Read Guarayu MATEO 23 Bible Online

MATEO 23 - Guarayu bible

MATEO 23

¹Ko ipare, Jesús aipo e'i ava upe gwemimbo'e eta upe avei:

²“Ko Moisés porokwaita rese oporombo'e va'e iyavei fariseo eta, a'e ikwaita oporombo'e Moisés porokwaita mombe'u agwä yuvɨreko.

³Sese, iya peroyaño iyavei peyapo opakatu mba'e semimombe'u; anichira rumo peikora sembiapokwer rupi, esepia a'e omombe'u tuprɨ tëi mba'e, ipare rumo kokotɨ tëi mba'e oyapo yuvɨreko.

⁴Oñapɨ̇chi vosɨisa iposɨi va'e ndayasupi katui va'e, iyavei omondo ava achi'ɨ arɨve, a'e rumo ndopoko potai ete sese ñepëi ökwä pɨpe angara yuvɨreko viña.

⁵Oyapo anga'u mba'e opakatu ava rembiepiave yuvɨreko yepi. Tayande repia yuvɨreko oyapave tëi osɨva rese oyɨva rese avei Ikwachiaprɨ turukwar ipɨ va'e iyavei ipuku va'e rese, omonde avei oturukwar ipopɨ omoarö tuprɨai katu va'e yuvɨreko.

⁶Oipota karusa rupi gwenarä avɨye katu va'e, oseka avei tenda porañete katu va'e gwenarä judío ñemo'üsa pɨpe yuvɨreko no,

⁷a'e oipota opakatu ava oyapo avɨrave imboeteisave okar rupi yuvɨreko chupe, iyavei oipota porombo'esar e'i oyeupe yuvɨreko.”

⁸“Pe rumo porombo'esar ndapembo'e ukai chira ava peyeupe, esepia pe opakatu gwasu peyeɨvrɨ peiko iyavei ñepëiño ite pereko pe Mbo'esar.

⁹Iyavei cheru ndapeyei chira ava ko ɨvɨ pɨpendar tëi upe, esepia ñepëiño ite pe Ru pereko a'e ni'ä ɨva pendar.

¹⁰Ndiyai avei mborerekwar pembo'e uka ava peyeupe, esepia Poropɨsɨrösar gweraño ite pe rerekwar sekoi.

¹¹Akoi ava seko ɨvate katu va'e pe pa'ü pendar, a'e toipɨtɨ̇vɨïño ambuae ava.

¹²Esepia akoi oyemboɨvateai va'e, opara seko reroyɨsa; iyavei akoi ava seko mbegwe va'e, a'e seko mboɨvate katusara kuri.”

¹³“¡Peparaɨsu katu itera pe Moisés porokwaita rese oporombo'e va'e iyavei pe fariseo peiko va'e, pe inungar ava oñe'ë ñotëi va'e tekokwer rese yuvɨreko yepi!, pemombɨtaño ava Tüpä povrɨve seike rägwer sui yepi. Pe avei ete ndapeikei ipovrɨve, iyavei akoi yuvɨroike pota va'e pemombɨtaño seike rägwer sui.

¹⁴Pe paraɨsu katu itera pe Moisés porokwaita rese oporombo'e va'e iyavei pe fariseo peiko va'e pe seko tuprɨ anga'u tëi va'e!, esepia perokwa-rokwa tëi kuña imer mano va'ekwer rëtä ichui, ipare peyerure tuprɨ tëi anga'u ava rembiepiave. Sese peipɨsɨra Tüpä ñemoɨrösa ipirätä katu va'e kuri.”

¹⁵“¡Peparaɨsu katu itera, pe Moisés porokwaita rese oporombo'e va'e, pe avei fariseo, pe inungar ava oñe'ë ñotëi va'e tekokwer rese yuvɨreko yepi!, pegwata opakatu ɨvɨ rupi iyavei paragwasu rovai rupi ava mbo'e, ipare rumo pe remimbo'ekwer mba'e tëi katu pe sui, pe nungar karugwar ratave narä tëi pereko uka.”

¹⁶“¡Peparaɨsu katu itera, pe ava mbo'esar ndasesapɨsoi va'e nungar peiko!, pe aipo peye tëi va'e: ‘Yamombe'use mba'e tüpäro rer pɨpe, yande ñe'ë mboavɨye agwä, egwë ya'e tëiete; ko rumo yamombe'use mba'e oro tüpäro pendar rer pɨpe, a'ese iya itera yamboavɨye yepi.’

¹⁷¡Pe ndapemba'ekwai iyavei ndasesapɨsoi va'e nungar tëi peiko! ¿Uma vo avɨye katu va'e oro pi'ä, anise tüpäro tie sese ni'ä tüpäro pɨpe oro opɨta sovasaprɨ yepi?

¹⁸Ko uve avei aipo peye: ‘Ava pi'ä omboavɨye mba'e seropove'ëprɨ tüpäro pɨpe, a'e nomboavɨyei chira oñe'ë; akoi omboavɨye va'e oñe'ë seropove'ëprɨ tüpäro pɨpendar rese, a'ese voi yavɨyera iñe'ë.’

¹⁹¡Pe ndasesapɨsoi va'e nungar peiko yepi! ¿Uma vo avɨye katu va'e: porerekosa seropove'ëprɨ, anise mba'e tüpäro pɨpe seropove'ëprɨ tie a'e ni'ä porerekosa sovasaprɨ opɨta va'e yepi?

²⁰Akoi mba'e omombe'u va'e mba'e seropove'ëprɨ tüpäro pendar, nomombe'ui ete tüpäro pɨpe mba'e rese gweraño, opakatu i'arɨ pendar mba'e seropove'ëprɨ rer pɨpe avei,

²¹iyavei akoi omombe'u va'e mba'e tüpäro rer pɨpe, a'e nomombe'ui tüpäro rer pɨpe gweraño, Tüpä sekoi va'e upe avei.

²²Iyavei akoi omombe'u va'e ɨva resendar ñe'ësa, a'e omombe'u avei Tüpä mborerekwasa oiko, iyavei egwë e'i Tüpä rer pɨpe, esepia a'eve ite sekoi.”

²³“¡Peparaɨsu katu itera, pe Moisés porokwaita rese oporombo'e va'e iyavei pe fariseo peiko va'e, pe inungar ava oñe'ë ñotëi va'e tekokwer rese yepi!, yepe pemondo ñepëi-pëi imboopayandepo yovaivesa pe remitɨ̇ menta, anís, comino pereko va'e sui ñepëi Tüpä uve narä viña, pe rumo pepoi ko porombo'esa avɨye katu va'e porokwaita sui, peyapora mba'e i'ɨ̇vi va'e, peporoparaɨsuerekora iyavei pemboavɨye tuprɨra pe kwaita yepi. Ko nungar peyapora peiko, ndaperesarai chira ambuae mba'e peyapo agwä sui.

²⁴¡Pe ava mbo'esar ndasesapɨsoi va'e nungar tëi peiko, pembogwa rutei ñachi'ü pe ɨgwa pɨpe sui; camello rumo pemokoño ite!”

²⁵“¡Peparaɨsu itera pe Moisés porokwaita rese oporombo'e va'e iyavei pe fariseo peiko va'e, pe inungar ava oñe'ë ñotëi va'e tekokwer rese yuvɨreko yepi!, esepia inungar ɨgwa rɨru iyavei tembi'u rɨru ikupe rupi tëi yoseiprɨ, ipɨpe rumo ikɨ'a opɨtaño ite, egwë e'i avei pe rekokwer pe monda raisa pɨpe.

²⁶¡Pe fariseo ndaperesapɨsoi va'e: yɨpɨndar pemoatɨrö rane ɨgwa rɨru ipɨpe kotɨ, ichui egwë e'i aveira opɨta ikatuprɨ ikupe kotɨ no!”

²⁷“¡Peparaɨsu katu itera, pe Moisés porokwaita rese oporombo'e va'e, fariseo peiko va'e avei, inungar ava oñe'ë ñotëi va'e tekokwer rese yuvɨreko yepi!, pe rekokwer inungar tuvɨpa imomorochimbrɨ tëi, i'arɨve tëi ikatuprɨ chupe, ipɨpe rumo te'ögwer kangwer iyavei opakatu mba'e yavaete va'e ovɨreko oyese.

²⁸Egwë e'i perekokwer: ava rembiepiave avɨye pe reko i'ɨ̇vi va'e viña, pepɨ'a pɨpe rumo oime pe porombopasa iyavei opakatu mba'e-mba'e tëi naporäi va'e.”

²⁹“¡Peparaɨsu katu itera pe Moisés porokwaita rese oporombo'e va'e, pe fariseo peiko va'e, inungar ava oñe'ë ñotëi va'e tekokwer rese yuvɨreko yepi!, esepia pemoigätu Tüpä ñe'ë mombe'usar ruvɨpagwer peiko sese pe yemoma'endu'a agwä iyavei pemoporañeteai tëi ava seko i'ɨ̇vi va'e ruvɨpagwer yepi viña,

³⁰ipare aipo peye: ‘Yande yaikose revo araka'e yande ramoi rekose, ndayaipɨtɨ̇vɨï chietera Tüpä ñe'ë mombe'usar yuka agwä yuvɨreko viña.’

³¹Aipo peyese rumo, pemboyekwa Tüpä ñe'ë mombe'usarer yukasar suindar pe yesusa.

³²¡Pemboavɨye rane, araka'endar pe ramoi omboɨpɨ va'e yapo yuvɨreko!”

³³“¡Pe mboi nungar tëi peiko! ¿Ndapesoyepei chira rumo Tüpä ñemoɨrösa tata gwasu sui?

³⁴Evokoiyase che amboura peü Tüpä ñe'ë mombe'usar, ava yarakwa va'e imba'ekwa va'e avei. Pe rumo peyukara iyavei peyatɨka ukara ipa'ü pendar yuvɨreko, iyavei ambuae peinuparä oɨ judío ñemonu'äsa rupi sereko iyavei ambuae pesekara tekwa yakatu rupi.

³⁵Sese peüño ite oura Tüpä ñemoɨrösa opakatu ava avɨye va'e yuka agwer rese ko ɨvɨ pɨpe; Abel seko ɨ̇vi tuprɨ va'e yuka agwer sui, ipare opakatu ambuae sakɨkwerindar ava yuka agwer sui, ipa Berequías ra'ɨrɨ Zacarías sui avei, a'e peyuka va'e tüpäro pɨpe mba'e seropove'ëprɨ renda rovai.

³⁶Supiete opakatu ko mba'e tëi oura ñemoɨrösa ava kurïtëindar rese.”

³⁷“¡Pe Jerusalén, Jerusalén pendar, peyuka va'e Tüpä ñe'ë mombe'usar ita pɨpe peyapi-yapi ava Tüpä remimbou yepi! ¡Seta rupi che opomonu'ä pota tëi pe rereko inungar takura omonu'ä va'e omembrɨ opepovrɨve, pe rumo ndapeipotai ete evokoi nungar pe rereko agwä!

³⁸Pema'e ko perëtä rese seyapɨrä tëiete opɨtara;

³⁹iyavei aipo a'e peü, ko suive tuprɨ, ndache repiai chira peye akoi aipo peye rane itera, ‘¡Imboeteiprɨ yande Yar remimbou tasekoi!’ ”