Read Guarayu MATEO 26 Bible Online

MATEO 26 - Guarayu bible

MATEO 26

¹Jesús opakatu oporombo'esa omboavɨyese, aipo e'i gwemimbo'e eta upe:

²— Peikwa ñuvɨrïo arɨ tëi ipane vɨte ko Pascua pieta yepota agwä, ipare che ava ɨvate katu va'e Ra'ɨrɨ imondosara yatɨkapɨrä kurusu rese.

³A'e arɨ pɨpe avei, pa'i eta rerekwar, iyavei judío rerekwareta oñemonu'ä yuvɨreko pa'i rerekwar ɨvate katu va'e Caifás rëtäve,

⁴a'e ipɨ'añemoñeta marä e'ira Jesús pɨsɨ agwä iyavei imbopa agwä yuka agwä yuvɨreko no.

⁵A'e rumo aipo e'iño yuvɨreko: — Ndiyai pieta pɨpe yaipɨsɨ, ava re'ɨi yemondɨi e'ɨ̇ agwä.

⁶Jesús tekwa Betania ve sekoi, Simón rëtäve, a'e serer va'e mba'erasɨ vai vɨreko va'ekwer;

⁷a'ese aipo oyemboya ñepëi kuña oso sese vɨraso ñepëi mba'e omboapɨpo tuprɨ va'e iyavei sepɨrusuai va'e. A'eve Jesús chinise karusa rendave, a'e kuña oipɨyere mba'e sɨäkwä va'e ñakä rese.

⁸Semimbo'e eta rumo sepiase, oñemoɨrö tëi omboɨpɨ aipo oya yuvɨreko: — ¿Ma'erä pi'ä ko imokañɨsa tëi?

⁹Omondo va'e ite tie ko seta gwarepochi rupi, iparaɨsu va'e pɨtɨ̇vɨï agwä viña.

¹⁰Jesús osenduse, aipo e'i chupe: — ¿Ma'erä pemañeko tëi ko kuña? esepia oyapo ite mba'e avɨye va'e cheu.

¹¹Ava iparaɨsu va'e ni'ä yuvɨrekoiño itera pe pa'üve. Che rumo egwë nda'e vɨteñoi chira vichiko pe pa'üve.

¹²Ko kuña, oipɨyere mba'e sɨäkwä va'e che retekwer rese, a'e omoigätu voi ete che tɨ̇ agwä renondeve.

¹³Supiete aipo a'e peü ko ñe'ësa pɨsɨrösa resendar mombe'use opakatu tekwa rupi, imombe'usa aveira ko kuña rembiapo agwer, iyavei yemoma'endu'asara sese yepi.

¹⁴Ñepëi semimbo'e opayandepo yovaive ñuvɨrïo pa'ü pendar, a'e serer va'e Judas Iscariote, oso oñe'ë pa'i eta rerekwar upe.

¹⁵Aipo e'i chupe: — ¿Mbovɨ pi'ä pemboepɨra cheu, amondose Jesús peü viña? A'e evokoiyase omondo treinta gwarepochi yuvɨreko chupe.

¹⁶Ipare evokoiyase Judas oseka tëi Jesús mondo agwä yamotare'ɨ̇mbar upe.

¹⁷Yɨpɨndar arɨ pieta resendar mboyape ndayapepoi va'e usa pɨpe, Jesús remimbo'e oyemboya yuvɨraso sese, ipare oporandu yuvɨreko chupe: — ¿Kevo ereipota oromoigätu karusa Pascua resendar yandeu?

¹⁸Jesús omboyevɨ gwemimbo'e upe: — Peso tekwa gwasuve, Chekwa va'e rëtäve, iyavei aipo peyera chupe: ‘Porombo'esar aipo e'i: köimi che mano agwä, sese ayapo potami sëtäve Pascua pieta che remimbo'e reseve e'i ndeu.’

¹⁹Semimbo'e oyapo ite Jesús remimombe'u rupi, ipare omoigätu karusa Pascua pieta resendar yuvɨreko.

²⁰Pɨ̇tü ramomise, opakatu ogwapɨ karusa rendave Jesús opayandepo yovaive ñuvɨrïo tuprɨ gwemimbo'e rese yuvɨnoi;

²¹iyavei okaru vɨteseve, aipo e'i: — Supiete aipo a'e ñepëi pe pa'ü pendar che mondora che amotare'ɨ̇sar upe.

²²A'e evokoiyase ndoyembovɨ'ai tëi yuvɨreko, ipare omboɨpɨ oporandu ñepëi oyeupe yuvɨreko: — Che Yar, ¿che pi'ä?

²³Jesús rumo omboyevɨ chupe: — Ñepëi akoi omoakɨ̇ va'e mboyape che karo pɨpe, a'e che mondora che amotare'ɨ̇sar upe.

²⁴Imboavɨyesa itera che ava ɨvate katu va'e Ra'ɨrɨ, rese ñe'ësa Ikwachiaprɨ; ¡iparaɨsu katura rumo akoi mbɨa che mondosar! Avɨye katura ndoyesuise viña.

²⁵A'ese Judas imondosavɨ oporandu aipo e'i chupe: — Porombo'esar, ¿che pi'ä oromondora? — Nde ni'ä egwë erera — e'i Jesús imboyevɨ chupe.

²⁶Yuvɨrokaru vɨteseve, Jesús oipɨsɨ mboyape, ipare avɨye ndeu e'i Tüpä upe, ombo'i-mbo'i imondo gwemimbo'e upe, aipo e'i: — Peipɨsɨ pe'u avei, ko che rete.

²⁷Ipare oipɨsɨ ɨgwa rɨru, avɨye ndeu e'i Tüpä upe, aipo o'e pare omondo gwemimbo'e upe aipo e'i: — Peɨ'u opakatu ko i'ɨgwarɨru sui,

²⁸esepia ko che ruvɨ, a'e che Ru remimbotar ipɨasu va'e peü narä, che ruvɨ oyepɨyerera ava re'ɨi rekokwer angaipa repɨrä rese.

²⁹Che amombe'u peü ndaɨ'u iri chira ko uva rɨkwer, cheu arɨ oyepotase voi che Ru mborerekwasave aɨ'ura pe rese ambuae uva rɨkwer ipɨasu va'e.

³⁰Osapukaire sapukaisa, opa yuvɨraso ka'a ɨvɨtrɨ Olivos ve.

³¹A'ese Jesús aipo e'i: — Opakatu pemokañɨrä che rese yeroyasa peyesui ko pɨ̇tü pɨpe. Esepia aipo e'i Ikwachiaprɨ pɨpe: ‘Ayukara ovesa rärösar, a'ese oñemosaï tëira ovesa opakatu rupi yuvɨreko.’

³²Akoi che kwerayevɨre rumo, opa irira opomonu'ä Galilea ve.

³³Pedro omboyevɨ chupe: — Yepe ambuae opakatu nande reroya iri chira yuvɨreko, che rumo ndayepepɨi chietera ndesui.

³⁴Jesús aipo e'i chupe: — Supiete aipo a'e ndeu ko pɨ̇tü pɨpeve voi, takura ñe'ë ñuvɨrïo yupagwer renondeve, ndaikwai va'e evokoi mbɨa erera mbosapɨ yupagwer rupi cheu.

³⁵Pedro omboyevɨ chupe: — Yepe che amano tëira nde rupi viña, che rumo ndaikwai va'e nda'ei chietera ndeu. Opakatu semimbo'e eta aipo e'i tuprɨ avei yuvɨreko chupe.

³⁶Ipare Jesús oso gwemimbo'e eta reseve Getsemaní serer va'esave, aipo e'i chupe: — Pegwapɨ ko'ave, che aso ranera peve katumi ayerure.

³⁷A'ese vɨraso Pedro iyavei ñuvɨrïo Zebedeo ra'ɨrɨ oyeupi, ichui omboɨpɨ ndoyepɨ'a mbovɨ'aiete oiko.

³⁸A'e rumo aipo e'i chupe: — Che ayandu ite kurïtëi vɨ'are'ɨ̇sa manosa resendar. Pepɨtapa rane ko'ave, iyavei pema'emo'ära yeruresa pɨpe ndapekei chira che rupive.

³⁹Koiye Jesús oso tenonde katumi, a'eve oyaɨvɨ ɨvɨ rese oso, aipo e'i oyerure: “Che Ru, iyase ndeu che renose mba'e-mba'e tëi sui eve; tayapo eme ru che remimbotar tëi, nde remimbotar rupi katu tayaposa mba'e”

⁴⁰Ipare oyevɨ gwemimbo'e upe, ichui a'e opaño yuvɨroke yuvɨrokwa. A'ese aipo e'i Pedro upe: — ¿Ndapeñemosaï ete vo pe ropesɨi upe che mondugwe agwä peye?

⁴¹Pema'emo'ä pekeirene, peyerure katu mba'e tëi pɨpe pevɨapi e'ɨ̇ agwä. Pe ni'ä pekere'ɨ̇ ite viña, pe retekwer rumo nipirätäi peü.

⁴²Imoñuvɨrïosa rupi oso iri, oyerure aipo e'i: “Che Ru, ereipotase che reike agwä ko mba'e tëi pɨpe, eyapo nde remimbotar che rese.”

⁴³Ipare oyevɨse, osesapɨ'a iri ikeseve gwemimbo'e eta ou, esepia sopesɨi nomboyeroyai ete yuvɨreko.

⁴⁴Oseyapa iri oso oyerure agwä imombosapɨsa rupi, aipo e'i tuprɨño avei oyerure.

⁴⁵Evokoiyase oyevɨ iri gwemimbo'e eta upe sekosave, aipo e'i chupe: — ¿Peke pepɨtu'u vɨteño vo peyu? Osupitɨ che, ava ɨvate katu va'e Ra'ɨrɨ, mondo agwä ava yangaipa va'e povrɨve.

⁴⁶Pepü'apa yaso; köimi ete che amotare'ɨ̇sar upe che mondo va'erä sekoi.

⁴⁷Jesús ñe'ë vɨteseve, Judas oyepota oso chupe, a'e ñepëi semimbo'e opayandepo yovaive ñuvɨrïo pa'ü pendar, iyavei seta iteanga ava yugweru kɨse puku, ɨvɨra reseve-seve supi. A'e pa'i eta rerekwar yuvɨrekoi va'e judío rerekwar porokwaita rupi oyapo yuvɨreko.

⁴⁸A'ese Judas, imondosar aipo e'i: “Akoi che asovaupɨte va'e, a'ese peikwara; a'e peipɨsɨra.”

⁴⁹Oyemboya Jesús rese oso, aipo e'i chupe: — ¡Avɨrave, Porombo'esar! Ichui osovaupɨte.

⁵⁰Jesús omboyevɨ chupe: — Che mborɨpar, eyapoño mba'e nde remimbotar rupi cheu. Evokoiyase ambuae oyemboya sese, a'ese oipɨsɨ Jesús yuvɨreko.

⁵¹A'ese ñepëi sekoi va'e Jesús rupi, vɨnose okɨse puku, oyasɨa pa'i rerekwar ɨvate katu va'e rembigwai nambi.

⁵²Jesús aipo e'i chupe: — Eyapokatu nde kɨse puku sɨru pɨpe. Esepia akoi ava opakatu ovava va'e kɨse puku pɨpe, ipɨpe avei opara yukasa yuvɨreko.

⁵³¿Ndereikwai vo che aporanduse che Ru upe che pɨtɨ̇vɨï agwä rese viña, a'e kurïtëi omboura doce mil sui seta katu va'e gwembigwai che repɨ agwä viña?

⁵⁴Egwë e'ise rumo, ¿marä e'ira vo yavɨye Ikwachiaprɨ, esepia ni'ä yavɨye rane itera mba'e imombe'uprɨ?

⁵⁵A'ese oporandu Jesús ava re'ɨi upe: — ¿Ma'erä vo peyu peiko kɨse puku rese iyavei ɨvɨra reseve-seve che pɨsɨ agwä, inungar che imondarai va'e che rereko peye? Arɨ yakatu rupi ni'ä aporombo'e vichiko tüpäro pɨpe yepi, iyavei a'eve ndache pɨsɨi ete peye.

⁵⁶Ko rumo opakatu yavɨye rane itera aipo e'i va'e Tüpä ñe'ë mombe'usar rembikwachiagwer araka'endar. A'e ramoseve voi, opakatu semimbo'e eta oseya Jesús imo'ä a'e ae yuvɨreko, ipare opa oñemi yuvɨreko ichui.

⁵⁷A'ese Jesús pɨsɨsar vɨraso Caifás rëtäve yuvɨreko, a'e pa'i rerekwar ɨvate katu va'e sekoi, a'eve oñemonu'äpa Moisés porokwaita rese oporombo'e va'e judío rerekwar yuvɨrekoi va'e aveino.

⁵⁸Pedro rumo amombrɨ rupive tëi osakɨkwei moña oso egwë e'i oyepota pa'i rerekwar ɨvate katu va'e rëtä rokar ächisave. A'eve oike ipɨpe, ogwapɨ öi sundao pa'üve marä e'i etera pi'ä sereko yuvɨreko oyapave.

⁵⁹A'ese pa'i eta rerekwar iyavei opakatu Porandusa Ɨvate katu va'e pendar, oñe'ëngapo-ngapo uka tëi ava Jesús amotare'ɨ̇save yuka uka agwä yuvɨreko,

⁶⁰yepe oyemboyekwa tëi seta iteanga yamotare'ɨ̇sar ava semirä-mirä tëi va'e sese yuvɨreko viña, ndoyosɨi ete rumo mba'e naporäi va'e sembiapo yuka uka agwä yuvɨreko. A'ese yugweru ambuae ñuvɨrïo yamotare'ɨ̇sar oporombopa-mbopa tëi va'e,

⁶¹mba'e omombe'u va'erä yuvɨreko: — Ko mbɨa aipo e'i: ‘Che aikatu ko Tüpä rëtä monduru aikatu aveira imopü'a iri mbosapɨ arɨ rupi.’

⁶²Evokoiyase pa'i rerekwar ɨvate katu va'e opü'a oporandu Jesús upe: — ¿Ma'erä vo nderemboyevɨi ete iñe'ë yuvɨreko chupe? ¿Mba'e e'i vo aipo nde amotare'ɨ̇sar nde rese oñe'ë?

⁶³Jesús rumo noñe'ëi ete o'ä. Pa'i eta rerekwar ɨvate katu va'e aipo e'i chupe: — Tüpä oikove va'e rer pɨpe emombe'u supiete va'e mba'e. Nde ite vo ereiko Poropɨsɨrösar, Tüpä Ra'ɨrɨ.

⁶⁴Jesús aipo e'i imboyevɨ chupe: — Nde ni'ä aipo ere cheu. Ko katu amombe'ura peü, che repiara ni'ä peye che, ava ɨvate katu va'e Ra'ɨrɨ, agwapɨse Tüpä mba'e mboavaisare'ɨ̇ akato kotɨ, ayevɨse avei ɨva kɨ'a rese kuri.

⁶⁵Evokoiyase pa'i rerekwar ɨvate katu va'e imboasɨpave omondoro oturukwar, aipo e'i: — ¡Ko mbɨa oñe'ë tëiete Tüpä rese! ¿Mba'e iri vo yaipota vɨte yaiko? Pesendupa ni'ä aipo iñe'ë-ñe'ë tëisa kurïtëi;

⁶⁶¿marä e'i aipo pe pɨ'ave? A'e rumo aipo e'i yuvɨreko: — Supiete oyavɨ mba'e, tomanoño ite.

⁶⁷A'ese ondɨvɨ-ndɨvɨ sova rese yuvɨrokwa-rokwa avei sese yuvɨreko. Ambuae evokoiyase osovapete-pete yuvɨreko no,

⁶⁸aipo e'i yuvɨreko chupe: — Nde ni'ä aipo ereiko Poropɨsɨrösar, ¡eikwa ite ru, ava evokoi okwa nde rese!

⁶⁹Pedro, evokoiyase ogwapɨ särö okarve ñachimbrɨ pɨpe öi. A'eve oyemboya kuña ñepëi mbigwai oso sese aipo e'i chupe: — Nde avei akoi eregwata eiko, Jesús Galilea pendar rupi.

⁷⁰Pedro rumo aipo e'iño opakatu ava rovake: — Ndaikwai aipo nde ñe'ësa e'iño kuña upe.

⁷¹Ichui oso okendɨpɨve, a'eve oma'e ambuae kuña sese aipo e'i ambuae ava yuvɨrekoi va'e upe: — Ko avei ni'ä ogwata Jesús Nazaret pendar rupi.

⁷²Evokoiyase Pedro aipo e'i iri avei, ndopombopai ete: — ¡Ndaikwai va'e evokoi mbɨa!

⁷³Ipare koiye katu, yuvɨrekoi va'e a'eve oyemboya Pedro rese aipo e'i yuvɨreko chupe: — Nde avei akoi ereiko ipa'ü pendar. Esepia nde ñe'ë rese ikwasaño ite.

⁷⁴Evokoiyase Pedro aipo e'i, ndopombopai ete: ¡Ndaikwai ete aipo a'e mbɨa! Aipo i'eseve ñepëi takura oñe'ë,

⁷⁵ipare Pedro oyemoma'endu'a Jesús ñe'ë agwer rese: “Akoi takura ñe'ë renondeve mbosapɨ yupagwer rupi, ndaikwai va'e ite aipo mbɨa erera cheu.” Ichui Pedro osë okarve oso, oyase'o iteanga.