Read Guarayu MATEO 20 Bible Online

MATEO 20 - Guarayu bible

MATEO 20

¹“Tüpä mborerekwasa ɨva pendar inungar akoi ava ɨvɨ yar osë añi'ïvëive oseka va'erä oporavɨkɨ va'e oyeupe uvatɨve narä.

²A'ese omoigätupa oporavɨkɨ va'e upe omboepɨ agwä ñepëi arɨ rupindar mboravɨkɨ reprɨ, ipare opa omondo uvatɨ̇save imboporavɨkɨ.

³Ipare osë oso arɨvate katumise, a'eve osepia okarusu pɨpe ambuae ava oporavɨkɨsa ndovɨrekoi va'e.

⁴Aipo e'i chupe: ‘Peso, pe avei tapeporavɨkɨ che uvatɨve, amboepɨ tuprɨra ni'ä peü’ Ichui opa yuvɨraso.

⁵A'ese osë iri oso mbɨter arɨ rupi, ipare egwë e'i tuprɨ avei ka'arukatumise, a'e tuprɨ avei oyapo.

⁶Ka'arumi katuse osë iri oso okarusuve, ipare osepia ambuae ava ndovɨrekoi va'e oporavɨkɨsa. Oporandu chupe: ‘¿Ma'erä vo peyembo'ɨ tëi arɨ momba ko'ave pe'ä?’

⁷A'e omboyevɨ yuvɨreko chupe: ‘Esepia ndipoi ete tapeporavɨkɨ e'i va'e oreu.’ Evokoiyase aipo e'i chupe: ‘Peso, pe avei tapeporavɨkɨ che uvatɨve.’ ”

⁸“Oyepotase rumo pɨ̇tü, mba'e yar aipo e'i oporavɨkɨ va'e yangarekwar upe: ‘Eñe'ëpa ava oporavɨkɨ va'e upe, emboepɨpa ipa yugweru va'e upe rane iporavɨkɨ yuvɨreko chupe ipare tenonendar yugweru va'e upe avei.’

⁹Akoi yuvɨroike va'e ka'arumi katuse oporavɨkɨ va'e yuvɨreko chupe, ipare a'e oyakatu ñepëi-pëi arɨ rupindar oipɨsɨ gwarepochi yuvɨreko.

¹⁰Ipare tenonde katu yuvɨroike va'e oporavɨkɨ, a'e ipɨ'a ñemoñeta yaipɨsɨ katura revo gwarepochi e'i oyeupe yuvɨreko viña; a'e evokoiyase oipɨsɨ tuprɨño avei yuvɨreko ñepëi arɨ rupindar.

¹¹Gwarepochi pɨsɨre rumo, oñemoɨrö tëi mba'e yar upe yuvɨreko,

¹²aipo e'i: ‘Ko, oyepota ipa tëi va'e yugweru, a'e oporavɨkɨ raimi tëi yuvɨreko, nde rumo evokoiyase eremboepɨ oyoya tuprɨ ite inungar oreu, oroñemosaño tëi oroporavɨkɨ arɨ momba sakukwer upe oroiko.’

¹³Mba'e yar rumo omboyevɨ ñepëi ipa'ü pendar upe: ‘Che mborɨpar, nda'ei mba'e tëi ayapo ndeu. ¿Ndayayapoi vo akoi cherese mboravɨkɨ reprɨ ñepëi arɨ rupindar amboepɨ va'erä ndeu?

¹⁴Evokoiyase ko eipɨsɨ nde poravɨkɨ reprɨ eso. Che rumo amondo pota ko ipa tëi oike va'e upe oporavɨkɨ inungar tuprɨ ndeu amboepɨ,

¹⁵esepia iyakatu ite mba'e ayapo va'erä che remimbotar che gwarepochi rese. ¿Nderekate'ɨ̇ tie ambuae ava mba'e rese che ayapose mba'e avɨye va'e chupe?’ ”

¹⁶“Egwë e'i aveira ava yuvɨrekoi va'e kurïtëi ipa tëi, a'e yuvɨrekoira tenonde; iyavei yuvɨrekoi va'e kurïtëi tenonde, a'e yuvɨrekoira ipa tëi.”

¹⁷Jesús, ogwata oso tekwa Jerusalén piar rupi, a'ese oñe'ë kokotɨ gwemimbo'e opayandepo yovaive ñuvɨrïo yuvɨrekoi va'e upe aipo e'i:

¹⁸— Peyapɨsaka tuprɨ che ñe'ë rese, yasora tekwa Jerusalén ve, a'eve che ava ɨvate katu va'e Ra'ɨrɨ imondosara pa'i eta rerekwar upe iyavei Moisés porokwaita rese oporombo'e va'e, omondora tekoasɨsave yuka uka agwä yuvɨreko

¹⁹ipare omondora ambuae ava tekwa pendar tëi upe yuvɨreko, mborerekwa eta Roma pendar upe a'e vɨroɨröra, yuvɨrokwa-rokwara sese ipare oyatɨkara kurusu rese yuvɨreko; imombosapɨsa arɨ pɨpe rumo okwerayevɨra.

²⁰Ipare Zebedeo rembireko ñuvɨrïo omembrɨ reseve, oyemboya Jesús rese yuvɨreko ichui oñenopɨ'ä sovai oporandu agwä mba'e rese.

²¹Jesús oporandu chupe: — ¿Mba'e vo ereipota? A'e kuña evokoiyase aipo e'i chupe: — Emondo che membrɨ ndeyepɨri ogwapɨ va'erä ñepëi nde mba'e rese pokosa kotɨ, ambuae nde mba'e rese pokoe'ɨ̇sa kotɨ nde mborerekwasave.

²²Jesús rumo omboyevɨ chupe: — Pe ndapeikwai mba'e rese peporandu. ¿Peikatura pi'ä peɨ'u mba'e ɨgwa iroiteanga va'e inungar che aɨ'u va'erä viña? A'e aipo e'i yuvɨreko chupe: — Oroikatuño itera.

²³Jesús rumo omboyevɨ chupe: — Supiete pe peɨ'ura ko ɨgwa iroiteanga va'e, che pɨri opombogwapɨ agwä che mba'e rese pokosa kotɨ, ambuae che mba'e rese pokoe'ɨ̇sa kotɨ avei a'e ndiyai imondo agwä cheu, a'e imondosara Che Ru omoigätu va'e gwembiporavo upe narä ogwapɨ va'erä che ɨpɨve.

²⁴Aipo ñe'ësa renduse ambuae opayandepo yovaive semimbo'e, oñemoɨrö tëi ñuvɨrïo va'e upe.

²⁵Evokoiyase Jesús oñe'ë, aipo e'i chupe: — Peikwa ni'ä ava ndiporeroyai va'e, mborerekwar gwasu oporokwai mba'e-mba'e tëi pɨpe vɨreko ava opovrɨve, ava ɨvate katu va'e omboyekwa ite omborerekwasa ava rese.

²⁶Pe rumo egwë ndapeyei chira peiko. Iyakatu rumo, akoi ava oipota va'e ɨvate katu gweko agwä pe pa'üve, i'añeko rane itera opakatu ambuae ava rese;

²⁷iyavei akoi pe pa'ü pendar oipota va'e tenonde katu gweko agwä, i'añeko tuprɨ ranera opakatu pe pa'ü pendar rese.

²⁸Esepia ava ɨvate katu va'e Ra'ɨrɨ, ndoui ava i'añeko va'erä yuvɨreko sese, a'e rumo ou ava rese oañeko agwä iyavei omondo va'erä gwekokwer ava re'ɨi repɨrä.

²⁹Opase ava yuvɨnosë tekwa Jericó sui, a'ese Jesús rakɨkwei ava re'ɨi yuvɨraso.

³⁰Ñuvɨrïo ava ndasesapɨsoi va'e ogwapɨ perɨ popɨve yuvɨnoi, osenduse Jesús okwase supi, säse pirätä yuvɨreko chupe aipo e'i: — ¡Ore Yar, mborerekwar gwasu David Ra'ɨrɨ, ore paraɨsuerekomi tëi eve!

³¹A'e ava oñe'ëgätaño imbokiriri agwä, a'e rumo säse pirätä-rätäño ite yuvɨreko chupe: — ¡Ore Yar, mborerekwar gwasu David suindar, ore paraɨsuerekomi tëi eve!

³²Evokoiyase Jesús opɨta osenduse, oñe'ë ndasesapɨsoi va'e upe ipare rumo oporandu chupe: — ¿Mba'e vo peipota ayapo va'erä peü?

³³A'e omboyevɨ yuvɨreko chupe: — Ore Yar, ore mbosarekomi tëi eve.

³⁴Jesús oiparaɨsuerekosave, opoko sesa rese. A'e ramoseve ndasesapɨsoi va'e osareko tuprɨai ete yuvɨreko, ipare yuvɨraso Jesús rupi.