Read Guarayu MATEO 21 Bible Online

MATEO 21 - Guarayu bible

MATEO 21

¹Akoi vɨrovɨse tekwa Jerusalén yuvɨraso iyavei oyepota tekwami Betfagé ve, ɨvɨtrɨ Olivos save, a'eve Jesús omondo ñuvɨrïo gwemimbo'e,

²aipo e'i chupe: — Peso ko tekwami yande rovaindarve. A'eve pesepiara gwariku, imembrɨ reseve ñapɨ̇chimbrɨ imo'ä. A'e peyorañora seru cheu.

³Iyavei ava oporanduse yuvɨreko peü sese, aipo peyera Yar oiporu pota ipare ni'ä omboyevɨ voiñora.

⁴Ko egwë e'i yavɨye rane itera Tüpä ñe'ë mombe'usar, a'e ikwachiaprɨ araka'endar:

⁵“Pemombe'u tekwa Sión pendar upe aipo peyera: ‘Pesepia, nde Rerekwar ɨvate katu va'e ou oiko ndeu narä, gweko mbegwesa pɨpe gwariku arɨve, ñepëi gwarikumi, imembrɨ ñepëi mba'e mɨmba ovosɨi va'e.’ ”

⁶Semimbo'e yuvɨraso oyapo ite Jesús remimbotar yuvɨreko.

⁷Vɨraso gwariku imembrɨ reseve chupe, omondo oturukwar ikupeao agwä yuvɨreko, ipare Jesús oyeupi i'arɨve.

⁸Oime ava re'ɨi. Oipɨpira oturukwar perɨ rupi, ambuae oyasɨa pindo omondo perɨ rupi saperä yuvɨreko.

⁹Seta iteanga ava yuvɨraso senonde, sakɨkwerindar avei, a'e säse yuvɨreko: — ¡Imboeteiprɨ tasekoi mborerekwar David Ra'ɨrɨ! ¡Sovasaprɨ sekoira ou va'e yande Yar rer pɨpe! ¡Imboeteiprɨ avei tasekoi ɨva pendar!

¹⁰Oikese Jesús Jerusalén pɨpe oso, opakatu tekwa pɨpendar oyepɨ'amondɨi, iyavei seta oporandu-randu tëi aipo e'i yuvɨreko: — ¿Ava pi'ä ko mbɨa?

¹¹Ava yugweru va'e Jesús rupi omboyevɨ yuvɨreko chupe: — Tüpä ñe'ë mombe'usar Jesús, Nazaret pendar ɨvɨ Galilea rupindar.

¹²Jesús oike tüpäro pɨpe ipare omboɨpɨ imosëpa ichui ava mba'e mondosar iyavei mba'e rerokwasar. Opa ombovapɨ mba'e renda imondo ava gwarepochi rekuñarösar sui, apɨkasu mondosar renda avei ombovɨapi imondo;

¹³ipare aipo e'i chupe: — Ikwachiaprɨ araka'endar pɨpe aipo e'i: ‘Ko che rëtä yeruresa rëtära opakatu ava ɨvɨ pɨpendar uve narä’, pe rumo imondarai va'e rëtä nungar tëi pereko.

¹⁴A'eve oyemboya Jesús rese yugweru ava ndasesapɨsoi va'e, ipäri-päri va'e avei, a'e opa ombogwera.

¹⁵Evokoiyase pa'i rerekwareta iyavei Moisés porokwaita rese oporombo'e va'e yuvɨreko osepiase poromondɨisa oyapose, iyavei tüpäro pɨpe osenduse chi'ïvä'e sapukaisa: “¡Imboeteiprɨ mborerekwar David Ra'ɨrɨ tasekoi!”, a'ese oñemoɨrö

¹⁶aipo e'i Jesús upe yuvɨreko: — ¿Eresendu vo chi'ïvä'emi ñe'ë aipo e'ise yuvɨreko? Jesús rumo omboyevɨ chupe: — Asendu ite. ¿Pe ndapeyerokɨi vo araka'endar Ikwachiaprɨ ñe'ësa resendar pɨpe? Aipo e'i va'e: ‘Chi'ïvä'emi sapukaisa rese, iyavei pitanimi okambu vɨte va'e, a'e osapukai nde mboeteisa pɨpe yuvɨreko.’

¹⁷Evokoiyase opaño oseya ava, oso tekwa Betania ve, a'eve ñepëi pɨ̇tü oke.

¹⁸A'ere ayi'ive añi'ïvëive, oyevɨse tekwave, Jesús ndasɨepoi ete oiko.

¹⁹A'eve perɨ popɨve osepia ɨvɨra higuera oyemboya oso sese, so gweraño tëi rumo osepia. Evokoiyase a'e aipo e'i higuera upe: — ¡Ko pɨpe suive tuprɨ nande'ai chietera! A'e ramose voi higuera opa ipiru.

²⁰A'e mba'e repiase, semimbo'e eta oyepɨ'amondɨi tëi ipare oporandu Jesús upe yuvɨreko: — ¿Marä e'i rutei vo higuera kurïtëi opa voi ipiru?

²¹Jesús rumo omboyevɨ chupe: — Supiete aipo a'e peü perekose yeroyasa Tüpä rese, iyavei ndaperekoi chietera poreroya e'ɨ̇sa, a'ese nda'ei ko mba'e gweraño peyapora inungar che ayapo va'e higuera rese, ko ɨvɨtrɨ upe avei aipo peyese: ‘Esɨrɨ ave sui evɨapɨ eso paragwasu pɨpe’, egwë e'i etera mba'e yavɨye koiye.

²²Akoi peyerurese mba'e pe porandusa rese Tüpä upe seroyasa pɨpe, a'ese peipɨsɨra mba'e avɨye va'e.

²³Ichui Jesús oike iri oso tüpäro pɨpe oporombo'e. A'ese pa'i eta rerekwar, judío rerekwar avei oyemboya sese, oporandu yuvɨreko chupe: — ¿Ava nde kwaita pɨpe vo ereyapo ko nungar eiko? ¿Ava vo ombou nde mborerekwarä ndeu?

²⁴Jesús rumo omboyevɨ chupe: — Che avei aporandura mba'e rese peü: ¿Ava vo Juan ombou ava apirämo agwä, Tüpä pi'ä ava tëi tie? Pemboyevɨse che porandusa, a'ese che avei amombe'ura ava porokwaita rupi ete pi'ä ayapo ko mba'e vichiko. Omboɨpɨ oñemoñeta aipo e'i oyeupe yuvɨreko: “Yamboyevɨse chupe Tüpä ombou ya'ese, a'e omboyevɨra yandeu: ‘Evokoiyase, ¿ma'erä ru ndaperoyai?’

²⁵

²⁶Iyavei ndiyai aipo ya'e chupe ava tëi remimbou, esepia kurïtëi yasɨkɨye ite ava sui, opakatu ite vɨroya yuvɨreko Juan Tüpä ñe'ë mombe'usar sekoise.”

²⁷Aipo e'i imboyevɨ yuvɨreko Jesús upe: — Ndoroikwai ete. Evokoiyase Jesús omboyevɨ chupe: — Evokoiyase che avei a'e iporokwaita pɨpe ko mba'e ayapo nda'ei chietera peü.

²⁸Jesús rumo oporandu chupe: — ¿Marä e'i pepɨ'a ñemoñetasa ko rese? Ñepëi mbɨa vɨreko va'e ñuvɨrïo gwa'ɨrɨ, ipare aipo e'i ñepëi upe: ‘Che ra'ɨrɨ eso ko pɨpe, ereporavɨkɨra che uvatɨve.’

²⁹Ta'ɨrɨ omboyevɨ chupe: ‘¡Ndachekere'ɨ̇i aso!’ Koiye katu rumo ipɨ'a ñemoñeta iri, osoño ite oporavɨkɨ.

³⁰Ipare iyesupa oso ambuae gwa'ɨrɨ upe aipo e'i tuprɨ avei. A'e omboyevɨ chupe: ‘Asora cheru, e'i anga'u tëi’ Ipare rumo ndosoi ete.

³¹¿Uma vo ko ñuvɨrïo yuvɨrekoi va'e oyapo oyesupa remimbotar? — Yɨpɨndar va'e — e'i imboyevɨ yuvɨreko chupe. Ipare Jesús aipo e'i: — Supiete gwarepochi rerokwasar Roma upe narä, kuña oyemondo-mondo tëi va'e avei, a'e rane yuvɨroikera pe sui Tüpä mborerekwasave.

³²Esepia Juan Oporoapirämo va'e ou ko tekokwer i'ɨ̇vi va'e mboyekwa agwä peü pe reko tuprɨ agwä viña, pe rumo ndaperoyai ete; ichui evokoi, gwarepochi rerokwasar iyavei kuña oyemondo-mondo tëi va'e, a'e rumo vɨroya ite yuvɨreko. Pe rumo yepe pesepia tëi opakatu evokoi mba'e viña, ndapeñekuñaröi rumo pe rekokwerai sui seroya agwä.

³³“Pesendu ko ambuae yembo'esa: Ñepëi mbɨa oñotɨ̇ va'e uva oɨvɨ pɨpe, oñachi tuprɨ sereko; omoigätu ñepëi save uva rɨkwer renose agwä ipare omopü'a ñepëi oɨ ɨvate va'e opakatu mba'e rärö agwä. Ipare oseya oɨvɨ ava oporavɨkɨ va'e upe iporu agwä. Ichui osë oso amombrɨ va'esa rupi.

³⁴Koiye oyepotase arɨ uva po'osa, a'ese omondo gwembigwai oporavɨkɨ va'e upe imboporandu agwä tomboumi uva po'oprɨ cheundar oyapave viña.

³⁵Ipare rumo oporavɨkɨ va'e oipɨsɨ sembigwai yuvɨreko: ñepëi oinupa-nupa, ambuae oyuka, iyavei ambuae oyapi-yapi ita pɨpe yuvɨreko.

³⁶Ipare ɨvɨ yar seta katu omondo iri gwembigwai yɨpɨndar sui; oporavɨkɨ va'e rumo marä-marä tëiño opakatu vɨreko yuvɨreko.”

³⁷“Koiye rumo gwa'ɨrɨ teiete omondo chupe a'e ipɨ'a ñemoñeta: ‘Ko che ra'ɨrɨ omboyeroya katura revo yuvɨreko e'i viña.’

³⁸Evokoiyase ta'ɨrɨ repiase oporavɨkɨ va'e, aipo e'i oyeupe yuvɨreko: ‘Ko aipo oipɨsɨra opakatu oyesupa mba'e; yayukaño a'ese ko ɨvɨ opɨtara yandeu narä.’

³⁹Egwë e'i ipɨsɨ, vɨnose uvatɨ sui ipare oyuka yuvɨreko.

⁴⁰Akoi, ouse uvatɨyar, ¿marä e'i pepɨ'a ñemoñetasa evokoi oporavɨkɨ va'e upe?”

⁴¹A'e omboyevɨ yuvɨreko chupe: — Opara revo oyuka saɨsue'ɨ̇sa pɨpe ite ko ava ndipɨ'ai va'e yuvɨreko, omondora revo oɨvɨ ambuae ava oporavɨkɨ va'e upe iporu agwä a'e tombou voi uva ipo'oprɨ cheu narä kuri o'esa pɨpe.

⁴²Jesús evokoiyase aipo e'i chupe: — ¿Ndapeyerokɨi ete vo ko Ikwachiaprɨ araka'endar pɨpe? Aipo e'i va'e: ‘Ko ita oɨ aposar opaño omombo yuvɨreko a'e ita oyeapo ovɨräkwä katu tuprɨ va'e ite. Egwë e'i ni'ä ko yande Yar yapo, iyavei kurïtëi yavɨ'arete ite yaiko.’

⁴³Sese aipo a'e peü serokwasara mborerekwasa ɨva pendar ichui, a'e imondosara ñepëi tekwa iporeroya va'e upe.

⁴⁴Akoi ovɨapi va'e evokoi ita arɨve opa tëira a'e ae oyemomarä; iyavei ovɨapise evokoi ita ava arɨve, a'ese opa tuprɨ aveira omokañɨ.

⁴⁵Pa'i eta rerekwar iyavei fariseo eta osenduse ko yembo'esa Jesús omombe'u va'e, oikwa voi ete ñe'ësa oyesendar yuvɨreko.

⁴⁶Evokoiyase oipɨsɨ pota voi yuvɨreko viña, osɨkɨyeño rumo, esepia ava vɨroya ite Jesús yuvɨreko Tüpä ñe'ë mombe'usar sekoise.