Read Guarayu MATEO 4 Bible Online

MATEO 4 - Guarayu bible

MATEO 4

¹Ipare Espíritu Maräne'ɨ̇ vɨraso Jesús ava yemboerekwae'ɨ̇save, tosekoa'ä karugwar o'esa pɨpe.

²A'eve sekoi cuarenta arɨ iyavei cuarenta pɨ̇tü ndokarui ete, ipare rumo ndasɨepoi ete oiko.

³Evokoiyase karugwar oyemboya oso Jesús rese seko'ä agwä, aipo e'i chupe: — Tüpä Ra'ɨrɨ ite ereikose, eyaporu ko ita sui mboyape kurïtëi.

⁴A'ese Jesús aipo e'i imboyevɨ chupe: — Ikwachiaprɨ pɨpe rumo aipo e'i: ‘Nda'ei chira mboyape sui gweraño ava yuvɨrekovera, Tüpä ñe'ëngagwer reroya pɨpe avei ava yuvɨrekovera yepi.’

⁵Ichui karugwar vɨraso tekwa Jerusalén maräne'ɨ̇ ve, osupi seraso tüpäro apɨterve ɨvatekatu va'esave

⁶aipo e'i chupe: — Tüpä Ra'ɨrɨ ite nde rekose, evɨapi ko'ave sui; esepia Ikwachiaprɨ pɨpe aipo e'i: ‘Tüpä oyokwaira gwembigwai eta nde rärö agwä. A'e nde mopü'ara opo pɨpe yuvɨreko, ñepëi ita nde momarä rägwer sui.’

⁷Jesús omboyevɨ chupe: — Iyavei Ikwachiaprɨ pɨpe aipo e'i: ‘Nderesekoa'äi chira nde Yar Tüpä.’

⁸Ipare vɨraso iri tëi karugwar ɨvɨtrɨ ɨvate va'e apɨterve, ichui omboyekwapa tëi opakatu tekwa ɨvɨ pɨpendar, porañete gwasu va'e yemboɨvateaisa avei,

⁹aipo e'i chupe: — Che amondora opakatu ko mba'e ndeu, ereñenopɨ'äse che rovai che mboeteisa pɨpe eve.

¹⁰Jesús omboyevɨ chupe: — Eyepepɨ che sui kurïtëi, Karugwar, esepia Ikwachiaprɨ pɨpe aipo e'i: ‘Emboetei nde Yar Tüpä, a'e gweraño tuprɨ avei eremboyeroyara.’

¹¹A'ese karugwar oyepepɨ Jesús sui, ipare mbigwai ɨva pendar yuvɨraso sese añeko agwä.

¹²Jesús oyandu Juan osokendase yuvɨreko, ipare oso Galilea rupi.

¹³Ndopɨtai rumo Nazaret ve, a'e rumo oso sekoi va'erä Cafarnaúm ve, ɨpa popɨ ɨvɨi, a'e ɨvɨ rese yuvɨrekoi va'e Zabulón iyavei Neftalí.

¹⁴Ko egwë e'i yavɨye Tüpä ñe'ë mombe'usar Isaías rembikwachiagwer araka'e:

¹⁵“Ɨvɨ Zabulón pendar iyavei Neftalí pendar, ɨai Jordán rovaindar, paragwasu ɨvɨrindar: Iyavei Galilea pɨpendar, a'eve yuvɨrekoi nda'ei va'e judío.

¹⁶A'e tekwa yuvɨrekoi va'e pɨ̇tümimbisave osepia tesapesa porañete va'e yuvɨreko; a'e tesapesa sendɨ katu va'e yuvɨrekoi va'ekwer upe pɨ̇tü mimbisave.”

¹⁷Ichuive tuprɨ Jesús omboɨpɨ oporombo'e aipo e'i: “Peyevɨ Tüpä upe, esepia köimi ete Tüpä mborerekwasa sekoi.”

¹⁸Ogwatase Jesús Galilea Ɨpa popɨ ɨvɨi, a'ese osepia ñuvɨrïo oyeɨvrɨ va'e: ñepëi aipo Simón, iyavei serer Pedro, ambuae evokoiyase serer Andrés. A'e pira mbo'asar yuvɨrekoi va'e, ombo'a vɨte seve pira yuvɨreko.

¹⁹Jesús aipo e'i chupe: — Perio che rupi, che opovɨrekora ava reka agwä cheu narä.

²⁰Aipo e'i ramoseve voi opoi opira mbo'asa sui ipare yuvɨraso supi.

²¹Koikotɨ katumi aipo, Jesús osepia ambuae oyeɨvrɨ ñuvɨrïo yuvɨrekoi va'e: A'e Santiago iyavei Juan Zebedeo ra'ɨrɨ, a'e yuvɨrekoi oyesupa rese ɨarusu pɨpe omoigätu pira mbo'asa yuvɨnoi. A'eve Jesús oñe'ë chupe,

²²aipo e'i ramoseve voi oseya o'ɨarusu iyavei oyesupa, ichui yuvɨraso supi.

²³Jesús ogwata opakatu Galilea ɨvɨ rupi, oporombo'e oɨ judío ñemonu'äsave tekwa yakatu rupi. A'eve ñe'ësa avɨye va'e omombe'u Tüpä mborerekwasa resendar, ombogwera avei opakatu-katu tëi mba'erasɨsa ava vɨreko va'e sui.

²⁴Jesús reräkwä yandusa opakatu ɨvɨ Siria rupi, a'ese gweru opakatu ava vɨreko va'e mba'erasɨsa tasɨ va'e yuvɨreko chupe, iyavei karugwar vɨreko va'e, nañakä poräi va'e ndogwatai va'e avei. A'e opa tuprɨ Jesús ombogwera.

²⁵Iyavei seta ava Galilea pendar, tekwa Decápolis pendar avei, Jerusalén pendar, Judea pendar ɨvɨ añi'ïvëi kotɨndar ɨai Jordán rovaindar avei yuvɨraso Jesús rupi.