Read Guarayu MATEO 2 Bible Online

MATEO 2 - Guarayu bible

MATEO 2

¹Jesús o'a Belén ve, tekwa Judea ɨvɨ rupi, a'ese Herodes mborerekwar ɨvate katu va'e sekoi. Koiye oyepota yugweru Jerusalén ve arɨ Sësa kotɨ sui ava oyembo'e va'e yasɨtata rese,

²ipare oporandu yuvɨreko: — ¿Kevo aipo o'a judío rerekwar ɨvate katu va'e? Esepia ni'ä orosepia yasɨtata osëse ou sese oroyu imboetei agwä.

³Aipo i'ese mborerekwar Herodes oyembosɨkɨye tëi, ava Jerusalén pendar avei egwë e'i päve yuvɨreko.

⁴Evokoiyase mborerekwar ɨvate katu va'e opa omonu'ä uka pa'i eta rerekwar Moisés porokwaita rese oporombo'e va'e avei, ipare oporandu chupe kevo aipo o'ara Poropɨsɨrösar.

⁵A'e aipo e'i yuvɨreko chupe: — Belén ve ɨvɨ Judea rupi; esepia Tüpä ñe'ë mombe'usar aipo e'i ete ikwachia:

⁶‘Nde tekwami, Belén, ɨvɨ Judá suindar, nda'ei ete ereiko ta'ɨmi va'e opakatu ambuae tekwa sui; esepia ndesui ete osëra mborerekwar che rekwa ɨgwar Israel yokwai agwä.’

⁷Evokoiyase Herodes opa oñe'ë ava imba'ekwa va'e upe, oporandu va'erä yasɨtata yekwa agwer rese chupe yuvɨreko.

⁸Ichui opa omondo Belén ve aipo e'i: — Peso a'eve, peikwa tuprɨ opakatu mba'e pitani rekokwer resendar; akoi peyosɨse, pe mombe'ura cheu, evokoiyase che avei asora imboetei agwä.

⁹Ko mborerekwar omombe'u pare, ava imba'ekwa va'e opa yuvɨraso Belén ve. Iyavei akoi yasɨtata osepia va'ekwer yuvɨreko a'e senonde ñoite sekoi, ipare avɨyeteramo tëi opɨta yasɨtata a'eve pitani tui.

¹⁰Osepiase rumo ava imba'ekwa va'e yasɨtata, ovɨ'arete iteanga yuvɨreko.

¹¹Ipare yuvɨroike oɨ pɨpe osepia pitani, María ichɨ reseve; ichui oñenopɨ'ä sovai imboeteisave. Ipare omboi omba'e rɨru yuvɨreko oikwave'ë va'erä porerekosa oro, itaɨsɨ iyavei mirra.

¹²Ipare Tüpä omombe'u ikerve ava imba'ekwa va'e upe iyevɨ iri e'ɨ̇ agwä Herodes rekosa rupi, evokoiyase oyevɨ yuvɨraso gwekwave ambuae perɨ rupi tëi.

¹³Aipo ava imba'ekwa va'e yepepɨ pare, José upe oyemboyekwa ñepëi yande Yar rembigwai ɨva pendar ikerve, aipo e'i chupe: “Eñarapü'a, eraso pitani ichɨ reseve, eroñemi Egipto ve. Epɨtaño a'e peve che voi ete amombe'ura nde yevɨ agwä, esepia ni'ä mborerekwar Herodes osekara pitani yuka agwä.”

¹⁴José oñarapü'a, a'e pɨ̇tü pɨpeve voi vɨraso pitani ichɨ reseve Egipto ve,

¹⁵a'eve yuvɨrekoi mborerekwar Herodes mano rärö. Ko rupi imboavɨyesa yande Yar ñe'ëngagwer oñe'ë mombe'usar rupi: “Egipto sui anose che Ra'ɨrɨ e'i va'e.”

¹⁶Mborerekwar Herodes rumo oñemoɨrö iteanga ava imba'ekwa va'e ombopa tëisa rese, ipɨpe sui omondo sundao tekwa Belén ve chi'ïvä'e kuimba'emi opakatu ñuvɨrïo aravɨter vɨreko va'e chi'ïvä'emi katu va'e avei tekwa ɨvɨrindar pɨpe avei yuka uka agwä, esepia omoñetase ava imba'ekwa va'e oikwa uka osepia va'e yuvɨreko chupe.

¹⁷Egwë e'i yavɨye Tüpä ñe'ë mombe'usar Jeremías rembikwachiagwer pɨpe:

¹⁸“Oyeendu ñepëi ñe'ësa Ramá ve, yase'osa iyavei vɨ'are'ɨ̇sa gwasu tuvicha va'e. Raquel aipo, oyase'o tëiete omembɨreta rese iyavei ndoipotai ete oyeupe ñe'ësa vɨ'asa resendar esepia ni'ä opakatu omano yuvɨreko.”

¹⁹Mborerekwar Herodes manore, ñepëi yande Yar rembigwai ɨva pendar oyemboyekwa ikerve José upe Egipto ve aipo e'i chupe:

²⁰“Eñarapü'a, eroyevɨ pitani ichɨ reseve, peyevɨ Israel ve, esepia omano pitani yuka potasar.”

²¹Evokoiyase José oñarapü'a ichui vɨraso pitani ichɨ reseve Israel ve.

²²Oyanduse rumo aipo Arquelao chinise mborerekwar Judea ve oyesupa Herodes rendagwerve, osɨkɨye tëi oso va'erä a'eve; omombe'u pare Tüpä ikerve mba'e chupe, ichui yuvɨraso ɨvɨ Galilea ve.

²³Oyepotase yuvɨraso a'eve, oyemboerekwa va'erä tekwa Nazaret ve. Ko yavɨye ite Tüpä ñe'ëngagwer mombe'usar rupi: Jesús serer-ra Nazaret ɨgwar e'i va'e.