwer, inungar che oroparaɨsuereko nde rereko.’

³⁴Ichui mborerekwar ɨvate katu va'e oñemoɨrö iteanga, ipɨpe sui oyokwai imombaraɨsu uka agwä a'eve opa rane itera omboepɨ opakatu gwarepochi vɨnose va'e.”

³⁵Jesús aipo e'i iri: — Egwë e'i aveira che Ru ɨva pendar peü, ndapeñeröise ñepëi-pëi pe pɨ'a pɨpe pe rɨvrɨ upe.