Read Guarayu MATEO 6 Bible Online

MATEO 6 - Guarayu bible

MATEO 6

¹“Peyapoi rene mba'e avɨye va'e ava rovake tache repia anga'u yuvɨreko ndapeyei chira. Peyapose evokoi nungar, pe Ru ɨvave sekoi va'e nomboui chietera porerekosa peü.”

²“Evokoiyase, peipɨtɨ̇vɨïse iparaɨsu va'e, ndapemombe'ui chira opakatu ava upe, inungar ava oñe'ë ñotëi va'e tekokwer rese yuvɨreko yepi oɨ judío ñemonu'äsave iyavei okar rupi tëi tayanderepia anga'u ava o'esave tëi. Supiete aipo a'e evokoi vɨreko ite porerekosa oyeupe narä.

³Akoi nde ereipɨtɨ̇vɨïse iparaɨsu va'e, nde remombe'ui chira nde mborɨpar upe ambuae nde mborɨpar katu upe avei;

⁴eyapo nderepia e'ɨ̇sa pɨpe. Iyavei nde Ru, osepia katu mba'e nde rembiapo, omboura porerekosa ndeu.”

⁵“Akoi peyerurese, ndapeikoi chira inungar ava oñe'ë ñotëi va'e tekokwer rese yuvɨreko yepi, a'e akoi oyerure potarai va'e oɨ judío ñemonu'äsave iyavei okarusu popɨve tacherepia ava yuvɨreko oyapave. Supiete aipo a'e evokoi rese vɨrekora porerekosa oyeupe narä.

⁶Nde rumo ereyerurese, eike nde rëtä pɨpe, emboya nde rokenda ipare eyerure nde Ru uve ndeyeupe ae nde pɨ'a pɨpe. Nde Ru rumo, oikwa ite nde pɨ'a ñemoñetasa, omondora porerekosa ndeu narä.

⁷Iyavei peyerurese ndapemboyevɨ-yevɨi chira peñe'ë pe poranduse mba'e rese, inungar ava iporombopaserai va'e aipo e'i yuvɨreko ko rupi ombou katura mba'e Tüpä yandeu e'i yuvɨreko viña.

⁸Anichira inungar peiko, esepia pe Ru oikwa ite mba'e peipota va'e, peporandu agwä renondeve.”

⁹Sese aipo peyera peyerure: ‘Ore Ru Tüpä ɨvave ereiko va'e, imboeteiprɨ nderer tasekoi.

¹⁰Tou nde mburuvicha etesa oreu. Tayaposa nde remimbotar ko ɨvɨ pɨpe, inungar ɨvave yaposa va'e yepi.

¹¹Embou ore rembi'u oreu arɨ yakatundar ko arɨ pɨpe.

¹²Iyavei ndeñeröi ore angaipa rese oreu inungar ore oreñeröi ore amotare'ɨ̇mbar upe.

¹³Ore mboangaipa ukai rene eve, eipe'a mba'e naporäi va'e ore sui.’

¹⁴“Esepia peñeröise ambuae pe amotare'ɨ̇mbar upe mba'e sembiapokwer rese, pe Ru ɨva pendar sekoi va'e avei iñeröira peü;

¹⁵akoi ndapeñeröise rumo ambuae upe, pe Ru avei niñeröi chietera peangaipa rese peü.”

¹⁶“Akoi peyekwakuse, ndapemboyekwai chira perepiaka vɨ'are'ɨ̇sa, inungar ava oñe'ë ñotëi va'e tekokwer rese yuvɨreko yepi, omboyekwa vɨ'are'ɨ̇sa tacherepia ava yuvɨreko e'i anga'u yekwakusa pɨpe. Supiete aipo a'e vɨreko itera porerekosa oyeupe narä.

¹⁷Nde rumo ereyekwakuse, eyosei nde rova eñemoatɨrö tuprɨ avei,

¹⁸ava oikwa e'ɨ̇ agwä yuvɨreko nde yekwakusa. Nde Ru ñoite oikwara, a'e sekoi ndoyekwai va'esave, iyavei nde Ru osepia mba'e ndoyekwai va'e omondora porerekosa ndeu narä.”

¹⁹“Ndapemonu'ä atɨi chietera mba'e pe rembiereko ko ɨvɨ pɨpe, esepia mba'e pe rembiereko mba'e rasoi omboaso atɨ-atɨ imokañɨpa, a'eve imondarai va'e yuvɨroike omonda.

²⁰Iya peseka katu tekokwer avɨye va'e ɨvave narä, esepia a'eve mba'e rasoi nomomaräi chietera, a'eve mba'e nokañɨi chietera imondarai va'e avei ndoyuvɨroikei chietera omonda agwä.

²¹Esepia nde mba'e ererekose, a'eve avei sekoira nde pɨ'a ñemoñetasa.”

²²“Yande resa inungar tataendɨ yande retekwer upe; evokoiyase, nde resa avɨyese, opakatu nde retekwer vɨrekora tesapesa;

²³akoi nderesa naporäise rumo, opakatu nderetekwer sekoira pɨ̇tümimbisave tëi. Tesapesa oime va'e nde rese a'e ogwese rumo ndesui, ¡mba'e tëiete pɨ̇tümimbi nungar opakatu nde rekokwer upe!”

²⁴“Ndipoi chietera ava ñuvɨrïo gwerekwar omboyeroya va'e, esepia ñepëi oyamotare'ɨ̇ra, ambuae evokoiyase osaɨsu katura, osaɨsu katura ñepëi iyavei ambuae oyamotare'ɨ̇ra. Ndayaikatui ete Tüpä mboyeroya gwarepochi pota raisa pɨpe.”

²⁵“Evokoiyase, che aipo a'e peü: Ndapeyemoma'endu'ai chira mba'e pe remi'urä rese peɨ'u agwä rese avei pe rekove agwä rese no, pe turukwar peipota va'e perete rese narä. ¿Esepia yande rekovesa avɨye katu va'e tembi'u sui yande retekwer avei avɨye katu turukwar sui?

²⁶Pesepia vɨräi eta oveve va'e ɨvɨtu rupi: noma'etɨ̇i va'e nomonu'äi avei ndoyapokatui avei mba'e sɨru pɨpe yuvɨreko; ko rumo, pe Ru sekoi va'e ɨvave a'e omondo mba'e ito'u. ¡Iyavei perepɨkatu vɨräi sui! Pe rumo ɨvate katu va'e peiko vɨräi sui.

²⁷Egwë e'ira revo, ñepëi ipɨ'a ñemoñeta gwasu va'e oiko, ¿marä e'ira pi'ä gwekokwer mbopuku iri kurïtëimi viña?”

²⁸“¿Ma'erä vo pepɨ'a ñemoñeta gwasuai turukwar rese? Pema'ekwa tuprɨ ru marä e'i okwakwa mba'e potrɨ ka'a pɨpendar: ndoporavɨkɨi iyavei ndoipɨ'ai mba'e yuvɨreko no.

²⁹Ko rumo, che aipo a'e evokoi mborerekwar gwasu Salomón, vɨreko atɨ va'e mba'e porañetesa oyese, oyemonde inungar a'e yuvɨrekoi va'e.

³⁰Tüpä ni'ä omboporañete raimi tëi mba'e potrɨ ka'a pɨpendar imo'ä, ichui arayi'ive opara sapɨsa tatave, ¡a'e rumo pemboyemondera, pe ava ndaperoyai va'e Tüpä peiko!

³¹Anichira pepɨ'a ñemoñeta gwasuai, peyeupe ae mba'e rese: ‘¿Mba'e vo ya'ura?’ iyavei ‘¿Mba'e pi'ä yaɨ'ura?’ iyavei ‘¿Mba'e pɨpe pi'ä yayemondera?’

³²Opakatu ko mba'e rese ombopɨ'a ñemoñeta gwasuai ava ndiporeroyai va'e yuvɨreko, pe rumo pereko ñepëi ete pe Ru ɨvate katu va'e, a'e rumo oikwa mba'e peipota va'e.

³³Iyakatu rumo, pemondo opakatu pepɨ'a ñemoñetasa ɨva pendar rese iyavei peyapora mba'e avɨye va'e Tüpä rovai, iyavei peipɨsɨra opakatu ko mba'e ipane va'e peü.

³⁴Peyemoma'endu'a gwasuai rene mba'e arayi'ive narä rese, esepia ni'ä oimerä arɨ pepɨ'a ñemoñeta agwä. Arɨ yakatu rupi pereko mba'e pemoigätu va'erä yepi.”