Read Guarayu MATEO 25 Bible Online

MATEO 25 - Guarayu bible

MATEO 25

¹“Egwë e'ira a'e arɨ pɨpe Tüpä mborerekwasa inungar tuprɨ mendasave: opayandepo yovaive kuñatäi vɨraso va'e tataendɨ ambuae kuña mevɨ pɨsɨ agwä yuvɨreko.

²Ipa'üve yuvɨrekove poyandepo tuprɨ ndipɨ'a ñemoñetai va'e iyavei ambuae poyandepo tuprɨ ipɨ'a ñemoñeta tuprɨ va'e yuvɨreko.

³Ipare ndipɨ'a ñemoñetai va'e oipɨsɨ gwataendɨrä, ndovɨrasoi rumo yandɨ gwataendɨ rɨru mboapɨpo iri agwä yuvɨreko;

⁴evokoi ipɨ'a ñemoñeta tuprɨ va'e rumo, vɨraso yandɨ sɨru pɨpe, gwataendɨ reseve yuvɨreko.

⁵Kuña mevɨ ndoyepota apɨ'aise rumo, a'ese opakatu sopesɨi tëi yuvɨreko, koiye opaño ite yuvɨroke ichui.

⁶Pɨ̇tü mbɨter vɨrovɨse rumo, osendu ñe'ësa aipo e'i va'e yuvɨreko: ‘¡Koi imevɨ turi! ¡Pesë ipɨsɨ agwä!’

⁷A'ese opakatu tuprɨ kuñatäi oñarapü'a voi iyavei omoigätu gwataendɨ yuvɨreko.

⁸Evokoiyase poyandepo tuprɨ kuñatäi nima'emo'äi va'e aipo e'i ambuae poyandepo ima'emo'ä va'e upe yuvɨreko: ‘Pemboumi tëi chi'ï pe yandɨ oreu, esepia ogwe pota ite ore rataendɨ.’

⁹Kuñatäi ima'emo'ä va'e rumo omboyevɨ yuvɨreko chupe: ‘Ani, esepia ndiyai chietera oreu peü narä aveino. Iyakatu revo peso serokwasave, a'e ichui perokwa peyeupe narä.’

¹⁰Evokoiyase poyandepo kuñatäi yuvɨraso vɨteseve yandɨ rerokwa, a'ese tuprɨ oyepota kuña mevɨ ou, kuñatäi oyemoigätu va'eño tuprɨ yuvɨroike supi mendasave, ipare rumo okenda rärösar omboya okenda.

¹¹Ipare rumo oyepotase ambuae kuñatäi yugweru, aipo e'i tëi yuvɨreko: ‘¡Oɨ yar, oɨ yar, emboimi tëi oreu!’

¹²A'e rumo omboyevɨ chupe: ‘Che ndopokwai va'e.’ ”

¹³“Pe evokoiyase pema'emo'ära peyese — aipo e'i iri Jesús — , esepia ni'ä ndapeikwai ete mba'e arɨ pɨpe che ayevɨra vitu.”

¹⁴“Egwë e'i tuprɨ aveira mborerekwasa ɨva pendar rese inungar ava, oso agwä renonde, ɨvɨ amombrɨsave, ichui oñe'ëpa gwembigwai eta upe ogwarepochi rärö agwä.

¹⁵Ñepëi ipa'ü pendar upe omondo cinco mil gwarepochi, ambuae upe omondo dos mil, iyavei imombosapɨsa upe omondo mil: a'e omondo ñepëi-pëi upe seko etekwer rupi. Ipare voi oso ogwata.

¹⁶Evokoiyase mbigwai oipɨsɨ va'e cinco mil gwarepochi a'e oporavɨkɨ ko gwarepochi rese ipɨpe sui koiye oipɨsɨ katu iri ambuae cinco mil gwarepochi.

¹⁷Inungar avei ambuae oipɨsɨ va'e dos mil, ichui oipɨsɨ katu iri ambuae dos mil.

¹⁸Akoi oipɨsɨ va'e rumo gwarepochi mil a'e oso oñomi gwerekwar gwarepochi ñepëi ɨvɨkwar oyo'o va'e pɨpe.”

¹⁹“Ipare koiye oyevɨse serekwar a'e gwembigwai upe ou, ichui oporandu ogwarepochi retakwer rese ikwa agwä.

²⁰Yɨpɨndar oyepota oso oipɨsɨ va'e cinco mil gwarepochi ranegätu, a'e omondo gwerekwar upe ambuae cinco mil tuprɨ, aipo e'i chupe: ‘Ore rerekwar, nde akoi erembou va'e cinco mil cheu, ichui ko ambuae cinco mil areko ndeu narä che poravɨkɨ reprɨ.’

²¹Serekwar rumo aipo e'i chupe: ‘Avɨye ite, nde mbigwai seko avɨye va'e, eremboavɨye tuprɨ va'e nde kwaita ko movɨrö tëi gwarepochi ndeu amondo va'e pɨpe. Sese tuvicha katu amondora nde kwaitarä. Eike che pɨri eyembovɨ'a katu che rese.’

²²Ipare ambuae sembigwai oipɨsɨ va'e dos mil gwarepochi, oyemboya gwerekwar rese aipo e'i chupe: ‘Ore rerekwar, nde akoi erembou va'e dos mil cheu, ichui ko ambuae dos mil areko ndeu narä che poravɨkɨ reprɨ.’

²³Serekwar rumo aipo e'i chupe: ‘Avɨye ite, nde mbigwai seko avɨye va'e, eremboavɨye tuprɨ va'e nde kwaita ko movɨrö tëi gwarepochi ndeu amondo va'e pɨpe. Sese tuvicha katu amondora nde kwaitarä. Eike che pɨri eyembovɨ'a katu che rese.’ ”

²⁴“Ipare oyepota ambuae ou mbigwai oipɨsɨ va'e mil gwarepochi, a'e aipo e'i gwerekwar upe: ‘Che rerekwar, aikwa ite nderekokwer nandeavaise, esepia ava remitɨ̇gwer tëi eremonu'ä ambuae remitɨ̇gwer tëi avei ereipɨsɨ ndeyeupe narä.

²⁵Sese che sɨkɨyesa pɨpe añomi ɨvɨvrɨve nde gwarepochi. Ko areko nde mba'e kurïtëi.’

²⁶Serekwar rumo omboyevɨ chupe: ‘Nde mbigwai ndasekoporäi va'e yangaipa vai va'e avei ereiko, nde ni'ä ereikwa che rekokwer aipɨsɨse mba'e nañotɨ̇i va'e sui ipare amonu'ä mba'e nañotɨ̇i va'e sui avei.

²⁷Ereyapo katumirä che gwarepochi, gwarepochi apokatusave kwesera'e viña, che yevɨse voi senose agwä cheu imboyevɨ katumi agwä viña.’

²⁸Ipare aipo e'i a'eve yuvɨrekoi va'e upe: ‘Perokwa gwarepochi mil va'e ichui, a'e pemondora evokoi vɨreko va'e diez mil gwarepochi upe.

²⁹Esepia vɨreko va'e mba'e, chupe imondosa katura, iyavei vɨrekora sumbɨrer; akoi ndovɨrekoi va'e rumo mba'e, opaño itera serokwasa mba'e sembierekomi ichui.

³⁰Iyavei ko mbigwai yangaipavai va'e, pemose okarve pɨ̇tümimbisave. A'eve toyase'o, tasäitere-tere tëi öi.’ ”

³¹“Che, ava ɨvate katu va'e Ra'ɨrɨ, ayevɨse opakatu che Ru rembigwai ɨva pendar reseve che reko ɨvategwer pɨpe, a'ese agwapɨra che renda porañete va'esave ava rekokwer rese porandu agwä.

³²Ava opakatu tekwa ɨvɨ rupindar imonu'äsara che rovai yuvɨreko, a'ese aipe'ara ava oyesui, inungar ovesa rärösar oipe'a va'e ovesa kavara sui.

³³Che evokoiyase ovesa aipe'ara mba'e rese che pokosa kotɨ, kavara mba'e rese che pokoe'ɨ̇sa kotɨ.

³⁴A'ese che Mborerekwar ɨvate katu va'e aipo a'era che akato kotɨndar upe: ‘Perio opakatu, che Ru sui sovasaprɨ peiko va'e, peike che Ru Tüpä mborerekwasa pɨpe; a'e akoi yɨpɨve ɨvɨ apo ramo suive imoigätuprɨ peü narä.

³⁵Akoi ndacherɨepoise, pe evokoiyase pembou mba'e che rembi'urä; iyavei che useise, pe evokoiyase pembou avei taɨ'u; che agwata tëise pe rekwa rupi vichiko, pe avei oɨ pembou che pɨtu'u agwä.

³⁶Turukwar ipanese, pe avei pembou cheu; che mba'easɨse peso avei che pɨri; che rokendasave peso avei che repia.’

³⁷Evokoiyase seko katuprɨ va'e aipo e'ira yuvɨreko cheu: ‘Ore Yar, ¿mba'ese vo nde repiasa nanderɨepoise eiko, iyavei imondosa nde rembi'urä? ¿Mba'ese vo nde repiasa nde'useise, ipare imondosa tereɨ'u?

³⁸¿Mba'ese vo nde repiasa nde gwatase ore rekwa rupi, ipare nde mongesa ore pɨri, ipanese nde turukwarä, ore aipo evokoiyase oromondo ndeu?

³⁹¿Mba'ese vo aipo nde repiasa nde mba'easɨse anise nde rokendasave, a'eve aipo oroso nde repia yepi?’

⁴⁰Mborerekwar ɨvate katu va'e rumo omboyevɨra chupe: ‘Supiete peyapose opakatu mba'e avɨye va'e ñepëi seko mbegwemi va'e, che reroyasar pa'ü pendar upe cheu rumo egwë peye.’ ”

⁴¹“A'ese Mborerekwar ɨvate katu va'e cherekosa pɨpe aipo a'era che pokoe'ɨ̇sa kotɨndar upe: ‘Pesɨrɨ che sui, esepia peiko Tüpä ñemoɨrösavrɨ pendar tëi; pesopa tata gwasu apɨre'ɨ̇save, evokoi imoigätuprɨ opakatu karugwar upe sembigwai upe narä avei.

⁴²Akoi ndacherɨepoise, pe evokoiyase ndapembou mba'e che rembi'urä; iyavei che useise, pe evokoiyase ndapemboui ete taɨ'u;

⁴³che agwata tëise pe rekwa rupi vichiko, pe ndapemboui oɨ che pɨtu'u agwä, turukwar ipanese, pe ndapemboui ete cheu; che mba'easɨse iyavei che rokendasave, ndapesoi ete che pɨri.’

⁴⁴Evokoiyase a'e oporandura yuvɨreko chupe: ‘Ore Yar, ¿maräse vo aipo nde repiasa nanderɨepoise anise aipo nde useise, anise ndegwatatëisa rupi, ipanese nde turukwarä ndeu, anise nde mba'easɨse, anise nde rokendasave, iyavei nande pɨtɨ̇vɨïsaise no?’

⁴⁵Mborerekwar ɨvate katu va'e rumo omboyevɨra chupe: ‘Supiete akoi amove mba'e ndapeyapoise mba'e avɨye va'e seko mbegwemi va'e upe, ipɨpe rumo cheu avei mba'e ndapeyapoi ete.’

⁴⁶A'e ava yuvɨrasora Tüpä ñemoɨrösa apɨre'ɨ̇ va'esave, seko ɨ̇vi va'e rumo teko orɨ opae'ɨ̇save yuvɨrasora.”