Read Guarayu MATEO 28 Bible Online

MATEO 28 - Guarayu bible

MATEO 28

¹Oñokwäse mbɨtu'usa arɨ, a'e pɨ̇tü ramomise omboɨpɨ domingo pɨpe, María Magdalena iyavei ambuae María yuvɨraso te'ögwer ruvɨpa repia yuvɨreko.

²Avɨyeteramo tëi orɨrɨi pirätä ɨvɨ, esepia ñepëi mbigwai ɨva pendar yande Yar suindar ogweyɨ ɨva sui ou, ipare oyemboya te'ögwer ruvɨpave, a'e vɨrokwa ita sovapɨsa ichui ogwapɨ i'arɨve öi.

³A'ese mbigwai ɨva pendar sendɨ iteanga inungar overa va'e, iyavei iturukwar inungar ɨva kɨ'a morochi eteanga va'e.

⁴Osepiase, sundao eta orɨrɨi eteanga osɨkɨyepave, ichui opɨtapa omano va'e nungar yuvɨreko.

⁵Mbigwai ɨva pendar aipo e'i kuña eta upe: — Pesɨkɨyei rene. Esepia che aikwa pesekase Jesús yatɨkapɨrer peiko.

⁶Ndipoi ete ko'ave, a'e okwerayevɨ gwemimombe'u rupi ete. Perio tapesepia ru supagwer.

⁷Peso poyava voi, tapemombe'u semimbo'e eta upe: ‘A'e okwerayevɨ, iyavei osora Galilea ve pemonu'ä agwä a'eve pesepiara.’ Ko chekwaita imombe'u agwä peü.

⁸Kuña eta yuvɨraso poyava voi suvɨpa sui, osɨkɨye pa'üve rumo ovɨ'año yuvɨreko, egwë e'i yuvɨnoña iteanga imombe'u semimbo'e eta upe yuvɨreko.

⁹A'ese, Jesús oyemboyekwa kuña upe omboavɨrave. A'e kuña evokoiyase oyemboya sese oñenopɨ'ä ipɨ ku'agwä imboeteisave yuvɨreko,

¹⁰ipare a'e aipo e'i chupe: — Pesɨkɨyei rene. Pesoño tapemombe'u che reroyasareta upe toyuvɨraso Galilea ve, a'eve che repiara yuvɨreko.

¹¹Kuña yuvɨraso vɨteseve, a'ese movɨrö sundao oyepota yuvɨraso tekwa gwasu pɨpe yuvɨreko a'e omombe'upa pa'i eta rerekwar upe opakatu mba'e osepia va'ekwer yuvɨreko.

¹²Evokoiyase ko pa'i rerekwareta yuvɨraso oñemoñeta judío rerekwar rese, opɨ'añemoñeta mboyoya agwä. Ichui omondo seta gwarepochi sundao upe,

¹³aipo e'iño yuvɨreko chupe: — Pe aipo peyera ava upe, pɨ̇tü pɨpe oroke vɨte seve, a'ese revo Jesús remimbo'e eta yugweru ichui oñomi se'ögwer yuvɨreko.

¹⁴Akoi mborerekwar ɨvate katu va'e oyanduse ko mba'e, ore evokoiyase oroñe'ërä sese mba'e moigätu agwä, a'ese peü ndipoi chira mba'e-mba'e tëi.

¹⁵Sundao eta oipɨsɨpa gwarepochi ipare yuvɨraso oyapo oyeupe imombe'u agwer rupi yuvɨreko. Egwë e'i vɨte kurïtëi judío kwerayevɨsa reroya e'ɨ̇ yuvɨreko yepi.

¹⁶Egwë e'i, semimbo'e opayandepo yovaive ñepëi tuprɨ yuvɨraso Galilea ve a'e ɨvɨtrɨ rese Jesús remimombe'usave.

¹⁷Ipare osepiase Jesús, a'ese omboetei sereko yuvɨreko, oime vɨte rumo ambuae ava ndovɨroyai va'e.

¹⁸Jesús oyemboya oso sese aipo e'i chupe: — Tüpä che mbou mborerekwar ɨvate katu va'e che reko agwä ɨvave, ɨvɨve narä aveino.

¹⁹Peso ava upe opakatu ɨvɨ rupi, pembo'e avei che rekokwer rupi ete yuvɨrekoi va'erä; peñapirämo avei che Ru rer pɨpe, Che rer pɨpe, Espíritu Maräne'ɨ̇ rer pɨpe aveino,

²⁰iyavei pembo'era seko tuprɨ agwä opakatu amombe'u va'e rese peü. Che aikora perese arɨ yakatu rupi, opɨtu'use voi ete tekokwer ɨvɨ pɨpendar kuri.